•  Lelaa u ntehe wemede?

•  Inyuki hala a yé nseñ?

•  I jam u nla boñ

•  Kônde añ

•  I jam bisega gwoñ bi nkal

•   I tehe loñge homa nyensô

   “Me noode ba maséé hiki ngéda, me boñok biliya le pala bañ unup. Kinje loñge jam i ba maséé hiki kel”​—Valerie.

•   I tehe béba homa nyensô

   “To ibale me kôhna loñge win, jam li bisu, me kalba le, bebek jam li yé mu mbus tole eem i, maliga bé ma.”​—Rebecca.

•   I neebe mam kikii ma yé

   “I tehe loñge homa nyensô, w‘a waa bé wo nyuu, i tehe béba homa nyensô, w‘a waa bé modop. Jon me, me neebe mam kikii ma yé.”​—Anna.

 Bibel i nkal le “nu a gwé ñem maséé a yé ikété ngand hiki kel.” (Bingéngén 15:15) Ha boo bé, i bôt ba nyoñ bé ngéda inyu tehe béba homa nyensô, ba yoñok niñ Kiki i yé, ba yé maséé. Ba yé ba mbéna bana ngandak mawanda. Ni maliga, njee a ngwés tégbaha ngéda ni mut nu a ntehe ndigi béba homa nyensôna?

 Maliga ma yé le, ngim mam i niñ i ngwel hiki mut, yak i mut a ntehe loñge homa nyensô. Kikii hihéga:

•   Manwin u mbéna nok ma mpôdôl ndigi gwét, mintonba, tole manola.

•   Mandutu ikété lihaa joñ.

•   Bebek u njo sañ lôñni bibomb gwoñ, yak ngim mandutu le u nlama yémbél.

•   Bebek liwanda joñ li ñemnyuu li wéha we nyuu.

 Iloole u joo sañ le u hôya ndigi mandutu ma tole u kahal bok mis moñ mu, kayéle hala a wéés yak we, jon u nlama tééda litehge li kôli. u neebe mam kiki ma yé, hala a ga hôla we le u tehe bañ béba homa nyensô.

•   U lédés bañ mam inyu yoñ.

   Bibel i nkal le: “Inyule mut telepsép a ta bé munu ’isi le a mboñ ndigi loñge, ndi a boñ bé béba.” (Ñañal 7:20) I ta bé inyule u gwé bibomb tole u mboñ dihôha, jon u yé yoma mut, to. Hala a ñunda ndigi le u yé mut binam.

   Neebe mam kiki ma yé: Sal bibomb gwoñ, ndi u bem bañ le u ga ba peles. Kaleb, mañge munlôm wada, a ntoñol le: “Me njo sañ inyu boñ le me hoñol ndigi bañ dihôha tjem hiki ngéda, jon me mboñ biliya i ôt biniigana mu dihôha tjem.”

•   U jôp bañ i pémsan.

   Bibel i nkal le: “Di yila bañ bôt ba ntôñ ndigi bomede, to jôp i pémsan bés ni bés, to tamna bés ni bés.” (Galatia 5:26) I ngéda u mbéñge bi résô sôciô, u ntehe bifôtô bi mangand, le ba bi naña bé we, bebek hala a nla tihba we, a ntééñga ki we. Hala a nla yak tinde we, i tehe mawanda moñ ma ñemnyuu kiki baoo boñ.

   Neebe mam kiki ma yé: Neebe le ba nla bé naña we hiki ngand. Yi ki le bifôtô u mbéñge i résô sôciô i ta bé niñ mut yosôna. Hingonda hiada le Alexis a nkal le:“Munu résô sôciô, bôt ba ñunda ndigi mam malam ba ngwés le u yi i niñ yap. Mana mam mape ba ñunda bé.”

•   Kôp nsañ​—téntén ikété lihaa joñ.

   Bibel i nkal le: “Ibale hala a nla bôña, kiki la nan, ni ba ikété nsañ ni bôt bobasôna.” (Rôma 12:18) U nla bé nyégsa bôt bape i boñ kiki u nhoñol, ndi wemede u nla yoñ moñ makidik. U nla pohol i ba mut a nkôp nsañ.

   Neebe mam kiki ma yé: Boñ biliya i hôyôs mindañ ikété lihaa, hôñôs nsañ, Kiki u yé le u boñ lôñni mawanda moñ. Njohok muda le Melinda a nkal le “Mut nye ki nye a ta bé peles, jon di nla kwambana ngim mangéda. “Bés bon di nla kit kii di ga boñ, le di ga yén nwee tole to.”

•   Bana lem i ti mayéga.

   Bibel i nkal le: “Ni yi ki ti mayéga.” (Kôlôsé 3:15) Ibale u nyi ti mayéga, u ga bok mis moñ i mam malam ma mpémél we i niñ yoñ, iloole u héléé i tjelel i mam mabe ma mpémél we mu niñ yoñ.

   Neebe mam kiki ma yé: To hala kiki u boma mandutu, u hôya bañ i mam malam ma mpémél we i niñ yoñ. Njohok muda wada le Rebecca a nkal le :“Hiki kel, me ntila mu kaat yem jam lilam jada li li mpémél me len. Me ngwés tééda mu ñem wem le to ibale mandutu ma nhañ bé, me gwé ngandak mam malam i me nla hoñol.”

•   Tibil pohol bilôñ gwoñ.

   Bibel i nkal le: “Bilôñ bibe bi ñôbôs bilem bilam.” (1 Korintô 15:33) Ibale u mbéna nhiôm ni bôt ba yahlana , bôt ba mandegle tole i bôt ba ntehe béba homa nyensô, maboñok map ma ga sôk heñel we.

   Neebe mam kiki ma yé: Ngéda mawanda moñ ma mboma ngandak mandutu, hala a nla boñ le ba podba. Boñ kii yosôsôna u nla inyu nit bo, ndi mandutu map ma nlama bé yoña we. Hingonda yada le Michelle hi nkal le: “Di kôli bé lep ngéda yés i hiôm lôñni bôt ba ba ntehe béba homa nyensô..”

 Di niñil i mangéda Bibel i nsébél le “mangéda m’a ba mabe, ma bak ki nledek kiyaga.” (2 Timôtéô 3:1) Baa hala a nlédél we i tééda libak li mut a ntehe loñge homa nyensô ikété nkoñ ’isi i het mandutu ma nai? Añ i pes ini le “Inyuki mandutu ma nai?”