I bôt ba nkon ba mbéna bana nduña, ba nlôôha ki tôñ ngéda ba nlama ke i dokta. Inyu hala nyen kégikel yada i i mpôdol mam ma dokta i nkal le: “Minyiña mi ñéba le mbôô u bakokon u gwé maada ni ngôñ yap i pes mbuu ni pes mahoñol.” *

Inyu yônôs ngôñ i, Mbôgi Yéhôva i nti lôkisañ yap i i niñi i dokta hogbe ni mahôla. Mimañ mi likoda mi nyoñ bitelbene i yuuga bijô bi likoda jap bi bi nkon. Ndi, kii i ntagbe ngéda nkokon nu a yé Mbôgi Yéhôva a nkôhna matibla haa ni lihaa jé? I bitison bi tôbôtôbô ikété nkoñ ’isi wonsôna, Mbôgi Yéhôva i bi té Muu ma bayuuga bakokon. Mimañ mi makoda mi mi nyoñ ngaba mu ntjega u, mi mbéna yuuga bakokon ni mahaa map ma ma nlôl haa, tole ma ma nlôl i biloñ bipe inyu kôhna matibla. Muu ma bayuuga bakokon ma yé 1 900 ikété nkoñ ’isi wonsôna, yom kiki bo 28 000 bilôk bikéé bi nit muu ma. *

Mankéé William nu a nsal mu juu li a nkal le: “Me bi pam i ti Mbôgi Yéhôva ni bijô gwap bi lihaa bi bi ta bé ntôñ hogbe ndik inyule me ni bo di bi kwel. Me nkwés bo nkaa le Yéhôva Nyambe a nyi libak jap ni le a ntôñ bo. Bakokon ni bôt bap ba lihaa ba yé maséé ngéda ba nsoohe inyu yap.”

Ngandak bôt i bi ti mayéga inyu makénd muu ma bayuuga bakokon ma bi ti bo. Nano di sima ngim dihéga i loñ Amérika het yom kiki bo 7 000 ma banit muu ma bayuuga bakokon ba nke i yuuga bo.

• Priscilla a nkal le: “Me nti bé mayéga inyule ni bi yuuga pua yem ngéda AVC i bi bép nye. Hala a bi lôôha tihba nye! I nya bitelbene i i bi hélés nye. Me nhoñol le mayuuga manan ma bi hôla nye i hoo témbna.”

• Ophilia, ngond i nkokon nu a bi wo, a bi kal le: “Mma yem a bi diihe mayuuga manan ngandak! A bé yi le Yéhôva nyen a ep bé. Di nti bé mayéga inyu nduña nan.”

• Ngéda a bi nok le a ngi yii ndigi nye ndék dilo di niñ, nkokon wada a bi lôôha toñ. James nu a nsal mu juu li bayuuga bakokon, a bi tégbaha ngéda ni nye i kabna hogbe i Bitilna di nléba i kaat Filipi 4:​6, 7. James a nkal le: “Ngéda me bi témb me lo yuuga nye, a bi héñha litehge jé li mam. Tolakii ndék dilo di niñ yon i bé i yii nye, a bé nkwoog nkaa le Yéhôva a nhôla nye, ha ngéda i a lédés yak me!”

Pauline nu nlôm a bi wo i dokta li li bé haa ni mbai yé, a bi tila le: “Di nti bé mayéga inyu mahôla ni bi ti bés mu mangéda mabe lihaa jés li bé tégbaha. Hala a bi hôgbaha bés i yi le ni bé le ni lo i dokta i kosi juu, tolakii kel i bé noñ ha ni bé lama ke i bôlô. Di nti bé mayéga inyu bitelbene ni bi yoñ inyu boñ le bés 11 bôt di léba liyééne, ibabé i hôya le ni bé sébél bés hiki ngéda inyu i yi too mam ma nke loñge. Me nti Yéhôva ni ntôñ wé mayéga inyu bitelbene bi bi yôña inyu hôgbaha bés.”

Nicki, Gayle ni Robin ba bi boñ accident yom kiki bo 300 kilôméta haa ni ndap yap. Ngéda Carlos, nu a nsal i juu li bayuuga bakokon a bi yi hala, a bi ke i dokta. A nkal le: “Me bi ti bo i mam momasôna ba bééna ngôñ, me yoñ yak bitelbene i kena ngwo i Nicki i dokta inyu boñ le i kôhna matibla.” Mbus, yak Curtis nu a nsal mu juu li, a bi ke dokta ni nwaa wé. Ba bi yén nyoo i dokta 7 ngeñ letee bijô bi mahaa bi bakokon bobasôna ba lo. I mut a bi tehe mam ma bi tagbe a nkal le: “Mahôla ba bi lona i bôt bana bo baa ma bi hôgbaha bo. Ndi Robin, manyañ nu muda nu Nicki nu a ta bé Mbôgi Yéhôva a bi hel ni mahôla ma juu li bayuuga bakokon.”