Hala a nloo 100 nwii le Mbôgi Yéhôva i ñoñ mandap i het ba nkodba. Baa ba ma oñ Ndap Ane yada mu libôga joñ? Umbe nseñ Ndap Ane i gwé inyu libôga joñ?

Hiki Ndap Ane di ñoñ i nlama kônde lémés libôga het ba ñoñ yo. Mankéé Jason nu a nhôla i tjek maoñ ma mandap ma Ane i Amérika a nkal le: “Njômbi yés i yé le hiki Ndap Ane i ba ndap i nlôôha ba ilam ha i libôga li.” Mankéé wada nu a nsal mu i juu li maoñ a nkônde le: “Ngôñ yés i yé le i Ndap Ane di yé oñ i ba likébla ni yom i mahee inyu bôt ba libôga.”

I bôt ba yoñ ngaba mu maoñ ba yé Mbôgi Yéhôva. Ba gwé ngôñ le mandap ma, ma lôôha ba malam. Bôt bape ba nyimbe likeñge jap. Kiki hihéga, nwan maoñ wada nu a nyééne i Amérika a bi kal le minyôl mi mandap més ma Ane ma nloo yaga minyôl nwomisôna a ma wan. Nwan maoñ wada i ôn i Jamaika ni baso ngwelnson bé ba bi ke i wan maoñ ma Ndap Ane, a bi kal bo le: “Ni gwé bé le ni tôñ ngandak inyu bôt bana. Mbôgi Yéhôva i noñ ntjega wap maoñ, yak matiñ ma maoñ ma loñ yés.” Nwan maoñ numpe nu a nyééne i tison Floride i Amérika a nkal le: “Me ma wan maoñ ma bidokta ni mape ki, ndi me yé ngi tehe maoñ ma pôôna ma Mbôgi Yéhôva. Ni nsal loñge bôlô.”

Makoda ma Mbôgi Yéhôva ma nhéñha biniñ bi bôt. Bôt ba bi yila biloñge bi basañ, banyañ ni boñge inyule ba nlo i Ndap Ane. Rod nu a nsal i juu li maoñ a nkal le: “Hiki Ndap Ane i yé homa ba niiga bôt i bana bilem bilam ni maboñok malam ma ma nla bahle bôt bobasôna.” A nkal ki le: “Ha homa nu nen u nla léba mahôla inyu hônba mandutu. Mukété nyen u nla léba mawanda ma ma yé le ma hôgbaha ni ti we mahôla i pes mbuu.”

I bet ba nke i makoda ba ntôñ bôt ba libôga jap, ba yé ki bebee i lôl bo mahôla i ngéda bikuu. Kiki hihéga, ngéda mbuk mbebi ba nsébél le Matthew i bi hôñ i loñ Bahamas i nwii 2016, Mbôgi Yéhôva i bi tibil 250 mandap. I ngim libôga, muda wada nu 80 nwii ba nsébél le Violet a bi nimis ndap yé. A bi kôôge bilôk bikéé bi nti mahôla ngéda bikuu bebee. A bé bebee i saa inyu boñ le ba tibil ndap yé. Ba bi neebe bé moni nwé, ndi ba bi tibil nyol nwé inyu boñ le i soo ha bañ. I mbus, ba bi tibil yak ngii ndap i kumba yé. I mamélél, Violet a bi sambla hikip hiosôna ngandak ngélé a ti bo maéga, a kal bo le: “Ni yé toi bagwélél ba Djob.” 

Inyu tééda mandap ma Ane mapubi, Mbôgi Yéhôva i bi boñ tjega inyu hôla bilôk bikéé i yi mbôñgôl mo. Hala a yé a num matam malam. Kiki hihéga, i man libôga li Arizona, muda wada a bi neebe nsébla i lo i Ndap Ane. A bi pôdôl mapubi ma Ndap Ane, ndi yom i bi lôôha lémél nye i yé bitelbene bi bi yôña inyu i bôñgôl yo ilole i ñôbi. Muda nu, a bé ntila kégikel mu tison i. Mukété kégikel i, a bi pôdôl lelaa Mbôgi Yéhôva i nyi tééda mandap map ma Ane. A sôk a tila le: “Di yé maséé ni Ndap Ane i yé i libôga jés.”

U nla léba mandap ma Ane to hee homa i nkoñ ’isi wonsôna. Di naña we i yuuga mo. Di ga ba maséé i leege we.