Ba nkal le u nôgda nduña tole stress ngéda nyuu yoñ i yé nkôôbaga tole bebee i boñ ngim jam. Boña woñ a mboñ le nyuu yoñ i pémés gwom ba nsébél ni hop pulasi le hormones i nya i nloo hihéga. Hala a mboñ le ñem woñ u kahal bép ngandak, matjél moñ ma hoo kuli ikété minkañ, u nhép ni ngui, minsôn nwoñ mi nimbla. We ngi yi kii i yé tagbe, nyuu yoñ i mbôdôl sal behee. Ngéda jam li bak li nlona nduña li ntagbe, nyuu i ntémb kiki i bak.

Nduña i yé ndimbhe nyuu i nti inyu jôs ngim ndutu. Nduña i mbôdôl i boña. Loñge nduña i nhôla we i pala boñ ngim jam. Loñge nduña i nla ki hôla we i sal loñge inyu yônôs ngim njômbi kiki bo i net makégse, i léba bôlô tole i boñ sport.

Ndi nduña i i nom ngandak, i ta bé loñge inyu yoñ. Ngéda u nlôôha bana nduña, hala a nla tééñga nyuu yoñ ni mahoñol moñ. Maboñok moñ ni maada moñ ni bôt bape ma nla héñha. Nduña i i mal bé i nla boñ le mut a bôdôl nyo moog iloo hihéga, a ôt hibañga tole a je ngandak. Hala a nla yak ti nye kon u mahoñol, a nla yak boñ le a bana bañ ngôñ i ke i bôlô, tole a bana ngôñ i nitba.

Nduña i ntééñga bé bôt bobasôna nya yada, ndi i nla lona ngandak mintén mi makon. Nduña i nla ki nôgha nyuu yés yosôna njôghe.