Baa yak we u yé i homa mangéda ma mbep héñha? Mangéda ma mabe ma yé nya ndi nya. Mbuk mbebi, banop bakeñi, bi nla lona ngandak malép, bi ñôbôs yak mandap ni gwom. Banop bakeñi ba nla boñ le hisi hi kubi, yak mbuk mbebi nkeñi i i gwé mbambat i nla boñ le hié hi kala i mapan, hi tjé ngandak gwom ni binuga. Lék i i nlôôha, mangudga ma tuye, ni mbuk mbebi ngéda lisuni, bi nla ôbôs ngandak gwom.

 I masañ mana, mangéda ma nlôôha bep ni nkoñ ’isi wonsôna. Likoda ba nsébél le, Fédération international des sociètés de la Croix-Rouge, li nkal le: “Yak nsoñgi u bôt bikuu bi ntihba u nkônde ndik bet, inyule malép ma nhôl ngandak, mbuk mbebi ni lék ikeñi bi yé ngandak. Bi nol ngandak bôt, bi mboñ le ngandak bôt ipe i yiñba yom i je, bôt bape ba nlama nyodi homa ba nyééne hiki nwii.”

 I mbus bikuu bini, bôt ba nok njôghe i minsôn, ni i mahoñol. Bape ba nkon kon u mahoñol inyule ba nimis gwom gwap, mandap map, mangéda mahogi, ba nimis yak bôt ba ngwés.

 Ibale u bi boma i nya bikuu ini, Bibel i nla hôla we i nihbe ndutu yoñ. I nti hogbe, botñem ni maéba ma ma nla hôla we i niñ yoñ i hiki kel. Maéba ma, ma bi hôla ngandak bôt i bi boma nlélém ndutu kiki we (Rôma 15:4) I ntimbhe yak mbadga ini i ntééñga ngandak bôt: Inyuki Djob a nwas le i nya jam i i pémél me? Baa Djob a yé kogse me?

 Bibel i niiga le Djob bé nyen a nôgha bés mandutu ma mpémél bés. I nkal le :“ Nyambe a nla bé noodana ni mam mabe, to nyemede a noode bé mut hala.” (Yakôbô 1:13) Hala a ñunda le bikuu bi kwél bôt nye bé nyen a mboñ le.

 Bibel i ñunda le ngim mangéda Djob a bi gwélél gwom kii bo malép inyu kogse bibéba bi bôt. Ndi gwom bi, bi bé bé kiki bikuu di ntehe len, bi bi mpuhe bôt, bi nolok bibéba bi bôt lôñni biloñge bi bôt. Miñañ mi yé i Bibel het Djob a bi sôñ biloñge bi bôt, a béhge bôt bisu bi ngéda, a kalak inyuki a nyoñ makikik i kogse bôt. Kiki hihéga Djob a bi toñol inyuki a bi lona ntida malép i ngéda Nôa, a ti ki mabéhna ilole a mboñ hala, a sôñ ki Nôa ni lihaa jé.​—Bibôdle 6:13; 2 Pétrô 2:5.

 Inyu yi inyuki di nkal le bikuu bi bi nkwél bôt inyule mangéda ma mbep, bi ta bé kogse i Djob, béñge ño nkwel unu le “Les catastrophes naturelles: qu’en dit la Bible?”

 Bibel i ñunda le Yéhôva a a ntôñ bés, a ñunda ki bés ñem ngôô. Béñge i yom minlôñ mi Bibel mini mi nkal.

•   Yésaya 63:9: “Ikété njiiha yap yosôna, yak [Djob] a bé nok ndutu.”

   Ndoñi: Yéhôva a nlôoha siida ngéda a ntehe bôt ba nok ndutu.

•   1 Pétrô 5:7: “A ntôñ bé.”

   Ndoñi: Yéhôva a ntôñ inyu loñge yoñ.

 Kiki Yéhôva a ntôñ bés a kônlak ki bés ngoo, hala a ntinde nye i boñ ngim jam. A nti bés hogbe ni njel maéba malam ma yé ikété Bibel, yak ni botñem i niñ i mbok yondo i het bikuu di mbéna kôs ngéda mangéda ma mbep bi ga ba ha bé.​—2 Korintô 1:3, 4.

