Mbôô i pes minsôn
Bibel i ta bé kaat i matibla. Ndi maéba i nti ma nla hôla i ba mbôô. Di wan le matiñ ma Bibel ma ma nla lémés mbôô wés i pes minsôn.
YOÑ NGÉDA NI NYUU YOÑ
LITIÑ LI BIBEL: “Inyule mut nye ki nye a maa oo bé minsôn nwé nyemede kekikel, ndigi le a jéhak nwo, a tônglak ki nwo.”—Éfésô 5:29.
KII HALA A NKOBLA: Litiñ li Bibel lini li nti bés makénd i yoñ ngéda ni mbôô wés i pes minsôn. Nyiña wada u bi unda le, libim li makon di mbéna bana li nlôl ni libak li niñ yés. Ndi i yi tep gwom di nje ni bi di nyo, i nkônde lémés mbôô wés.
YOM U NLA BOÑ:
-
Bijek. Yoñ bitelbene i je bijek bilam ni i nyo ngandak malép.
-
Nyiñgis nyuu. Ibabé i béñge nwii u gwé, i nyiñgis nyuu i nla hôla we i bana loñge mbôô, to ibale u gwé ngwa kon. To ibale bôt boñ ba lihaa ni bidokta bi nhôla we i nyiñgis nyuu yoñ, wemede u nlama boñ hala hiki ngéda.
-
Nañal ngandak. Ibale mut a nyén péé ntandaa dilo, a nla kwo kon. Makidik ngandak bôt i nyoñ ma mboñ le ba yén péé iloo héga. Ndi ibale u nañal ngandak, u ga lémés niñ yoñ.
KEÑGLE BILEM BI BI NLA TÉÉÑGA MBÔÔ WOÑ
LITIÑ LI BIBEL: “Di pubus bésbomede ni mam momasôna ma nhindis minsôn ni mbuu.” —2 Korintô 7:1, MN.
KII HALA A NKOBLA: I yé loñge i tjél hindis nyuu yés ni gwom kiki bo siga bi bi nla ti bés makon tole bi bi nla nol bés.
YOM U NLA BOÑ: Pohol ngim hilo u ntéé le u nlama nwas ôt siga, u tila ki hio i kalenda. Ilole hilo hi hi nkola, lep siga ni gwom u bé gwélél inyu tééda yo, lep ki matis ni gwom gwobisôna bi gwé maada ni siga. Keñgle bahoma bôt ba mbéna ôt siga. Yis mawanda moñ ma ñem nyuu makidik moñ.
MATIÑ MA BIBEL MAPE
Ibale u gwé ngôñ ni Bibel, bat Mbôgi Yéhôva yada mu libôga joñ
BANA LEM I YOÑ YIHE.
“Ngéda u ñoñ ndap yondo, w’a boñ lipént ntôla ngii nyôl, le u nyôgbaha bañ ndap yoñ matjél, ibale mut a nkwo mu.”—NDIIMBA MBÉN 22:8.
U BEP BAÑ UNUP.
“Nu a mpala bé unup a gwé soso bañga yi, ndi nu a nhoo nyai a mbédés bijôñ ngii.”—BINGÉNGÉN 14:29.
U BA BAÑ MBÉNA JE.
“U yén bañ i ti banyo wai, to i ti babéna je nuga.”—BINGÉNGÉN 23:20.
