Me bi néñél i tison Tampere i loñ Finland, i loñge libôga li bak ki nwee. Lihaa jem li bé gwés bé mam ma base, ndi to hala ba bi niiga bés bilem bilam di bak boñge. Mama yem a bé ngond Jaman, ngéda me bé mañge, me bé me ke i noi yak basôgôl bem i Jaman Nwelmbok.

 Ibôdôl me mañge me bé gwés hianda nyuu ngandak. Ngéda me bééna 14 nwii me bi boñ mintén mi mintuk nwominsôna, ha nyen me bi sôk pohol ntuk Ténis. I ngéda me bi pamna 16 nwii, me bé hianda nyuu ngélé iba tole iaa hiki kel​—me bé sal ngélé iba ni niiga, kôkôa me tuguk metama. Me bé gwés tuk ténis ngandak inyule i bé hôla me i kôôba mahoñol ni nyuu yem inyu mintuk minkeñi. To hala kii me bééna lem i tégbaha loñge ngéda ni mawanda mem, me bé ôt bé me hibañga to hiôô moog inyule ténis i bé jam li bisu i niñ yem.

 Ngéda me bi pamna 17 nwii, me bi jôp i ATP het ba bé boñ mintuk mi pémsan. a I mbus me bi kôhna ngandak bibom, me yiba ni loñ yosôna. I ngéda me bi pamna 22 nwii, me bé wada ikété 50 ma batuk ténis bakeñi ba nkoñ ’isi.

 I buk ini le ATP i nkobla le ntôñ u batuk ténis bakeñi. U ntôñ u nwon u ntjek mam ma mintuk mi batuk ténis bakeñi ba bôlôm bobasôna. Wo ki won u ntjek mintuk minkeñi nwominsôna, u mbom i bôt ba yémbél ntuk ikepam lisuk, ba nti bo moni ba bédés ki bo tel mu nsoñgi batuk ténis. Tel i mut yon i boñ le ba ha nye i nsoñgi u batuk ténis bakeñi ba nkoñ ’isi.

 Nwii ndi nwii me bi hiôm ni nkoñ ‘isi wonsôna inyule me bé ntuk ténis nunkeñi. Me bi tehe bahoma balam, ndi me bi sôk léba le nkoñ ‘isi u yé nyonok ni ngandak mandutu kiki bo manola, li ôt hibañga, ni ngim mam ipe kiki bo bôt ba ba ôbôs nkoñ ‘isi. Kiki hihéga, hala a bi tééñga me i ngéda ba bi kal me le me nla bé ke i ngim bitison i loñ Amérika inyule manola ma nlôôha nyoo. Tolakii me bé boñ mam ma bé lémél me, me bé nôgda ikété yem le ngim yom i bé héñél me.

 Mbôgi Yéhôva i bi bôdôl nigil Bibel ni liwanda jem li muda le Sanna. Hala a bé nôlha me i tehe nye a nigil Bibel, ndi hala a bé tééñga bé me. Di bi biiba i nwii 1990, i nwii u bé noñ ha a yila Mbôgi Yéhôva. Inyu yem, base i bééna bé nseñ, to hala kiki me bé hémle le Djob a yé. Hala a bi hôñlaha me mbômbô yem nu a bé ngond Jaman, a bééna lem i añ Bibel, a bi niiga yak me lelaa ba nsoohe.

