Ñ, Mbôgi Yéhôva i mbéna hôla ngéda bikuu bi nkwél bôt. Di nti bôt ba yé Mbôgi Yéhôva ni i bet ba ta bé mahôla, inoñnaga ni maéba ma Bibel ma ma yé i kaat Galatia 6:10: “Jon ibale di ntehe pôla, wee di boñok ndigi loñge ikété bôt bobasôna, ndi téntén ikété ba ba yé lihaa li hémle.” Di mboñ ki biliya i lédés i bet bikuu bi nkwél i pes minsôn ni i mbuu.—2 Korintô 1:3, 4.

 Mbus bikuu, mimañ mi likoda i het bikuu bi nkwél bôt bi noode sébél ba bobasôna ba yé mu makoda ma libôga li inyu yi too ba yé mbôô, ni inyu yi mambe mahôla ma nla bana ngôñ. Mbus, mimañ mi ti hikuu hi loñ ñañga u mam ma mbôñ toi ni u mahôla ba nti.

 Ibale makoda ma libôga ma nla bé lona mahôla ma mbéda, Juu li bakena ntôñ li nyoñ mam i moo. Bikristen bi hiai bisu bi bi boñ nlélém ngéda njal ikeñi i bi pam. (1 Korintô 16:1-4) Hikuu hi loñ hi yé hi ntéé bon ba muu inyu tjek mam ma mbéñge mahôla. Mbôgi Yéhôva i biloñ bipe i nti ngéda yap ni nkus wap ni ñem wap wonsôna inyu hôla.—Bingéngén 17:17.

 Makébla ma ba ñéble dikuu di biloñ bi, ma nhôla ndugi i bet bikuu bi nkwél. (Minson mi baôma 11:27-30; 2 Korintô 8:13-15) Kiki ba nsaa bé i bet ba nsal, moni mi nhôla ndigi inyu somb gwom bi mbéda. Di yoñ yihee ngandak ni lelaa di ngwélél moni.—2 Korintô 8:20.