 Ikété Bañga yé, Yéhôva a mbôn le a ga ‘boñ le dilo di nlo di ba loñge inyu yés, di bana ki botñem.’ (Yérémia 29:11) A gwé ngôñ le bôt ba binam ba nok lingoñoo li niñ ikété paradis ni le ba kon ha bañ woñi le ngéda i mbep.​—Bibôdle 1:28; 2:15; Yésaya 32:18.

 Nyambe a ga yônôs minbônga mi ni njel Ane yé i i yé nyoo i ngii; man wé Yésu nyen a yé Kiñe. (Matéô 6:10) Yésu a gwé pék ni ngui bi mbéda inyu mélés bikuu. Ngéda Yésu a bé hana ’isi, a bi unda ngui a gwé i gwel gwom kiki bo soso mbuk mbebi ni mangudga. (Markô 4:37-41) A ga nok bôt, a gwélél ki pék yé inyu ane bo, a niigaga bo lelaa ba nlama tééda hisi loñge. (Yésaya 11:2) Isi énél i Yésu, mangéda ma ga bep ha bé, to bikuu bi ga kwél ha bé bôt kekikel.

 U nla badba ni le: “Imbe ngéda Yésu a ga gwélél ngui yé inyu boñ le bikuu bi ba ha bañ?”  Inyu timbhe i mbadga i, béñge ño nkwel unu le “Imbe ngéda Ane Djob i ga énél hisi?”

 Maéba ma Bibel ma nla hôla we ilole mangéda ma mbep ni i ngéda ma mbep, ndi yak mbus ngéda.

•   I bisu bi ngéda: Kôôba i pala nyodi.

   Bibel i nkal le: “Mut yihe a ntehe jam libe, a solop; ndi bôt ba ba gwé bé yi ba nke ni bisu, bikuu bi kwél bo.”​—Bingéngén 22:3.

   Ndoñi: Hek pék i bisu bi ngéda, hoñol mambe mandutu w’a la boma ibale kuu i nkwo, ha nyen w’a yi lelaa u nla pala sôñ wemede ni lihaa joñ.

   Jam bôt bape ba nkal: “Kel yada di bi la ke ngwéé inyule di bi kôôba ilole hié hi nligis mapan hi nkala mu libôga jés. Di bi kôôba bibot gwés inyu ke ngwéé. Di ha yak bee gwés, ni mambot més mu ikété. Bôt ba bé kon woñi ngandak ipañ yés, ba bé yi bé kii ba yoñ, kii ba nwas. Me nti Yéhôva mayéga le bés di bééna mam momasôna ma bé béda bés;!”​—Tamara, Kalifornia, i loñ Amérika.

•   I ngéda bikuu bi nkwo: béñge mam ma nlôoha ba nseñ.

   Bibel i nkal le: “Yak i ngéda mut a gwé ngandak lingwañ, niñ yé i nlôl bé i mam a gwé.”​—Lukas 12:15.

   Ndoñi: Niñ i yé nseñ iloo bigwel moo.

   Jam bôt bape ba nkal: “Ngéda mbuk mbebi nunu le Lawin b a bi bôk ndap yés, me bé yi ha bé kii me boñ. Ndi jam jada me bi boñ, li bé le me bi soohe Yéhôva ni ñem wem wonsôna. Me bé yi le di bi nimis ndik gwom gwés, he niñ yés bé.”​—Leslie, Filipin.

•   I mbus kuu: Yoñ hiki kel kii i nlo.

   Bibel i nkal le: “Kekikel ni tôñ bañ inyu yani, inyule yani a’ bana yé nduña.”​—Matéô 6:34.

   Ndoñi: U lôoha bañ tôñ inyu mandutu ma nla pémél we yani.

   Jam bôt bape ba nkal: “I ngéda soso mbuk mbebi le Irma a bi ôbôs ndap yem, me bé lama yoñ makidik ma ngui, ma me bé bé le me hégda kel yada le me nla yoñ, nduña i bi pam me i héa bitamb. Me bi noode noñ maéba ma Bibel mana le, me nlama yoñ hiki kel kiki i nlo. Me bi sôk nôgda le ni mahôla ma Yéhôva, me nla boñ ngandak mam me bé bé le me hégda.”​—Sally, Florida, i loñ Amérika.

 Inyu kôhna mahôla mape, béñge yak ño nkwel unu le “Catastrophes: des mesures qui sauvent des vies”