Mbôgi Yéhôva i bi gwélél ngandak ngobol i Bibel inyu yigil yap i Bibel. Yak ikété dilémb het ngobol Bibel i yé ngandak, di ndiihe, di gwéhék ki gwélél ngobol i Bibel le Les Saintes Écritures. Traduction du monde nouveau (Bitilna Bipubi. Ngobol i mbok yondo.) inyule i gwé jôl li Djob, ni le biniigana gwé bi yé ntiik, bi nôga ki loñge loñge.

•   I ngwélél jôl li Djob. Batila Bibel bahogi ba bi hôs ngéda ba bi tjél ti jôl li Djob lipém li li kôli ni jo. Kiki hihéga, ngobol i Bibel yada i nsima môl ma iloo 70 ma bôt ba ba bi yoñ ngaba i pémés yo. Ndi, nlélém ngobol won u bi héya homa nyensôna, jôl li Nwet matila ma Bibel le Yéhôva Djob!

   Maselna ni la, Bibel yés le La Traduction du monde nouveau (Ngobol i mbok yondo) i ntimbis jôl li Djob dikôô di bahoma i het li bé ikété minlômbi mi bikaat mi batila Bibel. Tolakii i bet ba bi tila yo, ba bi yelel bé môl map.

•   Biniigana gwé bi yé ntiik. Ngobol Bibel yosôna bé yon i ntimbis ñwin u Bibel kiki u bé ikété minlômbi mi bikaat. Kiki hihéga, ngobol Bibel yada i nkobol Matéô 7:​13 le: “Bé jublana nwemel ntitigi, inyule nwemel u bee hié u yé nkeñi, njel ki i néhi, i nke yimil.” Ndi, ikété minlômbi mi bikaat mi batila Bibel, ba bi gwélél buk le “tjiba,” ha “bee hié” bé. Bebeg bakobol ba bi ha i buk ini le “bee hié” inyule ba bé hémle le bibéba bi bôt bi nlama son njonok mba ni mba ikété bee hié. Ndi, Bibel i niiga bé hala. Jon, La Traduction du monde nouveau (Ngobol i mbok yondo) i nkobol i homa nu loñge: “Bé jublana nwemel ntitigi, inyule nwemel u yé nkeñi, njel ki i néhi, i nkena i tjiba.”

•   Biniigana bi nôga loñge loñge. Ngobol ilam i nlama ndik bé bana biniigana bi yé ntiik, ndi i nlama ki bana biniigana bi bi ntomb i nok. Di yoñ hihéga hiada. Ikété kaat Rôma 12:11, ñôma Paul a bi gwélél buk i i nkobla le “ ni pél ikété mbuu.” Ndi, i len ini i, buk ini i nôga ha bé ni Ngisi ba mpot nano, ndi La Traduction du monde nouveau (Ngobol i mbok yondo) i ngwélél bibuk bi ntomb i nok. I nkal bikristien le: “Loña ikété mbuu.”

 U héya le i ngwélél jôl li Djob, i nti biniigana bi yé ntiik ni bi bi nôga loñge loñge, La Traduction du monde nouveau (Ngobol i mbok yondo) yo i gwé ki mahéñha mape: Di nkap yo ibabé le bôt ba somb. Jon, didun di bôt di nla añ Bibel ikété dilémb tjap​—yak i bet ba ta bé le ba kôs Bibel ni njel ipe.