“Hala a yé 19 nwii le me bé bem!” Kii mankéé a bé bem? Bibel Ngobol mbok yondo ni hop wé, hilémb hi Bengali. Ngandak bôt i nkal nlélém jam ngéda Bibel Nbogol mbok yondo i mpam ni hilémb hiap. Ndi baa ni mah badba bimbe biliya bi mbéda inyu pémés bibibel bi?

 Jam li bisu li yé le, juu li matila li bakena ntôñ li ñungus ngim lôk kéé inyu gwel nson u. Inyu kobol Bibel, i mbéda imbe ngéda? Nicholas Ahladis, nu a nsal i juu li nit nson u ngobol i Warwick, i New York, a ntoñol le: “Di nlama wan ngandak mam, kiki ’héga, di mbéñge bôt bañen di gwé inyu kobol, baa hilémb di nlama kobol hi nlet? I bet ba añ Bibel ba nyi mambe mam? Di mbéñge ki lelaa nlélém hilémb hi mpôda ikété ngandak mabôga. I ndék yosôna, bakobol ba nla yoñ nwii wada tole nwii maa inyu kobol Bitilna bi hop Lôk Grika, inyu kobol Bibel yosôna, ba mbéna yoñ nwii mi-na tole iloo hala. Inyu kobol Bibel ni hilémb hi moo, i mbéda ki ngandak ngéda.”

 Inyu kobol Bibel, bôt baa ba nkola bé. Ngim mangéda, lôk kéé i i nit ngobol i bak i mandap map i nti mahoñol map. I lôk kéé i, i nla ba i yiine i biloñ bipe. Mahoñol map ma mboñ le lôk kéé i nkobol i nya i nôga loñge, i nya i ntibil pémés mahoñol ma ngisi, i tombok ki i añ. Mankéé wada nu a niiga lôk kéé ngobol i Afrika nwelmbok a nkal le: “I kobol Bibel i yé mbegee keñi ipañ Yéhôva ni ipañ i bôt ba ñañ yo.”

 Ngéda lôk kéé i mal kobol Bibel, ba nlama pémés yo ni mapep, ba at ki yo. Inyu gwel nson u, lôk kéé i i mpémés bibibel, i ngwélél ngandak bisélél kiki bo: pépa, tinti, bikôkôp, colle, ni gwom bipe ba ngwélél nyoo. I nwii 2019, ntôñ u bi gwélél iloo 11 milliard Fcfa inyu somb i gwom bi gwobisôna, nlélém nwii, lôk kéé i i nsal i het ba mpémés bikaat bi bi tégbaha yom kiki bo 300 000 ngeñ inyu pémés bibibel.

 Inyuki di ntégbaha ngandak ngéda, di pémhak ngandak moni inyu pémés bibibel? Joel Blue nu a nsal i juu li li mpémés bikaat bi ntôñ a nkal le: “Ikété bikaat gwés, Bibel i yé kaat i i nlôôha ba nseñ, jon di nsômbôl le i ti i Djob di mbégés lipém, i yidis ki i nwin di añal.”

 U éya Bibel ni mapep, di nkobol ki bibibel bi tôbôtôbô. Kiki ’héga Bibel Ngobol mbok yondo ni hilémb hi moo. Bibel Ngobol mbok yondo i yé nkoblak ikété 10 dilémb di moo. Inyu pémés Bibel yada i bôt ba ndim, i mbéda ngeñ juem. Kiki Kibel yada i gwé ngandak bikaat, ibale ba mbok bikaat bi yada ipañ ipe, hala a nti bebee 2, 3 méta. Di mpémés ki Bibel inyu bôt ba mok ni bikôkôp bi bi ntomb.

 Bibel Ngobol mbok yondo i nhôla i bet ba añ yo ngandak. Kiki ’héga, di béñge i jam li bi tagbe i likoda ni hilémb hi moo hi Kiluba i libôga li Tombe, i Kôñgô Kinshasa. Kiki libôga li Tombe li yé haa ni tison keñi jam kiki bo 1 700 kilôméta. Lôk kéé i bééna ndigi Bibel yada. Inyu kôôba minkwel, i bé béba le ngéda mankéé wada a mal kôôba, a ti mankéé numpe Bibel. Ndi ibôdôl i sôñ Hikañ, nwii 2018, hiki mut ikété likoda a bi pam i bana Bibel Ngobol mbok yondo i i yé nkoblak i nya i nôga loñge i ntomb ki i añ ni hilémb hi Kiluba.

 Ngéda sita yada i bi kôhna Bibel Ngobol mbok yondo i ba bi tiimba lémés ni hop Jaman a bi kal le: “Me nkal ha bé le: Me nlama añ Bibel. Ndi me nkal le: ‘Me nlama pala kena lisoñgol jem li Bibel ni bisu?’” Mut mok wada a bi kal le: “I Bibel Ngobol mbok yondo ba bi ti me, i bi héñha niñ yem. Ntel me ñañ Bañga i Djob, ngélé bisu ini le me tibil nok yo. Me nsômbôl yi mam mape ma ma mbéñge Mbôgi Yéhôva, me nsômbôl ki yila Mbôgi Yéhôva.”

 I bôt ba añ Bibel Ngobol mbok yondo ba yé maséé inyu makébla ma ntina inyu kobol yo. Inyu nit i nson u, w’a léba manjel u nla gwélél inyu ti makébla i site yés donate.pr418.com. Di nti bé mayéga inyu lem nan likap.