Me bi gwéé i San Juan, man tison i nkoñ Chiapas, i loñ Meksika. Lihaa jem li yé bôt ba Chol i litén li Maya. Bagwal bem ba bééna 12 bon, me bé man nu nyônhe batan. Ngéda me bé mañge me ni lôk kéé di bi nigil Bibel ni Mbôgi Yéhôva. Ndi ngoo le i ngéda me bé mañge wanda me bi ha bé matiñ ma Bibel i bisélél.

 Ngéda me bi pamna 13 nwii, me bi bôdôl ôt hibañga me nibik ki. Mu nwii mi nwon me bi nyodi i ndap, me nyén ki ngandak bahoma. I ngéda me bi pamna 16 nwii, me bi bôdôl sal i wom, homa ba nsélél hibañga ba nsébél le Marijuana. Me bi sal nyoo bebee le ngim nwii. U wada, di bi yoñ sitima inyu ke i nyuñga hibañga; ha nyen di bi bomna ni ntôñ mintonba umpe, u yak wo u bé ke i nyuñga hibañga kiki. Ha nyen ba bi bôdôl leñ bés ngaa. Inyu pei dikoñgo di ngaa i u u, me bi kwo ikété malép me hok letee me kôhna homa lisolbene. I mbus jam li, me bi ke ngwéé i loñ Amérika.

 Ngéda me bi pam i loñ Amérika, me bi ke ni bisu i nuñul hibañga, ndi hala a bi lona me ngandak bikuu. I ngéda me bi bolna 19 nwii, ba bi gwel me ba ha me i mok inyu wip ni manola. I ngéda me bi pam nyoo, me bi adba ni ntôñ mintonba umpe i ndap mok kayéle me sôôbe ikété mam mabe. Jon batat ndap mok ba bi om me i mok mi Lewisburg i Pennsylvania, het ba ntat bôt ba mok ba ba nlôôha ni bihiumul bibe.

 I ngéda me bi pam nyoo i ndap mok i Lewisburg, ha nyen me bi ôbi tjagda, bihiumul gwem bi bi kônde bep. Kiki me bééna nlélém yimbne u ntôñ nwem mintonba mu nyuu, hala a bé bé me ndutu i témb adba lôñ yada ni bo. Me bi kônde yila mut njôô, me jok bisañ hiki ngéda. Kel yada me bi yoñ ngaba i sañ i bé juba i mbégdé ndap mok. I sañ i, i bé ngui kayéle di bi gwélél bikék ni minkoñ (mi bahianda nyuu ba mpaa inyu lédés minsôn) inyu jo. Inyu mélés sañ i, bisônda bi ndap mok bi bi gwélél gaz lacrymogene inyu buñga bés. I mbus, ba bi ha me i tuñ i tôbôtôbô i homa ba téédana mintonba minkeñi. Me bé njo bisañ nunkeñi, me bé ti bé ki to mut nye ki nye lipém. Me bééna ki lem i bép bôt inyule hala a bé lémél me ngandak. Kiññem i bé tééñga bé to me.

 Me bé i pes i ndap mok i ba nkwés hiki ngéda, me yénék i tuñ yem bebee le kel yosôna, ha nyen me bi bôdôl añ Bibel inyu lôôs ngéda. I mbus, ntat ndap mok wada a bi ti me i kaat ini le Vous pouvez vivre éternellement sur une terre qui deviendra un paradis. a Mu kii me bé añ yo, me bôdôl hoñol ngandak mam me bi nigil me mañge ni Mbôgi Yéhôva. Ndi me bi bodôl hoñol letee ni hee libak jem li mut njôô ni li mut a ngwés bisañ li bi kena me. Me bi hoñol yak lihaa jem. Kikii bilôk bikéé gwem bi bôda biba bi bi yila Mbôgi Yéhôva, me kahal hoñol le: ‘Ba ga niñ mba ni mba.’ Me badba le: ‘Inyuki me me nla bé?’ Ha nyen me bi kit le me nlama héñha.

