Bés Mbôgi Yéhôva, di nliya i noñ biniigana Yésu a bi niiga, ni bi baôma bé ba bi bii i bisélél. I yigil ini, i ntoñol i sem kwep biniigana gwés bi bisu.

1.   Djob. Di mbégés ndik bañga Djob nu a yé Nungingii, Nhek, nyen jôl jé le Yéhôva. (Tjémbi 83:19; Masoola 4:​11) A yé Djob li Abraham, li Môsé, ni li Yésu.​—Manyodi 3:6; 32:11; Yôhanes 20:17.

2.   Bibel. Di ntehe Bibel kiki ñwin u Djob a bi ti bôt ba binam. (Yôhanes 17:17; 2 Timôtéô 3:​16) Biniigana gwés bi niñne i ngii 66 bikaat bi Bibel gwobisô, hala wee “Malômbla ma Kwañ” ni “Malômbla ma Yondo.” Malét nkeñi le Jason D. BeDuhn ngéda a bi tila le “biniigana ni maboñog ma Mbôgi Yéhôva ma umne i jam Bibel i nkal toi, ha bé i jam ba nhoñol le Bibel i nlama kal.” a

    Tolakii di neebe Bibel yosô, di ta bé bôt ba nok Bibel buk i ngii buk. Di nyi le batila Bibel bape ba bi gwélél dihéga tole biyimbne, ni le di nlama bé yoñ gwo buk i ngii buk.​—Masoola 1:1.

3.   Yésu. Di noñ biniigana ni ndémbél i Yésu Kristô, di tinak ki nye lipém kiki Ntohol wés ni Man Djob. (Matéô 20:28; Minson mi baôma 5:​31) Jon, di yé bikristen. (Minson mi baôma 11:26) Ndi, di bi nigil ikété Bibel le Yésu a ta bé Djob Nungingii ni le Bibel i niiga bé Trinitas.​—Yôhanes 14:28.

4.   Ane Djob. Ane Djob i yé ngembe énél i ngii, ha ngim jam ikété miñem mi bikristen bé. Ane Djob yon y’a héñha biane bi bôt ba binam, i yônôs ki bitééne bi Djob inyu hisi. (Daniel 2:​44; Matéô 6:​9, 10) Ndék ngéda, Ane Djob i ga boñ i mam ma, inyule mbañ i Bibel i ñunda le di niñil i “dilo di nsôk.”​—2 Timôtéô 3:​1-5; Matéô 24:​3-​14.

   Yésu a yé Kiñe i Ane Djob, i i yé i ngii. A bi bôdôl ane i ñwii 1914.​—Masoola 11:15.

5.   Tohi. I sesema Yésu a bi ti kiki binoñ, i nla kobol bés i mok mi béba ni nyemb. (Matéô 20:28; Minson mi baôma 4:​12) Inyu kôhna bisai bi nlôl ni i sesema i, bôt ba nlama ndik bé hémle Yésu, ndi ba nlama ki lona mahéñha i niñ yap ni kôs sôble. (Matéô 28:19, 20; Yôhanes 3:​16; Minson mi baôma 3:​19, 20) Minson mi mut nwon mi ñunda too a gwé bañga hémle. (Yakôbô 2:24, 26) Ndi, mut nye ki nye ni biliya gwé a nla bé kôhna tohi​—inyule tohi i nlôl ni ‘konangoo i Djob.’​—Galatia 2:​16, 21.

6.   Ngii. Yéhôva Djob, Yésu Kristô, ni biañgel bi tiñi ni Djob; ba nyééne i ngii. b (Tjémbi 103:19-​21; Minson mi baôma 7:​55) Ndik ndék bôt ba binam​—144 000​—b’a tuglana inyu ke inyu énél i ngii ni Yésu ikété Ane Djob.​—Daniel 7:​27; 2 Timôtéô 2:​12; Masoola 5:​9, 10; 14:​1, 3.

7.   Hisi. Djob a bi hek hisi inyu ba liyééne li bôt ba binam mba ni mba. (Tjémbi 104:5; 115:16; Ñañal 1:4) Djob a ga sayap bôt ba manôgla ni mbôô i libak li yôni ni niñ i boga ni boga ikété hisi hi ma yila paradis.​—Tjémbi 37:11, 34.

8.   Béba ni mandutu. Bi bi bôdôl ngéda añgel i Djob yada i bi ndogbene nye. (Yôhanes 8:​44) I añgel i, nu ba bi sébél le “Satan” ni “Nsohop” i mbus ndok yé, a bi kwés babiina ba bisu nkaa le ba noñ nye mu i ndok yé, nsaa ba bi bumbul u bé béba ngandak inyu bon bap. (Bibôdle 3:​1-6; Rôma 5:​12) Inyu timbhe minsohi mi Satan, Djob a bi nwas le béba ni mandutu ma ba, ndi a ga neebe bé le ma kee ni bisu.

