Me bi gwéé i tison i Ciudad Obregón, i pes ñombok i Meksika; ikété bon bôô, me bé man nu nyônhe batan. Di bé yééne i mapañ ma tison, nyoo nyen pua yem a bi oñ a salak i man homa ba néñhene binuga. Niñ i bé ilam ha homa nu, lihaa jés li bé maséé, li bak ki li édi. Ndi ngoo le, ngéda me bééna nwii mintan, mbuk mbebi nunkeñi a bi ôbôs liyééne jés, kayéle di bé nyégsaga i ke i tison ipe.

 Pua a bi kahal kôhna ndék dola. Ndi i nlélém ngéda, a yila mut lihiua; i jam li li bi tééñga libii jé, yak bés boñge. Di bé nip siga i pua di ôdôk yo. Me bi hiôô inyu ngélé yem bisu me ban-ga ndik nwii minsamal. I mbus ndék ngéda, bagwal bem ba bagla, yak niñ yem i kônde bep, bep ni bep.

 M’ma yem a bi yoñ bés a kena bés yak mbog wé. I mut nu a bé ti bé m’ma moni, yak i yom m’ma a bé kôhna i bé kola bé to inyu néñés bés loñge. Jon me ni bilôk bikéé bi bôlôm ni bi bôda di bi bôdôl bépba inyu hôla nye, ndi to hala di bé kôhna bé bañga jam. Me bé sas bitamb, me nuñlak bret, bikaat bi manwin, chewing-gum ni gwom bipe. Me bé bééna ndeñg ni tison, me yéñék bijek i makund ma mingwañ mi bôt.

 Ngéda me bééna 10 nwii, mut wada a bi bat le me ni nye di sal i soso homa tison yosôna i nlébél binan. Me bi neebe, me tjôô suklu, me nyodi ki i ndap. Moni a bé ti me hiki kel mi bé pam bé to 550 fcfa, a bé ti ki me ndék bijek a bé léba mu likund li. Me bi oñ man homa liyééne ni i gwom me bé léba mu binan. Bôt ba bé kéña me ba bé pot mam ma mpuñgu, ba boñok ki mam ma nyega. Libim ikété yap li bé bôt ba lihiua ba ôdôk hibañga. Ha ngéda i, niñ i bé me ndutu i nya i nlôôha, me eek hiki u me sehlaga ni woñi. Me bé wonyuu ngandak inyule me bé liyep me bi ke bé to i suklu haa. Me bi yén ha i homa nu nwii maa, i mbus me bi ke i nkoñ umpe u Meksika. Nyoo me bi bôdôl sal i nwom, me bé ket mbônji, bisut, me kidik minkôgô me bumblak pommes.

 I mbus nwii mina, me bi témb i tison i Ciudad Obrégón. Manyañ pua yem nu mañ nu muda nu a bé mala a bi ti me tuñ i nyeni. Me bi bôdôl boñ bieem bibe; me bééna nduña keñi kayéle me bé gwés nitba. U wada, me bi soohe Nyambe le: “A Nwet, ibale u yé toi, hôla me i yi we ki m’a gwélél we mba ni mba. Ibale bañga base i yé, hôla me i léba yo.”

 Ibôdôl behee me bééna ngôñ i tibil yi Djob. Ibôdôl me mañge, me bi hiôm i ngandak bibase, ndi me bi tehe bé yom mu. To yada i bé niiga bé Bibel i nya i kôli, bi bi hôla bé to me i yônôs ngôñ yem i pes mbuu. Bihogi bi bé lôôha bugus mam ma moni, i bipe niñ i bahémle i bé ndigi malal ma nyega.

 Ngéda me bééna 19 nwii, nlôm mankéé nu muda nu mañ a bi añle me le Mbôgi Yéhôva i bi hôla nye i yi kii Bibel i niiga inyu libégés bisat. A bi éñél me kaat Manyodi 20:4, 5 (NWT). I nkal le di nlama bé uñgus ôñgba yo ki yo. Nlôñ 5 u nkal le: “U nlama bé ôôp i bisu gwap, to nwas le ba tinde we i gwélél gwo, inyule me Yéhôva Nyambe woñ, me yé Nyambe nu a mbat le ba bégés ndik nyetama.” Ndi a bat me le: “Ibale Nyambe a ngwélél bisat inyu boñ manyaga, tole ibale a nsômbôl le di bôñôl gwo ikété bibégés gwés, inyuki a nsôñga ni gwo?” Me kahal ôt pék. I mbus, di bi bana ngandak minkwel mimpe mi Bibel. Me bé diihe nya minkwel i kayéle me bé tehe bé le ngéda i bé tagbe.

 I mbus ngéda, a bi kena me i likoda jada li Mbôgi Yéhôva. I mam me bi tehe ni nok ma bi lôôha hélés me. Yak boñge ba wanda ba bé nyoñ ngaba i likoda, ba tinak minkwel i hikôma ibabé woñi! Me kal ikété ñem wem le: “Kinje biniigana bilam bôt ba nkôs hana i homa nunu!” Tolakii me bééna mimbôñgô mi tjôñ ni mahabga mabe, Mbôgi Yéhôva i bi leege me ni ngandak minyaô. Lihaa jada li bi naña me i je ni bo mbus likoda!

 Yigil yem i Bibel ni Mbôgi Yéhôva i bi niiga me le Yéhôva Nyambe a yé isañ nu gwéha, nu a ntôñ toi bés ibabé béñge likala jés li niñ, kôgôô yés tole suklu di bi boñ. Yéhôva a ta toi bé ntodol bôt. (Minson 10:34, 35) Sôk i nsôk, ngôñ yem i pes mbuu i nkahal yon. Me bé nôgda ha bé le niñ i gwé bé nseñ.

 Me bi lona mahéñha makeñi i niñ yem! Me bi waa ôt siga, lihiua, me waa pot ki mam ma mpuñgu. I lôlha ñem me bééna ngéda me bé mañge i bi sôk mal ndék ni ndék yak bieem gwem bibe. Me bi pam ki i nup mahoñol me bééna me mañge, le me gwé bé mahee mo kiki mo ndik inyule me bi boñ bé ngandak suklu ni le ba bi unda bé me gwéha.

 Nano me gwé loñge nwaa nu a ngwés Yéhôva, a nit ki me ngandak. Len me yé ngwélél makiiña, me nyuuga makoda inyu lédés ni niiga lôk kéé yem i pes mbuu. Bibel ni bañga biniigana me bi kôs bi bi hôgbaha me; nano me nwo ha bé nyuu ni libak jem.