Libii li Mbôgi Yéhôva li ta bé ngand i binene, li yé ngand i ntina lipém i het ba nti nkwel u Bibel u u mbéñge libii. I mbus ngand libii, babiina ba yé le ba naña bôt i je ni i nyo lôñni bo. a Hala a yé loñge i yi le Yésu nyemede, i bibôdlene bi nson wé, a bé i ngand libii yada i tison Kana.​—Yôhanes 2:1-11.

•  Lelaa ngand libii i ntagbe?

•  Hee homa mabii ma Mbôgi Yéhôva ma ntagbene?

•  Njee a nla ke i ngand libii?

•  Baa mbot ngand i tôbôtôbô i yé?

•  Baa babiina ba nyoñ makébla?

•  Baa i bôt ba nlo i ngand ba ntôômana bitômblô gwap inyu mbôô u babiina?

•  Baa ba yé le ba leñ babiina kôn tole gwom bipe?

•  Baa bijek ni maok bi yé mu ngand libii?

•  Baa yak nsik tole masak bi yé mu ngand libii?

•  Baa Mbôgi Yéhôva i ntégbaha ngand mbigda i kel libii?

 Jam li nlôôha nseñ i ngand libii li yé nkwel u 30 ma manut Mbôgi Yéhôva yada i nti. I loñge nkwel u, u mbéñge babiina; u ñunda lelaa babiina ba yé le ba noñ maéba ma Bibel inyu boñ le ba bana niñ maséé i libii jap, ni le libii jap li nom.​—Éfésô 5:33.

 I ngandak biloñ, ngomin a neebe le Mbôgi Yéhôva i at mabii. Ha ngéda i, bebee ni mamélél ma nkwel libii, babiina ba nyegna likak li libii. Ba yé ki le ba hana dilonde. I mbus, nti nkwel a nlegel le ba yé nwaa bo nlôm.

 I biloñ bipe, mbén i nkal le mut ngomin nyen a nlama at mabii. I maada ma, ma mbéna tagbe ndék ngéda ilole nkwel u libii u mbôdôl. Ibale nwaa bo nlôm ba nyegna bé likak li libii i bisu bi mut ngomin, ba nla boñ hala i mamélél ma nkwel. Ibale ba bak ba yegna likak li libii i bisu bi mut ngomin, ba nla tiimba boñ hala i ngéda nkwel u libii, ndi ba gwélél bibuk bi ñunda le ba mbôk ba yegna likak li libii i bisu bi ngomin. I mbus nkwel, ba nsoohene babiina le Djob a sayap libii jap.

 Ngandak Mbôgi Yéhôva i ngwés i ntégbaha libii jap i Ndap Ane yada, ibale ba yé le ba boñ hala. b Ibale babiina ba nkôôba le ba nleege bôt, ba ga ke homa numpe.

 Ibale libii li yé i Ndap Ane, tonjee a nla ke nyoo, hala wee ba ba yé Mbôgi Yéhôva, ni ba ba ta bé Mbôgi Yéhôva. Ibale babiina ba ngwés lôôs ngand, bon ba ga pohol i bôt ba nlama ba i ngand yap.

 I ngéda libii li yé i Ndap Ane, ngim mbot i tôbôtôbô i ta bé, Mbôgi Yéhôva i mboñ biliya i noñ maéba ma Bibel inyu mahabga: ba mboñ biliya i haba mambot ma ma kôli, ma ma ñunda bé to môñga map ma nyuu. Babiina ba yé ba ba maséé i ngéda yak i bôt ba naña ba mboñ nlélém jam. (1 Timôtéô 2:9) Hiki mut a nlama ki noñ i matiñ ma i ngéda ngand, ibale babiina ba nkôôba le ba ga tégbaha ngand.

 Bibel i nti bés makénd i bana lem i kap. (Tjémbi 37:21) Mbôgi Yéhôva i yé maséé i ti ni i yoñ makébla. (Lukas 6:38) Ndi babiina ba ba yé Mbôgi Yéhôva ba mbat bé le ba ti bo makébla, ba nsima bé to môl ma bôt ba ba nti bo mo. (Matéô 6:3, 4; 2 Korintô 9:7; 1 Pétrô 3:8) Hala a nkiha bé ni i yom Bibel i nkal, hala a yé ki le a tééñga bôt ba ba yé i ngand.

 To. Mbôgi Yéhôva i ntôômana bé bitômblô inyule i liboñok li, li nlôl ni bihaiden. c Mbôgi Yéhôva i ngwélél manjel mape inyu unda babiina le ba ngwés le libii jap li nom.

 To. I biloñ bihogi, i bôt ba yé i ngand libii ba gwé lem i leñ babiina kôn, tole gwom bipe hala. Bôt ba mboñ hala inyule ba hoñol le hala a ga lona babiina masoda, ni le hala a’ boñ le ba nom ntandaa ngéda, hala a’ boñ ki le ba ba maséé. Ndi Mbôgi Yéhôva i ntjél bilem bi bi umne i mam ma téé bé bôt ba nhoñol. Inyu hala nyen ba nkal bé mut le “masoda ma ba ni we”, inyule ba nyi le hala a nkiha bé ni matiñ ma Bibel.​—Yésaya 65:11.

 I ngéda nkwel u libii u ntagbe i Ndap Ane, ba nkena bé bijek, to maok nyoo. Babiina bahogi ba mpohol i tégbaha ngand i mbus nkwel i Ndap Ane, ha ngéda i nyen bijek ni maok bi yé. (Ñañal 9:7) Ibale ba nkit le ba nti i bôt ba nlo i ngand maok, ba nyoñ yihe le maok ma loo bañ hihéga, ba nti ndik mo i bôt ba gwé nwii inyu nyo maok.​—Lukas 21:34; Rôma 13:1, 13.

 Ibale babiina ba mpohol le ba mbana ngand, ba yé le ba pohol le nsik ni masak bi ga ba. (Ñañal 3:4) Ba nlama pohol minsik minlam mi mbok yap mi mi nlémél bo, ndi mi nlama bé tééñga kiññem i bôt ba nlo i ngand. Ba mbéna ki tuk tjémbi i Ndap Ane, di di umne i Bibel.

 Kiki matiñ ma Bibel ma nkal bé le kristen i nlama bigda kel yé i libii, ndi to sôñga ma nsôñga bé i boñ hala, jon babiina ba ba yé Mbôgi Yéhôva bon ba mpohol too b’a bigda kel yap libii tole to. Ibale babiina ba mpohol le ba ga bidga kel yap libii, ba nla boñ hala bo iba ndigi, tole ni mawanda map loñni mahaa map.