9.   Nyemb. Minwok mi bôt mi niñ ha bé. (Tjémbi 146:4; Ñañal 9:​5, 10) Ba nson bé njonok i bee hié.

    Djob a ga témbna didun ndi didun di bôt di bi wo i niñ ni njel bitugne. (Minson mi baôma 24:15) Ndi, i bet b’a tjél nigil manjel ma Djob i mbus bitugne gwap, ba ga tjiba mba ni mba ngi botñem yo ki yo inyu bitugne.​—Masoola 20:14, 15.

10.   Lihaa. Di noñ litiñ li bisu li Djob inyu libii: Adna ipôla munlôm ni muda wada ndigi, ni kunde i bos ndik inyu njom yada le ndéñg. (Matéô 19:​4-9) Di yé nkwoog nkaa le i pék i nlébna ikété Bibel i nhôla mahaa i too.​—Efésô 5:22–​6:1.

11.   Bibégés gwés. Di mbégés bé mbasa, to bisat, to bititii bipe gwo ki gwo. (Ndiimba Mbén 4:​15-​19; 1 Yôhanes 5:​21) Di tehe mam ma tôbôtôbô ma ma mbéñge bibégés gwés:

    •   I soohe Djob.​—Filipi 4:6.

    •   I añ ni nigil Bibel.​—Tjémbi 1:​1-3.

    •   I soñda i ngii mam di nigil ikété Bibel.​—Tjémbi 77:13.

    •   I bomna inyu soohe, nigil Bibel, tôp tjémbi, i pahal hémle yés, ni ti bilôk bikéé gwés bipe makénd.​—Kôlôsé 3:​16; Lôk Héber 10:23-​25.

    •   I añal “ñañ nlam u Ane.”​—Matéô 24:14.

    •   I hôla i bet ba gwé ngôñ ni mahôla.​—Yakôbô 2:​14-​17.

    •   I oñ ni bôñgôl mandap ma Ane ni mandap més mape di ngwélél inyu nson wés u niiga Bibel ikété nkoñ isi wonsôna.​—Tjémbi 127:1.

    •   I lôl i bôt ba bikuu bi nkwél, mahôla.​—Minson mi baôma 11:27-​30.

12.   Ntôñ wés. Di yé ntjegek makoda makoda, hiki likoda li bakna juu li mimañ inyu éga jo. Ndi, mimañ mi ta bé kiki baéga base, ba nkôs bé ki to nsaa. (Matéô 10:8; 23:8) Di nsul bé (hala wee di nti bé jôga jada ikété jôm), to njañgi di tah di mboñ bé i makoda més. (2 Korintô 9:7) Môl ma bôt ba nti makébla ma njômbi ñem inyu nit nson wés ma nyiba bé.

     Juu li Bakena ntôñ, hala wee ndék minhôôlak mi bôt mi mi nsal i hikuu hikeñi hiés, li ñéga Mbôgi Yéhôva i nkoñ isi wonsôna.​—Matéô 24:45.

13.   Adna yés. Di gwé minlélém mi biniigana ikété nkoñ isi wonsôna. (1 Korintô 1:​10) Di mboñ ki biliya bi ngui i keñgle mbagla matén, biloñ, ni ipôla ngwañ ni diyeyeba. (Minson mi baôma 10:34, 35; Yakôbô 2:4) Ndi to hala, adna yés i nsôña bé bés i pohol ngim mam ni bés bomede. Hiki Mbôgi Yéhôva i nyoñ makidik inoñnaga ni kiññem yé, i a niiga ni Bibel.​—Rôma 14:​1-4; Lôk Héber 5:​14.

14.   Maboñog més. Di nliya i unda gwéha ikété maboñog més momasôna. (Yôhanes 13:34, 35) Di nkeñgle maboñog ma ma mbébél Djob, kiki i bep gwélél matjél ni njel minkum mi matjél. (Minson mi baôma 15:28, 29; Galatia 5:​19-​21) Di yé bôt ba nsañ, di nyoñ bé ki to ngaba i gwét. (Matéô 5:9; Yésaya 2:4) Di nti bôt ba ngomin lipém i biloñ i het di niñil, di nôglak ki mambén ma loñ ngéda ma nkolba bé ni mambén ma Djob.​—Matéô 22:21; Minson mi baôma 5:​29.

15.   Maada més ni bôt bape. Yésu a bi ti ini mbén le: “W’a gwés mut woñ libôk kiki wemede.” A kônde ki le bikristen ‘bi ta bé ba nkoñ isi.’ (Matéô 22:39; Yôhanes 17:16) Jon, di mboñ biliya i ‘boñ ndigi loñge ikété bôt bobasôna,’ ndi di nyoñ bé ngaba yo ki yo ni mam ma m’bô, di keñglege ki maada mo ki mo ni bibase. (Galatia 6:​10; 2 Korintô 6:​14) Ndi, di nyan bé makidik ma bôt bape mu i mam ma.​—Rôma 14:12.

 Ibale ni gwé mambadga mape inyu biniigana bi Mbôgi Yéhôva, ni nla ke ni bisu i kéñbaha yi nan i site internet yés. Ni nla ki sébél, tole tilna hikuu hi loñ hiés hiada. Ni nla ke makoda més ikété Ndap Ane i i yé bé bebee, tole ni nla kwélés Mbôgi Yéhôva yada i i yé libôga linan.