 Ndi me bé yi le me bééna ngôñ ni mahôla inyu pam i boñ mahéñha. Jon, kiki jam li bisu, me bi soohe Yéhôva Nyambe me bat nye mahôla. I mbus, me tilna hikuu hi loñ hi Mbôgi Yéhôva hi loñ Amérika, inyu bat yigil Bibel. Hikuu hi loñ hi bi pala yoñ bitelbene le likoda li li bé bebee li yuuga me. Ha ngéda i, me bééna bé kunde i leege bakén ba bôt ndik bôt bem ba lihaa. Mbôgi Yéhôva yada i bi bôdôl ômle me bikaat ni mimbamble inyu lédés me, hala a bi ti me makénd i boñ mahéñha.

 Me bi yoñ makidik ma ngui ngéda me bi kit maada ni ntôñ wem mintonba, tolakii di bi tégbaha ngandak nwii ntôñ. Yak mbôgna nlôñ u ntôñ mintonba a bé mu pes i ndap mok i. Jon kel yada ngéda di bé i mbégdé me bi kôôge nye bebee, me kal nye le me nsômbôl yila Mbôgi Yéhôva. Ndimbhe yé i bi hélés me; a kal me le: “Ibale u mpot maliga wee ke ni bisu. Me nla bé kolba Nyambe. Ndi ibale u yé ndigi ke bés ngwéé, u nek bé bikuu bi bem we” .

 I nwii ima mi bé noñ ha, batat ndap mok ba bi yimbe le me bi bôdôl boñ mahéñha ndék ni ndék. Jon ba bi bôdôl tôñ me. Kiki hihéga, ba bé kañ ha bé me moo ngéda ba bé pémés me i ndap mok inyu ke jogop . Ntat ndap mok wada a bi bôdôl kôôge me bebee inyu ti me makénd le me waa bañ boñ mahéñha. I nwii me bé lama pam i mok, batat ndap mok ba bi kena me i mok mimpe, bebee ni mi me bi nyodne, i het bôt ba mok ba bééna ndék kunde. I nwii 2004, me bi pam i mok, i mbus 10 nwii, batat ndap mok ba bi témbna me i Meksika ni litôa jap.

 Ndék ngéda i mbus le me bi témb i Meksika, me bi tehe ndap Ane i Mbôgi Yéhôva. I likoda jem li bisu me bi kena mbot yem i mok​—inyule yotama yon i bé ndék loñge. To ikété libak li, Mbôgi Yéhôva i bi leege me ni gwéha. Minyaô nwap mi bi kwés me nkaa le me yé ipôla bañga bikristen. (Yôhanes 13:35) Yokela, mimañ mi likoda mi bi yoñ bitelbene inyu bôdôl yigil yem i Bibel. Me bi sôblana i nwii u bé noñ ha, i hilo 3 di sôñ Dipos nwii 2005.

 I sôñ Kondoñ nwii 2007, me bi yoñ bôlô nsañal, me bé tégbaha 70 ma ngeñ hiki sôñ i niiga bôt Bibel. I nwii 2011, me bi boñ suklu i lôk kéé i bôlôm i i yé ngi biiba (nano i yé suklu baañal ñañ nlam). I suklu i, i bi hôla me ngandak i yônôs minson nwem ikété likoda.

 I nwii 2013, me bi bii Pilar, loñge yem nwaa. A mbéna kal ikété minjôha le, a la bé neebe le me bé i nya mut me añle nye le me bé behee. Kekikel, me mah ha bé témb nlômbi mut me bé. Me ni nwaa wem di nôgda le mahéñha me mboñ i niñ yem ma yé toi yimbne i i ñéba le Bibel i nla toi héñha mut.​—Rôma 12:2.

 Me nhôñol le bipôdôl bi Yésu ikété kaat Lukas 19:10 bi mbéñge toi me. Yésu a nkal haana le: [Me] bi lo inyu yéñ ni tohol ba ba bi nimil.” Me ta ha bé nimlaga. M’a boñ ha bé bôt béba. Ni mahôla ma Bibel, me yé maséé i noñ njômbi i nlôôha ba ilam, maada ma nsañ ni bôt bape, ndi iloo ki hala, maada mem malam ni Nhek wem le Yéhôva.