Inyuki ba nsébél Yésu le Man Djob?
Ndimbhe i Bibel
Bibel i mbéna sébél Yésu le “Man Nyambe.” (Yôhanes 1:49) I buk ini le “Man Nyambe,” i ñéba le Djob nyen a yé Nhek ni Lingen li niñ, nyen a bi hek yak Yésu. (Tjémbi 36:9; Masoola 4:11) Bibel i niiga bé le Djob a bi gwal ngim man kiki bôt ba binam ba ngwal bon.
Bibel i nsébél yak biañgel le “bon ba Nyambe.” (Hiôb 1:6) I nkal ki le mut binam nu bisu le Adam, a bé “man Nyambe.” (Lukas 3:38) Bibel i nkal le Yésu a yé ntôô Man Nyambe inyule nyen a yé hégél yé i bisu ni le Nyambe nyemede nyen a bi hek nye.
Baa Yésu a bi bôk a niñ i ngii ilole a nlo hana ’isi?
Ñ. Ilole a ngwéé kiki mut binam hana ’isi, Yésu a bé ndugi añgel i i bé niñ nyoo i ngii. Nyemede a bi kal le: “Me bi nyodi i ngii me sôs.”—Yôhanes 6:38; 8:23.
Djob a bi hek Yésu ilole a nhek bini bihégél bipe. Inyu pôdôl i jam li, Bibel i nkal le:
“A yé . . . mbôkgwéé ikété bihégél gwobisôna.”—Kôlôsé 1:15.
A yé “bibôdle bi mam Nyambe a bi hek.”—Masoola 3:14.
Yésu a bi yônôs i mbañ i i mpôdôl “nu a yé ibôdôl ngéda kôba, ibôdôl i dilo di kôba ni kwañ.”—Mika 5:2; Matéô 2:4-6.
Umbe nson Yésu a bé gwel ilole a nlo munu nkoñ ’isi?
A bééna tel ikeñi nyoo i ngii. A bi pôdôl i tel ikeñi i, i ngéda a bi soohe haana le: “A Ta ti me lipém . . . kiki me bééna lipém ipañ yoñ nkoñ ’isi wo ngi ba.”—Yôhanes 17:5.
A bi hôla Isañ i hek bini gwom bipe gwobisôna. Yésu a bi sal ipañ Djob kiki “loñge ngwelnson.” (Bingéngén 8:30) Bibel i nkal inyu yé le: “Ni njel yé nyen mana mam mape momasôna ma bi héga i ngii ni hana ’isi.”—Kôlôsé 1:16.
Djob a bi gwélél Yésu inyu hek mana mam mape momasôna. A bi hek biañgel bipe, a hek yak ngiinda. (Masoola 5:11) Djob a bi sal ni Yésu nlélém kiki bañga mut maoñ (architecte) i nla sal ni mut maoñ. Architecte yon i ñôt ndap, i boñ ntjega ni minsoñgi nwominsôna. Mut maoñ a ngwélél ntjega u, inyu oñ ndap
A bé Bañga. I ngéda Bibel i mpôdôl niñ i Yésu ilole a nlo hana ’isi, i nsébél nye le “Bañga.” (Yôhanes 1:1) Hala a nkobla le Djob a bé gwélél Man wé inyu legel biañgel manwin tole inyu ti bo biniigana.
I nene ki le Yésu a bé legel yak bôt ba binam manwin ma ma bé lôl yak Djob. Bebek ni njel Yésu, hala wee Bañga, nyen Djob a bi ti Adam bo Éva biniigana i wom Éden. (Bibôdle 2:16, 17) A bé lama ba i añgel i bé éga Lôk Israel i ñoñ, nye ki nyen ba bé lama nôgôl.—Manyodi 23:20-23. a
a Bañga a ta bé mpom añgel Nyambe a bi gwélél inyu legel manwin, ndi a bi gwélél yak biañgel bipe. Kiki ’héga, a bi gwélél biañgel bipe inyu ti Lôk Israel Mbén Môsi.—Minson mi baôma 7:53; Galatia 3:19; Lôk Héber 2:2, 3.
