Ngéda u ntehe mintonba mi nkand kuu, u yé le u badba le: ‘Baa Djob a ntehe toi yom i yé tagbe? Inyuki nya mam ini i mbôña? Baa mintonba a mi ga mal kel yada? Me nlôôha kon woñi, m’a boñ laa?’ Bibel i mtimbhe mambadga mana.

 Nyambe a ño bôt ba njo bisañ ni mintonba. (Tjémbi 11:5; Bingéngén 6:16, 17) Yak Yésu, nu a ba pot i jôl li Djob, a bi kodol banigil bé ngéda ba bé jo bisañ. (Matéô 26:50-52) Tolakii ngim bôt i nkatba i nol bôt bape inyu jôl li Djob, Djob a neebe bé maboñok ma. A ñemble bé to masoohe map.​—Yésaya 1:15.

 Djob a ntôñ ba bobasôna ba nok ndutu, yak i bet ba nok ndutu inyule mintonba mi ntééñga bo. (Tjémbi 31:7; 1 Pétrô 5:7) Bibel i ñunda ki le Djob a ga mélés bisañ hana ’isi.​—Yésaya 60:18.

 Bibel i ñunda i jam li mboñ le mintonba mi ba, i nkal le: “Mut wada a ntét numpe i boñ nye béba.” (Ñañal 8:9) Ibôdôl behee, i bôt ba gwé bitel bikeñi ba ntét bana bôt bape. I ndééñga i yon i ntinde ngim bôt i yila mintonba, i timbhe béba inyu béba.​—Ñañal 7:7.

 Djob a mbôn le a ga mélés woñi ni bisañ, a lona ki nsañ i nkoñ ’isi. (Yésaya 32:18; Mika 4:3, 4) A mbôn ki le:

•   A ga héya i jam li nlona mintonba. Djob a ga tjé biane gwobisôna bi nkoñ ’isi, a lona Ane yé, le yon i ane nkoñ ’isi wonsôna. Kiñe i Ane Djob le Yésu Kristô a ga énél bôt bobasôna i nya i téé sép, a mélés ki ndééñga ni bisañ. (Tjémbi 72:2, 14) Ha ngéda i, mintonba mi ga ba ha bé. Bôt b’a nok “lingoñoo inyu ngandak nsañ.”​—Tjémbi 37:10, 11.

•   A ga mélés ndutu yosôna mintonba mi nôgha bôt. Nyambe a ga mélés njôghe yosôna bôt ba nok, i minsôn ni i mahoñol, i i nlôl ni mintonba, . (Yésaya 65:17; Masoola 21:3, 4) A mbôn ki le a ga tugul bawoga inyu boñ le ba niñ hana ’isi ikété paradis.​—Yôhanes 5:28, 29.

 Ngandak mam ikété Bibel i nkwés bé nkaa le ndék ngéda, Djob a ga yônôs minbônga nwé. Ndi u nla badba le: ‘Inyuki Djob a mélés bé mintonba nano?’ Inyu kôhna ndimbhe, béñge vidéô ini le WInyuki Djob a nwas mandutu?