Virginia nu a yé Mbôgi Yéhôva a gwé kon ba nsébél ni hop Pulasi le syndrome de verrouillage. A nyiñgha bé. A nla nok ni tehna, a nla yibil mis ni yip mo, a nla yak nyiñgis ño wé. A nla bé pot to je. A bi gwéé mbôô, ni ngui yé yosôna. Ndi kegla yada i nwii 1997, a bi nok njôghe ikeñi i mbus ño wé. Nlô wé a bi kena nye i dokta, i nlélém kôkôa a jôp i kôma. A bi pam i kôma i mbus sonde iba, nyuu i bé la ha bé nyiñgha, ba pepek nye. I mbus ndék dilo, a bé la ha bé bigda jam jo ki jo, to mut nye ki nye.

Virginia a ntoñol i jam li bi tagbe i mbus ngéda. “Ndék ni ndék, me bi bôdôl bigda ngim mam. Me bi soohe ngandak. Me bé sômbôl bé wo kayéle lok yem i yila man nyuu. Inyu bana ñem ngui, me bé noode bigda minlôñ mi Bibel.

“I mbus, bidokta bi bi héya me i het ba ntééda i bet ba njôp i kôma. I mbus le me bi tégbaha sôñ isamal i madokta ni i mandap ma bibôk bi bôt, ba kal me le me huu i mbai yem. Me bé bôk, me ban-ga ngôñ ni mahôla inyu mam momasôna. Me bi nimis makénd! Me bé nôgda wee me gwééne ha bé Yéhôva ni bôt bape nseñ. Me bé tôñ ngandak inyule me bé la ha bé yoñ ndun ni lok yem.

“Me bi bôdôl añ miñañ mi bilôk bikéé bi bi bé boma minlélém mi mandutu kiki me, me hel inyu mam momasôna ba bé la boñ inyu Yéhôva. Sôk i nsôk, me bi bok mis mem i ngii mam me bé le me la boñ. Ilole me nkwo kon, me bé tégbaha ndik ndék ngéda inyu mam ma mbuu. Nano hiki kel, me gwé ngéda yem yosôna. Jon iloole me lehel ñem, me bi bok mis i maada mem ni Yéhôva.

“Me bi nigil i gwélél ordinater. Kei i i noñ minyiñgha mi ño wem yon i nhôla me. I bé wéés me, ndi i sélél i i bé hôla me i nigil Bibel ni i tééne bôt bape likalô ni njel biléta yak ni internet. Inyu kwel ni bôt bape, me bééna libam ni alphabet ntilga mu. I mut a bé ni me a bé a hihe bañga yada i alphabet. I ngeñ a nhihe bé léta i alphabet i i yé ilam, me bé me yibil mis mem makeñi; i ngeñ a nyibil léta i i yé ilam, me nyip mis. Di bé tiimba nlélém jam inyu kôhna bibuk ni minlôñ. Lôk kéé i bôda i i bé tégbaha ngandak ngéda ni me i bé hégda i yom me nsômbôl kal. I ngeñ ba bé ba ha béba buk, hala a bé a nôlha bés.

“Me yé maséé i yoñ ngaba i minson ma likoda. Nano me mbéna yoñ ngaba i makoda ni njel internet. Me nla tila mandimbhe mem, mut numpe a añ mo i ngéda ba mbat mambadga. Me yé me kodba yak ni juu jés li likalô inyu béñge JW Nkuu Biliñgeliñge hiki sôñ. *

“Hala a yé 23 nwii nano le me nkon syndrome de verrouillage. Ngim mangéda me nkônha ngoo. Ndi me nyémbél mahoñol ma ni njel masoohe, makoda, ni i pagap ni mam ma mbuu. Jon, ni mahôla ma likoda, me yé nsañal nu pes ngéda hala a yé nwii minsamal. Me noode yila ndémbél ilam inyu lok yem Alessandro, nu a yé mbiibaga ni nu a yé mañ u likoda. Nye ni nwaa ba yé basañal.

“Me mbéna ôt pék mu mam me ga boñ i paradis. Jam li bisu me nsômbôl boñ li yé i gwélél kiñ yem inyu añle bôt bape njee a yé Yéhôva. Me gwé ngôñ i ke ni makôô ipañ hiléléba hi mbai inyu memle bihégél. Kiki ba njés me ni bituyau hala a nloo môm ima ma nwii, me nla bé ket puma me nyuñ. Maliga ma yé le, kiki me yé ngond Italia, me mbem ngéda me ga je bijek bi loñ yem, kiki pizza!

“Botñem i tohi’ i bi tééda mahoñol mem. (1 Tésalônika 5:8) I hégda memede i mbok yondo i nkônha me maséé tolakii me gwé minwaa, me yé nkwoog nkaa le mi ga mal ndék ngéda. Ñ, me ga waa bé bem ‘bañga niñ’ i Yéhôva a bi bôn le a ga ti bés ni njel Ane yé.”​—1 Timôtéô 6:19; Matéô 6:9, 10.