Maada ikété ndap lihaa ni mawanda
I yé ndutu inyu ngandak bôt i bana ni i tééda maada malam ni mawanda map tole ni bôt bap ba lihaa. Di wan matiñ ma Bibel ma ma nla hôla we i kônde lémés maada moñ ni bôt bape.
TÔÑ BÔT BAPE
LITIÑ LI BIBEL: “Mut nye ki nye a tôñ bañ ndigi inyu yé nyetama, ndi a tôñ inyu bôt bape.” —Filipi 2:4.
KII HALA A NKOBLA: Di ga bana maada malam ni bôt bape ibale di mbok mis ngii mam di nla ti bo iloole di bok mis i ngii mam ba nla ti bés. Ibale u ntôñ ndigi wemede, u ga sôk u ôbôs maada moñ ni bôt bape. Kiki hihéga, sobiina nu a ntôñ ndigi nyemede a yé bebee i ke ndéñg. U héya hala, mut nye ki nye a nla bé gwés ba liwanda ni mut a nkadba. Kiki kaat ini ni hop Ngisi le The Road to Character i nkal, “i bet ba ntôñ ndigi bomede ba nsôk bana mandutu.”
YOM U NLA BOÑ:
-
Hôla bôt bape. Bañga mawanda ba mbôdôl wada ni nuu ñem, ba bak ki bebee i hôlna. Minyiña mi ñéba le bôt ba gwé lem i hôla bape ba gwé bé kon mahoñol, i nla ki hôla bo i lédés libak jap.
-
Bana ñem ngôô. Ñem ngôô i yé i nôgda yom mut numpe a nôgda. Ibale u gwé ñem ngôô, u ga keñgle bipôdôl bibe, bibuk bi bi mbaabana tole minjôha mimbe mi mi nla nsuñgaha mut numpe ñem.
Ngéda u nôgda yom bape ba nôgda, u ga ba bebee i tagbe i ngii mahôha map. Jon ñem ngôô u nla hôla we i keñgle mbagla ni i bot mawanda ni mintén mi bôt nwominsôna.
-
Tégbaha ngéda ni bôt bape. I tégbaha ngéda ni bôt bape i nla hôla we i yi bo loñge. U nlama bana minkwel mi mi ntina makénd inyu bot bañga mawanda. Jon ngéda mut a mpot emble nye loñge. Éba mawanda moñ le u ntôñ bo. Nyiña wada ba bi tip boñ u ñunda le “minkwel mi mi nhôlôs mi nla boñ le bôt ba kon maséé.”
TIBIL POHOL MAWANDA MOÑ
LITIÑ LI BIBEL: “Bilôñ bibe bi ñôbôs bilem bilam.”—1 Korintô 15:33.
KII HALA A NKOBLA: I bôt we ni bo ni nkiha ba nla ôbôs tole lémés libak joñ. Bôt ba njoñ yi ba nkal le maada mut a gwé ni mawanda mé ma nla tihba niñ yé. Kiki hihéga, ba nkal le ibale u nkiha ni bôt ba ñôt siga tole ni ba ba mbohna, yak we u nla bôdôl ôt siga tole u nla bos.
YOM U NLA BOÑ: Bot mawanda ni bôt ba ba gwé bilem ni maboñok malam ma u nsômbôl kôna. Kiki hihéga, kiha ni bôt ba ba ngwélél bibuk bilam, ba ba nti bape lipém, ba ba nkap ni ba ba nyi leege bakén.
MATIÑ MA BIBEL MAPE
Béñge bividéô bi bi ntoñol lelaa Bibel i nla hôla babiina, boñge bawanda ni boñge batitigi i kônde lémés niñ yap ikété ndap lihaa
KEÑGLE BIPÔDÔL BIBE.
“Mut wada a mpot bipopoda kiki pansoñ i mbabaa.”—BINGÉNGÉN 12:18.
BA MUT LIKAP.
“Mut likap a’ nuuha.”—BINGÉNGÉN 11:25.
BÔÑÔL BAPE MAM U NGWÉS LE BA BÔÑÔL WE.
“Mam momasôna ni nsômbôl le bôt ba bôñôl bé, yak bé bôñlana bo hala.”—MATÉÔ 7:12.
