SƆ̃ƆSIRU 4
U win tundo ka Yehofan nukuru dorasia
Nɔɔ mwɛɛ terà Yɛfite u Yehofa kuammɛ?
Ya sɛ̃, ka mɛ, Yɛfiten bii wɔndia u win tundon nɔɔ mwɛɛru yibia
A wɔndia wi wa foto ye sɔɔ?— Durɔ wi ba mɔ̀ Yɛfiten biiwa mi. Bibeli ya ǹ sun win yĩsiru sɔ̃ɔwa, adama sa yɛ̃ ma u win tundo ka Yehofan nukuru dorasia. A de su gia wi ka win tundo Yɛfite sɔɔ.
Yɛfite u raa sãa tɔn geo, ma u saa yi too u ka win bii wi keu sɔ̃ɔsi Yehofa sɔɔ. U maa sãa damgii ka wirugii geo. Yera Isireliba ba wi kana ba nɛɛ, u ko ben wirugii taa bi bu be mɛnnɛ be ka ben yibɛrɛba sɔɔ.
Yɛfite u Gusunɔ kana u wi somi u ka taa bi di, ma u wi nɔɔ mwɛɛru kua u nɛɛ: ‘Tɔn gbiiko wi kon ka yinna u yarima saa nɛn yɛnun di, sanam mɛ kon wurama tabun di, yɛ̃rowa kon nun kɛ̃.’ Yɛ̃ro koo n wãawa ù n sɔmburu mɔ̀, mi Gusunɔn Kuu Bekurugiru ta wãa sere ka win wãarun nɔrɔ. Kuu bekurugii te, ta raa sãawa ayeru mi tɔmba ra Gusunɔ sã. Wee Yɛfite u taa bi di! A yɛ̃ warà gbia u yara win yεnun di sanam mε u wurama?—
Oo, Yɛfiten bii wɔndia wiya! Bii wɔndia wi turowa u mɔ, u ǹ maa bii goo mɔ. Wee tɛ̃ Yɛfite u koo wi mɔrisia u da u sɔmburu ko mi Kuu Bekurugii te ta wãa. Ya Yɛfiten nuki sanka too. Adama, a yaayo ma u raa nɔɔ mwɛɛru kua. Yande, win bii wi u gerua u nɛɛ: ‘Tundo, a Yehofa nɔɔ mwɛɛru kua, n weenɛ a te yibia.’
Wɔ̃ɔ baagere Yɛfiten bii wɔndia win bɔrɔba ba ra wi bera n de
Yɛfiten bii wɔndia win tiin nuki sankira. Gusunɔn Kuu Bekurugii ten mi, u ǹ kpɛ̃ u durɔ sua kpa u bibu ma. Ka mɛ, u kĩ too u win tundon nɔɔ mwɛɛru yibia kpa u Yehofan nukuru dorasia. Wɔndia win waaru sɔɔ, ya suanaa ka bii marubu kere. Yen sɔ̃, u yɛnu yara ma u da u wãa Gusunɔn Kuu Bekurugii ten mi sere ka win wãarun nɔrɔ.
A bwisika ma ye u kua ya win tundo ka Yehofan nukuru dorasia?— Oo, sika sari mɛna! À n Yehofa mɛm nɔɔwammɛ ma a wi kĩ, kaa kpĩ a n sãa nge Yɛfiten bii wɔndia. Wunɛn tii kaa wunɛn mɔwɔbu ka Yehofan nukuru dorasia too.
