Bividéô di ntehe i makoda més ma ndôn bi nlémél bés ngandak inyule bi nhôla bés i tibil nok biniigana bi Bibel. Likoda li ndôn li li bi tagbe i nwii 2020 ni ño le ‘Ba maséé ngéda yosôna’! li bééna 114 bividéô, bilôk bikéé bi juu li bakena ntôñ ni bahôla bap, ba bi ti 43 minkwel. Bebek u ma badba le lelaa ba bi boñ inyu pémés bividéô bi, imbe ngéda hala a bi yoñ ni moni nwañen?

 I nkoñ ’isi wonsôna, bebee le 900 i bilôk bikéé i bi ti ngéda yap, yi yap inyu boñ le bividéô bi bi pam. Inyu boñ le bôlô i i séla, i bi béda nwii ima, ni 100 000 i ngeñ. Ndi mu ngeñ i, ba bi gwélél 70 000 ngeñ ndik inyu pémés i liñgeliñge ini le Néhémia: ‘Maséé ma nlôl yak Yéhôva ma yé ngui nan,’ i nom ndigi 76 mamut

 Ndi kiki bébomede ni nla yi, hala a bi béda moni, i bé béda bijek inyu bet ba bé sal, homa inyu yén, bisélél ni bahoma het ba bé lama tugul i liñgeliñge i.

 Mankéé Jared Gossman nu a nsal i juu li Audio/Video a nkal le: “Juu li biniigana li li yé juu jada li juu li bakena ntôñ li nsômbôl le bividéô gwés bi éba bilem ni liniñik li bilôk bikéé bi nkoñ ’isi wonsôna. Hala a nhôla bés i nok le di gwé lihaa li lôk kéé i bôda ni i bôlôm i nkoñ ’isi wonsôna.” Inyu hala nyen “24 dikip di di bé lôl i 11 biloñ di bi sal ntôñ. Inyu boñ le bôlô i séla loñge, i bi béda moni, loñge ntjega ni mut nu a nyi kena mam.”

 Inyu boñ le bividéô gwés bi pam, i bi béda ngim bahoma ni ngim bisélél i tôbôtôbô. Kiki ’héga inyu boñ liñgeliñge i Néhémia: ‘Maséé ma nlôl yak Yéhôva ma yé ngui nan’ i bi béda le ba oñ studiô nyoo i Mt. Ebo, bebee ni Patterson, i New York. Lôk kéé i bé gwés le mu liñgeliñge i, mam ma tagbe nlélém kiki ngéda Néhémia, ndi i nlélém, ngéda ba tibil gwélél makébla. Inyu hala nyen ba bi gwélél gwom bi bi nhee bé diye, bi hoyok inyu oñ yom i i bé pôna lipénd li Yérusalem i ngéda behee. Ba bé gwélél mambam ma ma bééna méta 6, ba bé ba pén mabam ma kayéle ma pôôna ngok. Ba bé le ba kena “mabap” ma homa numpe inyu tuk biliñgeliñge bipe. Ndik inyu boñ liñgeliñge i Néhémia yotama, i bi béda 50 000 000 Fcfa. a

 Biniigana bini gwobisôna bi nhôla bés i kônde ti Yéhôva mayéga inyu likoda li ndôn li nwii unu. Di yé nkwoog nkaa le ngéda n’a tehe biliya gwobisôna lôk kéé i mboñ inyu pémés likoda li ndôn lini, bôt ba nkoñ ’isi wonsôna ba ga at makiñ map inyu ti Yéhôva mayéga. Di nti mayéga inyu makébla ni nti inyu nit nson u ñañ nlam ni njel site yés donate.pr418.com ni manjel mape.