 Kel yada, me ni Sanna di bi ke i yuuga babiina ba ba bé Mbôgi Yéhôva, nlôm, Kari, a bi unda me mbañ i mpémél i kaat 2 Timôtéô 3:​1-5 i i mpôdôl “dilo di sôk.” Hala bi lôôha tihba me, inyu hala nyen me bi pam i nok inyuki nkoñ ’isi u yé nyonok ni ngandak mandutu. I yokel nu di bi lôôha bé pôdôl mam ma base. Ndi ibôdôl ha i ngéda i, béhna Kari di bôdôl bana minkwel mi Bibel, me bi sôk tehe le mam momasôna me bé nigil ma bé toi maliga. Kiki me bé me pégi, me hiômôk ngandak hala bé boñ le me ni Kari di bé la bé kwel hiki ngéda, ndi a bi waa bé. To hala kii di bi pam bé i yén le di nigil, a bé tilna me bikaat inyu timbhe mabadga me bé bat nye. Bibel i bi hôla me i kôhna mandimbhe i mambadga makeñi ma niñ. Ndék ni ndék me pam i yi le​—ño nkwel u Bibel u yé le Ane Djob i ga yônôs sômbôl yé hana ’isi. I yi le jôl li Djob le Yéhôva, ni tehe i mam malam a bi bôñôl bés hala a bi lôôha tihba me. (Tjémbi 83:19) Ndi i yom i bi lôôha tihba me i yé bitelbene a bi yoñ inyu binoñ​—inyule bi yé yimbne i gwéha ikeñi i Djob inyu yés, inyule mut nye ki nye a bi nyégsa bé nye i boñ hala. (Yôhanes 3:​16) Me bi pam i tehe le me nla bana nsima nkeñi i ba liwanda li Djob ni i niñ i boga ni boga ikété paradis i het nsañ u ga ba. (Yakôbô 4:8) Me bi bôdôl badba le: “Lelaa me nla ti Yéhôva mayéga?”

 Me bi yoñ ngéda i tibil béñge niñ yem. Bibel i bi hôla me i nok le bañga maséé i nlôl ngéda u nti, jon me bi nôgda ngôñ i yis bôt bape i mam me bé nigil. (Minson mi baôma 20:35) Kiki me bé ntuk ténis nunkeñi, me bé yén haa ni mbai yem iloo 200 dilo inyu ngim nwii inyule me bé hiôm inyu mintuk mi pémsan. Lihaa jem jolisôna li bé nit me​—lihianda jem li nyuu, ntjega wem u ngéda ni bôlô yem. Me bi sôk nôgda le i bé béda le me héñha.

 Me bé yi le hala a ga nôôga bé loñge le me nwas bôlô i i nti lipém ni moni kiki ini inyu base. Ndi me bé yi le nsima me bééna i yi Yéhôva ni botñem i niñ boga i béne me nseñ iloo to umbe ntén bom me bé le me kôhna i ntuk ténis, jon hala a bi lédél bé me i yoñ makidik. Me bi kit le m’a emble bé mut to wada mu jam li​—me bi mal yoñ makidik mem. Nlôñ Bibel u u bi hôla me i lédés to hala kii bôt bobasôna ba bé tinde me le me ke ndigi ni bisu ni bôlô ténis u yé kaat Tjémbi 118:6 i i nkal le: “Yéhôva a yé ngam yem, m’a kon bé me woñi. Mut binam a nla boñ kii me?”

 Inyu yem, i bi béda bé le ngim bikuu i tôbôtôbô i kwél me le ndi me kahal hoñol le Djob a yé. Me ntehe bé to memede kiki mut a bé le a yéñ maliga. Me bé nôgda le niñ yem i kôli, me bé yéñ bé yom ipe. I ngéda me bé bem bé, maliga ma bi jôp i niñ yem wengoñle ma bé bem me; ha ni yen me bi léba le niñ i gwé ngim njômbi, ni ki le matiñ ma Bibel ma bi kônde lémés niñ yem iloo kiki me bé le me hégda! Nano lihaa jem li édi iloo kiki li bé behee. Me yé ki maséé i tehe le bon bem bôlôm bo baa ba noñ ndémbél yem​—he kiki ntuk ténis nunkeñi bé, ndi kiki Kristen.

 Me ngi gwéhék ténis. I nwii mini nwominsôna me bi sal ngandak bilôlô bi bi gwé maada ni ténis inyu bana likala li kel, kiki bo, niiga bôt i tuk ténis ni kindak i suklu i ténis. Ndi niñ yem i umne ha bé i mintuk. Behee, me bé lôôs ngandak ngeñ i hianda nyuu inyu yila ntôô ntuk ténis. Nano me yé nsañal nu ngéda yosôna. Me yé maséé i gwélél ngéda yem i hôla bôt bape i yi matiñ ma Bibel ni i bii mo i bisélél, mon ma bi hôla me i boñ mahéñha i niñ yem. Jam li nlôôha kônha me maséé li yé le maada mem ni Yéhôva mon ma yé jam li bisu i niñ yem ni le me ñañle bôt bape botñem me gwé inyu bilôl.​—1 Timôtéô 6:​19.