Lihaa jem li nlôl i Tonga, loñ yada i i nyééne i tuye Pacific nwelmbok, i gwé bebee le 170 ma biôn. Nyoo di bééna bé ngandak gwom inyu niñ, kiki bo matôa, mapubi. Ndi di bééna malép ni ndék kôp. Ngéda binoi bi suklu, me ni lôk kéé yem yo iba di bé hôla pua i sal wom. Di bé bel makubé, manyogi, mañga ni mbôñ. Pua a bé niñis lihaa jé ni moni di bé kôhna mu nyuñga bijek, loñni i ndék nyemede a bé kôs mu bon ba bibôlô a bé boñ. Kiki libim li bôt mu loñ yés, lihaa jés li bé diihe Bibel, di kenek i base hiki ngéda. Ndi, di bé hoñol le inyu bana niñ ilam, di bé lama ke i loñ i yé lingwañ.

 Ngéda me bi pamna 16 nwii, nyandôm wem a bi hôla lihaa jés i ke i yén i nkoñ u California i loñ Amérika. Kinje ndutu di bi bana i meya bilem bi loñ! Tolakii di bééna ndék bigwel moo, di bé niñ i homa het liyep, njôô ni hibañga bi bé tôl. Ngim mangéda di bé di nok ngaa i lôôs ni juu, yak bôt bés ba libôk ba bé kon mintôñ mi mintonba woñi. Ngandak yap i bé begee ngaa inyu tat bomede tole inyu pun bomede. Me ngi gwé hikoñgo hiada i tôl hi ba bi ôm me mu bisañ bi mapuna.

 I suklu, me bé gwés i ba lôñni njohok ipe. Ndék ni ndék me bi bôdôl ke i mangand ma mpuñgu, me nyok moog ngandak, me yila mut njôô, me ôdôk hibañga. I mbus, me yila nkol u hibañga hini le cocaine. Kiki ngéda i bé tagbe, me bi bôdôl nip inyu somb hibañga. Tolakii bôt bem ba lihaa ba bé gwés base ngandak, ba bi ti bé me maéba mo ki mo inyu hôla me le me jôp bañ bilôñ bibe. Bisônda bi bi gwel me ngandak ngélé inyule me bé mut njôô. Niñ yem i bi yubda! Sôk i nsôk ba bi ha me i mok.

 Kel yada, i nwii 1997 mu kiki me bé i ndap mok, solôñ yem i bi tehe me ni Bibel i moo. Hala a bé i kel ngand Kristak, bôt ba Tonga ba bé diihe i ngand i ngandak. Solôñ yem a bat me too me nyi yom Bibel i niiga toi inyu ngand Kristak, me bé yi bé lelaa me timbhe nye. A bi éba me ñañ u ligwéé li Yésu ikété Bibel, memede me yimbe le ngand Kristak yo ki yo i ta bé i Bibel. (Matéô 2:1-12; Lukas 2:5-14) Me yôm, ndi me badba le kii ipe Bibel i mpot inyu Yésu. I solôñ yem i, a bé ke hiki ngéda i makoda ma Mbôgi Yéhôva ma ma bé tagbe i ndap mok, me kit le yak me nke nyoo. Yigil i bé pôdôl kaat Masoola. To hala kii me bé nok bé to yom, ndi i mam momasôna ba bé pôdôl ma bé pémél i Bibel.

 I ngéda Mbôgi Yéhôva i bi bat me ibale ba nla nigil Bibel ni me, me bi neebe ni maséé. Inyu ngélé bisu me bi nok le Bibel i mpôdôl mbônga u paradis hana ’isi. (Yésaya 35:5-8) Hala a bi hôla me i nok le inyu lémél Djob me bé lama boñ mahéñha makeñi i niñ yem. Me bi nôgda le Yéhôva Nyambe a bé bé le a neebe me i paradis ni i nya mintén mi bilem bibe bini me bééna. (1 Korintô 6:9, 10) Jon me bi kit le me nlama nigil i gwel memede, me waa ôt siga, hibañga ni lihiua.

 I nwii 1999, Ilole me bé mal sal mok nwem, bagomin ba om me i homa bakén ba bôt ba nyééne. Iloo ngim nwii, me bi bana ha bé maada ni Mbôgi Yéhôva. Ndi to hala me bi yoñ makidik i ke ni bisu i boñ mahéñha i niñ yem. I nwii 2000, bôt ba ngomin ba loñ Amérika ba bi kal le me gwé ha bé kunde i yén i loñ yap, ba timbis me i Tonga.

 Kiki me ntémb i Tonga, me hoo yéñ Mbôgi Yéhôva, me témb me bôdôl yigil yem i Bibel. Me bé gwés mam me bé nigil, me bé ki nhelek i tehe le Mbôgi Yéhôva i ôn i bé gwélél Bibel inyu niiga nlélém kiki Mbôgi Yéhôva i loñ Amérika.

 Pua yem a bé yiba i libôga jolisôna, inyule a bééna tel keñi i base yé. Jon i bidôdle lihaa jem di bé nok bé inyuki me bé kiha ni Mbôgi Yéhôva, hala a bi unbaha bo. Ndi i mbus ngéda bagwal bem ba bi ba maséé i tehe le matiñ ma Bibel ma bi hôla me i héñha niñ yem.

 Mahéñha ma ma bé me ndutu i boñ ma bé i nwas ngim jam ngandak bôt i bé boñok i loñ yés. Ngandak bôlôm i Tonga i bé tégbaha ngandak ngéda i nyo kava, kava a yé moog ma hiôa, ma ba mbañ ni minkañ mi e poivrier. Nano kiki me bi témb i loñ yem, me bi bôdôl bana lem i ke hiki kôkôa i homa ba nuñlene kava; me bé me nyo letee me kwo kii mim. Jam jada li bé tééñga me li bé le, mawanda mem ma bé bé bôt ba bé diihe matiñ ma Bibel. Jon ba bi hôla me i nok le bilem gwem bi bé sôlha Nyambe. Me bi boñ mahéñha ma bé béda le ndi Djob a neebe bibégés gwem a sayap ki me.

 Me bi bôdôl ke makoda ma Mbôgi Yéhôva momasôna. I ba lôñ ni bôt ba mboñ biliya i lémél Djob i bi hôla me i yémbél ngandak manoodana. I nwii 2002, me bi sôblana, me yila Mbôgi Yéhôva.

 Nyambe a bi éba me wongut ni hônba yé, ini wongut Bibel i mpôdôl i ngéda i nkal le: “Yéhôva . . . a ñunda bé wongut inyule a nsômbôl bé le mut nye ki nye a tjiba, ndi a nsômbôl le bôt bobasôna ba pam i hiel miñem.” (2 Pétrô 3:9) A bé le a tjé i béba hiai hini behee, ndi a bi nwas hio le hi kônde ke ni bisu inyu boñ le yak bôt kii me ba yila mawanda mé. Me ngwés me hoñol le Yéhôva ngwélél yak mut kii me inyu hôla bape i héñha niñ yap.

 Ni mahôla ma Yéhôva, me nla gwel memede, niñ yem i gwé ha bé yubda. Me nibil ha bé bôt inyu somb gwom bi bé le bi nol me; ndi maselna ni hala, me noode hôla bôt bem ba libôk le yak bo ba yila mawanda ma Yéhôva. Ikété Mbôgi Yéhôva nyen me bi boma loñge yem nwaa le Tea. Di gwé man munlôm, lihaa jés li niñ ikété maséé. Bés boba di niiga bôt i yom Bibel i nkal inyu botñem i niñ boga ikété nsañ i paradis hana ’isi.