Nsik u yé likébla lilam li li nlôl bés yak Yéhôva. U nla tihba bés kayéle u héñha mahoñol més, u ti ki bés makénd. Hala nyen ngembe nsik yés i yé. Maliga ma yé le i tjémbi ti di nla boñ iloo hala, di nla yak hôla bés i kôôge bebee ni Yéhôva.

 Ibôdôl i nwii 2014, di ma pémés iloo 70 ma ngembe nsik. I len ini, i ndék yosôna, i tjémbi ti di ma koblana ikété iloo 500 dilémb. Bebek di nla badba le: ‘Lelaa ba mboñ inyu pémés tjo?’

 Hikip hi Audiô/Vidéô hion hi nsal inyu pémés tjémbi. Ba nsal ni juu li biniigana li juu li bakena ntôñ. Hikip hi, hi gwé 13 lôk kéé i bôlôm ni i bôda. I lôk kéé i, yon i mbot tjémbi, i nkép matole ma bikei bi nsik, i boñok ntjega ni bini bibôlô bipe bi bi mbéda iloole tjémbi di mpam. U kônde hala, juu li biniigana li bi ti kunde le lôk kéé i i nti mahôla i bak mandap map, i nla nit i bôlô ini. Bahogi ba nla bot tjémbi, ba nla kôt nsik, bape ba nla yak tôp. I lôk kéé i i ngwélél makeñge map ni suhulnyuu ibabé i yéñ le i nene.

 Lelaa ba mpam i pémés ngembe nsik? Juu li biniigana li nti bipes bi bikaat bi Bibel bi bi ga gwéélana inyu hiémbi, ni mahoñol i hiémbi hi hi nlama tinde bôt i bana i ngéda b’a eble hio. Hikip hi nsik hi mpohol ngim mut inyu tila bibañga bi hiémbi. Hi mpémés ndugi nsik u bisu. I ngéda juu li biniigana li ñemble nsik u, li nti mahoñol mé. I mbus, hikip hi nsik hi nlona mahéñha ma mbéda iloole ba nkôt, ba loñge ki hiémbi inyu ngélé i nsôk. I tjémbi ti di ntuba i ngandak bahoma kiki bo i dikuu di biloñ, tole mandap ma lôk kéé i i gwé bikei bi bi njubus makiñ.

 Inyu pémés i tjémbi ti, bilôk bikéé bi yé bi gwélél ordinater. Ba ngwélél yak bikei bipe kiki bo mixeur, amplificateur, bibafle ni bimicrô. Ndamba i hiki micrô i nla ba ipôla 64 000 CFA ni 645 000 FCFA. I nwii 2020, di bi pémés iloo 75 000 000 FCFA inyu somb bikei bi nsik.

 Bimbe biliya di mboñ inyu tibil gwélél makébla? Iloole di sébél ngandak lôk kéé inyu ntôp tjémbi i Bétel, di yé di sal ni lôk kéé i i yé bebee i lona mahôla ba bak i mandap map. Iloole di sébél bôt inyu kôt nsik, lôk kéé i ngwélél biordinateur inyu pémés nsik u, mintén mi bikudul nwominsôna.

 Lôk kéé i ngwés i ñemble ngembe nsik. Tara nu a niñ i loñ Jaman a nkal le: “I tjémbi ti, di mômôs me ñem nwee i ngéda me gwé nduña. I ngéda me ñemble tjo ni hop wem, i yé kiki bo le Yéhôva a nhôôba me.” Mankéé wada i loñ Kazakhstan le Dmitry a nkal le: “Me ngwés me ñemble ngembe nsik, i ngéda me ñemble tjo, me ntôñ bé inyule me nyi le bibuk gwap bi nkiha ni matiñ ma Bibel. U héya hala, i tjémbi ti, di nhôla me i lédés maada mem ni Yéhôva.”

 Delia, nu a niñ i Afrika Nwelmbok a nkal le: “I tjémbi ti, di nlédés hémle yem. I ngéda me gwé nduña tole jam li ntééñga me, me nléba ndik hiémbi mu hi hi nsuhus me mahoñol. Jôga li ngéda, i ngéda me mbôdôl ndik emble nsik u, me nôgda hogbe!”

 Ngandak bôt i nlôôha gwés i tjémbi ti. Lerato nu yak nye a yé i Afrika Nwelmbok, a nkal le: “I tjémbi tini le: ‘Ma yé toi ndigi bebee’ ni ‘Mu mbok yondo i nlo’ di nhôla me i hégda lelaa m’a leege mama yem i ngéda a ga loo bitugne. I ngéda me ñemble i tjémbi ti, me ntehe nye a yé lo ngwéé inyu sambla me.”

 I Sri Lanka, hiémbi hiada hi bi hôla hingonda hiada hi hi bééna 16 nwii. A nkal le: “Malét wem a bi nyéi me i bisu bi bana baudu bape inyule me yé Mbôgi Yéhôva. Me bi kon woñi, me yi bé kii me kal. I ngéda me bi témb i ndap, mama yem a ti me makénd le me emble i hiémbi hini le ‘Yigil i nlédés we.’ I hiémbi hi, hi bi hôla me i nok le me nlama boñ nyiña, me kôôba inyu timbhe bo. I kel i bé noñ ha, me bi kwel ni malét wem. A bi emble me, a kal ki le nano a ntibil yi biniigana bi Mbôgi Yéhôva. Me nti ntôñ Yéhôva mayéga inyu tjémbi di di ntina makénd u mpémés inyu yés.”

 Hee di nyôñôl moni inyu pémés i tjémbi ti? Ni njel makébla lôk kéé i nkoñ ’isi wonsôna i nti, ba gwéélak manjel di nléba i donate.pr418.com. Di nti bé mayéga inyu makébla manan.