SƆ̃ƆSIRU 3
Rahabu u Yehofa naanɛ doke
A de su ko nge sa wãa Yerikon wuuɔ. Wuu ge, ga wãawa Kananin temɔ, tem min tɔmbu ba ǹ Yehofa naanɛ doke. Miya kurɔ wi ba mɔ̀ Rahabu u wãa.
Sanam mɛ Rahabu u raa sãa wɔndia bii, u nua nge mɛ Mɔwisi u nim wɔ̃ku ge ba mɔ̀ Naa Yari bɔnu kua yiru, ma u dera Isireliba ba Egibiti yara. U raa maa nua mɛsum Yehofa u Isireliba somi ba ka ben yibɛrɛba kamia tabu sɔɔn di. Tɛ̃ wee u nɔɔmɔ ma Isireliba ba wãa Yerikon bɔkuɔ!
Rahabu u Isireliba yiru be berua yèn sɔ̃ u Yehofa naanɛ doke
Sɔ̃ɔ teeru, yoka gaa, Isireliba yiru ba Yeriko dua bu ka wuu gen saria mɛɛri. Ba da Rahabun yɛnuɔ. Ma kurɔ wi u be dam koosia, u be sɔ̃ɔwa bu duo kpa bu kpuna. Wɔ̃ku te sɔɔ, Yerikon sunɔ u gia ma durɔ be ba wuun saria mɛɛrim na, ba da Rahabun yɛnuɔ. Yen sɔ̃, sunɔ u tɔmbu gɔra kpa bu Isireliba yiru be mwama. Rahabu u durɔbu yiru be berua win dii tɛɛran wɔllɔ ma u sunɔn tɔmbu sɔ̃ɔwa u nɛɛ: ‘Geema, durɔ be ba na nɛn mi, adama ba wuu yara kɔ. I bu kasuo fuuku, i ko i bu wa i mwa!’ A yɛ̃ mban sɔ̃na Rahabu u durɔbu yiru be berua u be kɔ̃sumɔ?— Yen sɔ̃, u Yehofa naanɛ doke ma u yɛ̃ kam kam ma Yehofa u koo Isireliba Kananin tem kɛ̃.
Durɔbu yiru be, bu sere Rahabun yɛnu yari, ba wi nɔɔ mwɛɛru kua ba nɛɛ, wi ka win yɛnugibu kpuro ba koo faaba wa sanam mɛ Isireliba ba koo Yeriko kam koosia. A yɛ̃ mba ba wi sɔ̃ɔwa u ko?— Ba nɛɛ: ‘A wɛ̃ɛ swɛ̃ɛ yini suo kpa a yi gbinisi wunɛn fɛnɛntin tɔɔwɔ. À n kua mɛ, be ba wãa wunɛn yɛnu sɔɔ kpuro ba koo faaba wa.’ Rahabu u kua deedee ye durɔbu yiru be ba wi sɔ̃ɔwa u ko. A yɛ̃ mba n koora yen biru?—
Yehofa u Rahabu ka win yɛnugibu faaba kua
Ya ǹ tɛ ma sɔ̃ɔ teeru, Isireliba ba sĩimɔ, ba wuu ge sikerenamɔ, ba maari. Sɔ̃ɔ nɔɔba tia ba ka wuu ge sikerena, sɔ̃ɔ teeru nɔn teeru. Adama, sɔ̃ɔ nɔɔba yiruse, nɔn nɔɔba yiruwa ba wuu ge sikerena. Yen biru be kpuro ba kuuki kua ka dam. Yehofa u dera gani yi yi wuu ge sikerenɛ yi wɔruma. Adama, yɛnu gen fɛnɛnti ba wɛ̃ɛ swɛ̃ɛ gbinisi ga ǹ wɔra! Kaa kpĩ a yɛnu ge tubu foto ye sɔɔ?— Rahabu ka win yɛnugibu ba faaba wa!
Sɔ̃ɔsi terà kaa kpĩ a sua saa Rahabun faagin di?— Rahabu u Yehofa naanɛ doke gãa gee dabi ni u mɛɛra wi sɔɔn di. Wunɛn tii a gãa gee dabinu mɛɛrimɔ Yehofa sɔɔ. A Yehofa naanɛ doke nge Rahabu ro?— Sa yɛ̃ ma wunɛn tii a wi naanɛ doke!
