Ndigi i bet ba ñañal ñañ nlam u Ane Djob hiki sôñ, bon di nsoñgol kiki Mbôgi Yéhôva. (Matéô 24:14) Hala a nkobla le di nsoñgol i bôt ba bi sôblana kiki Mbôgi Yéhôva, ndi yak i bet ba ntéé likalô to ibale ba yé ngi sôblana.

To. Ikété ntôñ wés, moni bé nwon mi mboñ le di soñgol mut kiki Mbôgi Yéhôva tole di ti nye nson u tôbôtôbô. (Minson mi baôma 8:​18-​20) Ni maliga, libim li makébla li mbôña ibabé le ba yi nwet a nti. Hiki Mbôgi Yéhôva i nti ngéda yé, ngui yé ni bigwel gwé bi moo inoñnaga ni la yé inyu nit nson wés ni nkoñ isi wonsôna.​​—2 Korintô 9:7.

Hiki sôñ, Mbôgi Yéhôva i nti ñañga wap u likalô i likoda jap. Mut a nyéksa bé bo i ti ñañga u.

Makoda ma nkot miñañga mi, ma ep nwo i hikuu hi loñ. Mbus, hikuu hi loñ hi ep ñañga u loñ i hikuu hiés hikeñi.

I lisuk li hiki ñwii nson, a ba mpémés nsoñgi u batéé likalô inyu ñwii ni inyu hiki loñ. Mbus, ba nkot minsoñgi mi biloñ gwobisôna inyu yi Mbogi Yéhôva yañen i yé nkoñ isi wonsôna. Ñañga u hiki loñ lôñni miñañ mi likalô mi mpam ikété kaat ni hop Pulasi le Annuaire des Témoins de Jéhovah (Kaat i ñwii i Mbôgi Yéhôva). Miñañ mi, mi nti bés makénd kiki mi bé ti bikristen bi hiai bisu makénd.​​—Minson mi baôma 2:​41; 4:4; 15:3.

To hala kii di nsoñgol bé bo ikété nsoñgi u Mbôgi Yéhôva, ba yé malo malam i makoda més. Ngandak ikété yap i nlo i Mbigda i nyemb Yésu di nlôôs hiki ñwii, jon di nla yi nsoñgi wap ibale di nyoñ nsoñgi u bôt bobasôna ba nlo i Mbigda i nyemb Yésu, di héya nsoñgi u Mbôgi Yéhôva yomede. I ñwii 2022, nsoñgi u bôt bobasôna ba bé i Mbigda i nyemb Yésu u bi pam 19 721 672.

Ngandak i nlo bé makoda més, ndi i nigil Bibel ni bés yañga i mambai map. I ñwii 2022, nsoñgi u bôt ba bi nigil Bibel ni bés hiki sôñ u bé yom kiki bo 5 666 996. Ngim mangéda, ba nlôôs yigil i ngandak bôt nlélém ngéda.

Inyu bana minsoñgi nwé, ngomin a mbat bôt inyu yi imbe base ba yé. Kiki hihéga, hikuu hi bôlô hi ngomin Amérika hi nkal le sômbôl yap ngéda ba mboñ ñañga, i yé le, bôt ba kal bo imbe base ba nhoñol le ba yé. Jon nsoñgi ngomin a nti, u ta bé yom i yé toi, ndi yom bôt ba nhoñol le ba yé. Maselna ni hala, bés di nsoñgol kiki Mbôgi Yéhôva, ndigi bôt ba ntéé toi likalô, ba tinak ñañga wap, ha bôt ba nkadba bé nkadbaga le ba yé Mbôgi Yéhôva.