Saa min di Samuɛli u sãa bii yãkabuwa, u wãa Gusunɔn Kuu Bekurugii ten mi, ma u sɔmburu mɔ̀. Kuu Bekurugii ten miya tɔmba ra raa nɛ bu Yehofa sã. A yɛ̃ mɛ n kua Samuɛli u ka kua Kuu Bekurugii ten sɔm kowo? A de su gina kasu su gia Samuɛlin mɛro sɔɔ wi ba sokumɔ Hana.

Saa tɛɛbun diya Hana u kasu u bii ma, ma ya ǹ koore. Yen sɔ̃na u raa Yehofa kana, u wi kɔkura nɔn dabi dabinu. Ma u nɔɔ mwɛɛru kua u nɛɛ, ù n bii tɔn durɔ mara, u koo ka wi na kpa ù n wãa, ù n sɔmburu mɔ̀ mi ba ra raa Gusunɔ sã. Yehofa u win kanaru nua ma kurɔ wi, u bii tɔn durɔ mara. Hana u bii wi yĩsiru kã, Samuɛli. Nge mɛ u raa nɔɔ mwɛɛru kua, sanam mɛ Samuɛli u wɔ̃ɔ ita ǹ kun mɛ wɔ̃ɔ nnɛ mɔ̀, u wi sua u ka da Gusunɔn Kuu Bekurugii ten mi, u ko Gusunɔn sɔm kowo.

Eli u raa sãawa Gusunɔn Kuu Bekurugii ten yãku kowo tɔnwero. U bii tɔn durɔbu yiru mɔ, ben tii, ba sɔmburu mɔ̀ mi. A yaayo ma Kuu Bekurugii te ta raa sãawa Gusunɔn sãa yeru, yen sɔ̃ n weenɛ ba n gãa geenu mɔ̀ mi. Adama, Elin bii be ba raa gãa kɔ̃sunu mɔ̀ mi. Samuɛli u waamɔ ye ba mɔ̀. Samuɛli u raa gãa kɔ̃sunu mɔ̀ nge Elin bii be ro?— Aawo, wi, gãa geena u mɔ̀ nge mɛ win mɔwɔba raa wi sɔ̃ɔsi.

Mba a bwisika n weenɛ Eli u win bii tɔn durɔ be kua?— U koo raa be swaa gawawa. U ǹ da ma derimɔ bu sɔmburu ko baa fiiko Gusunɔn sãa yee te sɔɔ. Adama, Eli u ǹ kue mɛ, yen sɔ̃na Yehofa u mɔru bɛsira Eli ka win bii tɔn durɔbu yiru ben sɔ̃. Ma Yehofa u gɔ̃ru doke u be sɛɛyasia.

Wɔ̃ku teeru, sanam mɛ Samuɛli u do, u nua goo u wi soka: ‘Samuɛli!’ Samuɛli u duka da Elin mi, adama Eli u nɛɛ: ‘Na ǹ nun soka ni.’ Yen bwesera koora nge nɔn mɛɛru. Yen nɔn itasen biru, Eli u Samuɛli sɔ̃ɔwa u nɛɛ, ù n maa nɔɔ ge nua, n weenɛ u wisi: ‘Na nun kanamɔ Yehofa,  a geruo; na nɔɔmɔ.’ Mɛna Samuɛli maa kua. Wee Yehofa u Samuɛli sɔ̃ɔwa u nɛɛ: ‘A Eli sɔ̃ɔwo a nɛɛ, kon win yɛnugibu sɛɛyasia gãa kɔ̃su ni ba kuan sɔ̃.’ Wunɛn waaru sɔɔ, ya koo sɛ̃sia Samuɛli u ka Eli labaari ye nɔɔsia ro?— Oo, ya koo sɛsia. Baa mɛ bɛrum ka wi mɔ̀, ka mɛ u Yehofan kĩru kua. Ye Yehofa gerua, ya maa koora mam mam. Ba Elin bii tɔn durɔbu yiru be go, ma Elin tii u gu.

Samuɛli sun sãawe weenasia, n weenɛ su wi saari. U raa mɔ̀ ye ya wã baa ka mɛ u gabu waamɔ ba gãa kɔ̃sunu mɔ̀. Wunɛ maa ni? Kaa ko nge Samuɛli kpa a n gãa geenu mɔ̀? Ma a mɔ̀ mɛ, kaa Yehofa ka wunɛn mɔwɔbun tiin nuki dorasia.