Mbôgi Yéhôva i ngwel minson nwap i hôlga ki bôt ikété iloo 200 i biloñ. Mu nsoñgi u ndik 35 biloñ gwon bi gwé bé ngôñ ni mahôla. Ndi hee bini biloñ bipe bi nyôñôl ni moni inyu gwel minson nwap?

 Juu li bakena ntôñ li nwan i mam ma mbéda Mbôgi Yéhôva i pes mbuu ikété nkoñ ’isi inoñnaga ni minsôn ba nlama gwel. Ba nyoñ biloñge bi makidik inyu yi moni nwañen ba ga gwélél. Ibale ngim hikuu hi loñ hi nkôhna makébla ma njômbi ñem iloo i yom i mbéda toi bo, i moni mi nkôdba mu ngii, mi nhôla biloñ bipe. Liboñok li mam li, li nkiha ni li bikristen bi hiai bisu li di nkoba i 2 Korintô 8:14 i i nkal le “inyu boñ le mam ma kolna.” Hala a mboñ le bikristen bi gwé ngandak bi nla hôla bet ba gwé ndék.

 Kii i lôk kéé i nkôhna mahôla i nôgda? Kiki ’héga, i loñ Tanzania, iloo 30 million bôt ba niñ ndik ni 1000 Fcfa i ngim kel. Bitelbene bi le i bet ba gwé ngandak ba hôla bet ba gwé ndék bi bi hôla i bôñgôl ndap Ane i likoda li Mafinga. I lôk kéé i, i bi tila le: “Ibôdôl nu ba bi bôñgôl ndap yés Ane, ngandak bôt i nlo nano makoda! Di nti ntôñ Yéhôva mayéga ni lôk kéé i bôlôm ni i bôda inyu mahôla map ma ma bi boñ le yak bés di bana loñge homa inyu bibégés.”

 Himala hi COVID-19 hi bi boñ le lôk kéé i Sri Lanka i hañba ni bijek. Hala a bi pémél mankéé wés Imara Fernando ni man wé munlôm Enosh. I mankéé nunu a bi kôhna mahôla ni njel makébla ma njômbi ñem ma bilôk bikéé bi biloñ bipe. A ntila le: “Di nti lôk kéé mayéga inyu gwéha ba bi éba bés munu béba ngéda di bi tégbaha. Di yé maséé i ba munu lihaa li Mbôgi Yéhôva. Di nke ni bisu i soohe Yéhôva le a hôla lôk kéé yés munu i dilo di nsôk dini.”

 To ibale lôk kéé yés i yiine numbe homa, ba yé bebee i hôla. Kiki ’héga, Enosh a bi bañ hikukuu inyu tééda moni mi a ga gwélél inyu nit lôk kéé i i gwé ngôñ ni mahôla. Yak mankéé nu muda le Guadalupe Álvarez, a bi éba nlélém lem likap. A nyééne i loñ Meksikô i homa ngandak bôt i nsal bé ni le ba gwé bé to homa ba nla kuhul dola. To hala, yak nye a nti i yom a gwé. A nkal le: “Me nti Yéhôva mayéga inyu loñge yé ñem ni ndéñbe yé i gwés. Me nyi le ndék yem makébla i nkôndba mu makébla lôk kéé i nti. Yak yo y’a ba nseñ inyu nit lôk kéé i nkoñ ’isi wonsôna.”

 Mankéé Anthony Carvalho nu a nsal hikuu hi loñ hi Brésil a nkal le: “Ngim ngéda i bi pam le yak bés di bana ngôñ ni mahôla ma lôk kéé i biloñ bipe. Mahôla ma ma bi boñ le di bana mahol ngandak. Nano kiki mam ma bi héñha, yak bés di nla nit lôk kéé ipe. Lôk kéé hana i Brésil i mbéñge lelaa nson u ngwéla ni nkoñ ’isi inyu tehe lelaa yak bo ba nla hôla.”

 Lelaa Mbôgi Yéhôva i nit lôk kéé yap i i gwé ngôñ ni mahôla? Ilole di ep moni i dikuu di biloñ, di nti makébla ma njômbi ñem inyu nit nson u Ane i nkoñ ’isi wonsô. Di nla gwélél dikukuu di Ndap Ane, het ba bi tila le “Matéô 24:14” tole di kee i internet i donate.pr418.com. Ntôñ Yéhôva u nkoñ maséé ni makébla ma momasôna.