Ikété nkoñ ’isi wonsôna baane ba mbéna je moni mi loñ, hala a yé béba jam i i nlona bikuu. a Kiki hihéga, munu himala hi COVID-19, ba bi ôm baane ba ngandak biloñ nsohi le ba nje moni mi mi bé lama gwéélana inyu kon i COVID-19. Kiki ba bi kadal i moni mi, hala a bi kéñ le ngandak bôt i kôhna matibla, hala a bi lona ngandak ndutu, yak bôt ba bi wo ki ngandak.

 Bikuu inyu béba lem i, u bat bé. David Cameron nu a bé nlômbi premier ministre i loñ Ngisi a bi kal le: “Béba lem i baane i je moni mi loñ i yé kiki soso ndee libôblaga i het biloñ gwobisôna bi yé ikété.”

 Ndi to hala, di nla kal le kel yada i jam li, li ga mal. Inyuki? Béñge jam Bibel i nkal le Djob a ga boñ.

 Nyambe a nkal ikété Bañga yé le: “Me Yéhôva, me ngwés telepsép; me ñoo wip ni mam ma téé bé sép.” b (Yésaya 61:8) Yéhôva a nyi, a ntehe ki i ngéda baane ba nje biloñ moni. (Bingéngén 14:31) A mbôn le: “Kiki bape ba ntét bôt ba nok ndutu . . . m’a telep inyu sôñ bo.”​—Tjémbi 12:5.

 Kii Djob a ga boñ? Ilole a téé baane bape, a ga héñha bo ni Ane yé nyemede. (Markô 1:14, 15; Matéô 6:10) Bibel i nkal le: “Nyambe nu ngii a ga téé ngim ane . . . i ga nyugut biane bi gwobisôna, i bôk ki gwo ngéñ ngéñ, ndi yotama yon i ga nom i boga ni boga.” (Daniel 2:44) Ni njel Ane y é Djob a ga mélés i lem ibe i, di ntehe i len ini.

 Lelaa di nyi le Ane Djob i ga bana bé i bôô lem i? Di béñge le mam mana.

1.  1. Ngui. Djob nyemede nyen a ga ti Ane yé ngui.​—Masoola 11:15.

    Mambe maselna ma yé: Inyu boñ le ngim Ane i ba, moni mi bôt ba loñ won mi niñis biane bi. Inyu hala nyen i mam mana ma mbôl: makal pati, wip, ni mam mape ki. Ndi Ane, Djob Nu ngui yosôna nyen a nit yo; jam to jada li ga hañ bé i bôt ba ba, isi énél yé.​—Tjémbi 145:16.

2.  2. Ñane. Djob a bi téé Yésu Kristô le a ba kiñe i Ane yé.​—Daniel 7:13, 14.

    Mambe maselna ma yé: To ibale baane bape ba gwé mahoñol malam lelaa, kel yada ba ga tinde bo i boñ mam ma ma téé bé. (Ñañal 7:20) Ndi, Yésu nye a bi unda le mut nye ki nye a nla bé lôbhe nye. (Matéô 4:8-11) Gwéha yon i ntinde nye i bôñôl bôt mam, a ntôñ ki bôt ngandak.​—Tjémbi 72:12-14.

3.  3. Mambén. Mambén ma Ane Djob ma yé peles, i bet ba nôgôl mo ba yé maséé i boñ hala.​—Tjémbi 19:7, 8.

    Mambe maselna ma yé: Mambén ma bôt ba binam ma yé ma ba ndutu ngim mangéda, ma ledek tole ba noñ bé i jam ma nkal, hala nyen baane ba yé ba bôdôl je loñ moni. Ki le mambén ma Djob ma ntomb i nôgôl, ma yé ki nseñ inyu yés. (Yésaya 48:17, 18) Mambén ma ma ta bé ndigi inyu maboñok més, ndi yak i yom i yé i ñem wés. (Matéô 22:37, 39) Kiki Nyambe a ñañ miñem nwés, nyen a nla tinde bo le ba boñ i yom i yé ntilga mu mambén ma, ndi ni konangoo yosôna.​—Yérémia 17:10.

 Baa ni gwé ngôñ i yi mimbônga Bibel i mpôdôl inyu ane i i gwé bé baane ba ba ba njél loñ moni.

•   Añ yak nkwel unu ni hop pulasi le “Le Royaume de Dieu​—Un gouvernement sans corruption” inyu yi manjom maa ma ma ntinde bés i kal le Ane Djob i ga je bé moni mi loñ to kel yada.

•   Mbéñge yak vidéô ini le Kii i yé Ane Djob? Inyu tibil yi Ane Djob ni kii i ga boñ inyu bôt ba binam.

•   Nigil Bibel ibabé i saa inyu tehe lelaa mimbônga mi Bibel mi nla bane we nseñ.