Setam ka win wɛrɛkunu ba ǹ kĩ a n Gusunɔ sãamɔ. Ba kĩwa, bà n koo raa kpĩ, bu tɔn baawere kpuro tondasia Gusunɔn swaan di. Amɔna ba ra koosinɛ? Ben swaa tia yera sãa weesugiru. (2 Korinti 11:13-15) Sãara sãawa weesugiru, ma ta ǹ gee sɔ̃ɔsimɔ ye ya wee saa Bibelin di. Sãa weesugiru ta sãawa nde mɛ gobi weesugia—ya ka gobi gia weenɛ, adama ya ǹ funɛ mɔ. Ya koo maa kpĩ yu ka nun wahala deema.

Sãarun weesu gari kun Yehofa ,wi u sãa Gusunɔ geegii, doremɔ pai. Sanam mɛ Yesu raa wãa temɔ, sãarun wuu teeru ta raa wãa te ta kĩ tu nùn go. Ba tamaa sãa ben sãarun swaa ya sãawa geegia. Ba nɛɛ : “Baaba turowa sa mɔ, wiya Gusunɔ.” Yesu u sere be wurari ro? Aawo! U be sɔ̃ɔwa u nɛɛ : “Setamwa bɛɛn tundo.” (Yohanu 8:41, 44) Gisɔ tɔn dabinu ba tamaa sãa ba Gusunɔ sãamɔ, adama ka gem ba Setam ka win wɛrɛkunu sãamɔwa!—1 Korinti 10:20.

 Nde mɛ dãa kɔ̃sa ya ra bii kɔ̃sunu ma, nde mɛna sãa weesugiru ta ra tɔmbu ma be ba ra gãa kɔ̃sunu ko. Handunia ya wahala yiba, gãa kɔ̃sunu ni tɔmba mɔ̀n sɔ̃. Ni nu wãa wee : daa kɔ̃sa, tɔn ba ra soonɛ, gbɛna, nɔni swãaru, tɔn goberu, ka tɔn kurɔ duribu. Tɔn dabi ni ba gãa kɔ̃si ni mɔ̀ ba sãaru mɔ, adama ben sãaru ta ku ra n be bɔriamɔ bu ko ye ya wã. Ba ǹ kpɛ̃ bu ko Gusunɔn bɔrɔba sere ba gãa kɔ̃sin kobu deri.—Mateu 7:17, 18.

Sãa weesugiru ta ra n tɔmbu sɔ̃ɔsimɔ bu ka sãa gãanu kanaru ko. Gusunɔ nɛɛ su ku ka sãa gãanu kanaru ko. Ye ya dee deewa. Ya koo nun dore goo u ku ka nun gari ko kpa u ka wunɛn foto tɔna gari ko ro? Yɛ̃ro koo kpĩ u ko wunɛn bɔrɔ geegii ro? Aawo, u ǹ kpɛ̃. Yehofa kĩwa tɔmbu bu ka win tii tii gari ko, bu ku ka bwãaroku ko ǹ kun mɛ ka foto, yi yi ǹ wãaru mɔ.—Yaribu 20:4, 5.

Sãa weesugiru ta ra sɔ̃ɔsi ma dee deewa bà n gabu gomɔ tabun saa sɔɔ. Yesu nɛɛ Gusunɔn bɔrɔ ba kon kĩru mɔɔsinɛwa. Sa ku ra tɔn be sa kĩ go. (Yohanu 13:35) Ya ǹ maa wã, bɛsɛn tii, su tɔn kɔ̃sobu go. Sanam mɛ Yesun wɛrɔba na bu wi mwa, u ǹ wure win bwãabu ba be so bu ka wi faaba ko.—Mateu 26:51, 52.

Sãa weesugiru ta ra sɔ̃ɔsi ma tɔn kɔ̃soba koo nɔni swãanu wa dɔ̃ɔ yerɔ. Wee, Bibeli ya sɔ̃ɔsimɔ ma durum mu ra ka gɔɔ nɛwa tɔna. (Romu 6:23) Yehofa u sãawa kĩrun Gusunɔ. Gusunɔ kĩrugii u koo kpĩ u tɔmbu nɔni sɔ̃ sere ka ­baadommaɔ ro? Aawo pai! Alusanna sɔɔ, sãa teera ta kon wãa, te Yehofa u kĩ. (Kãsiru 15:4) Sãa ni nu Setam weesu kparamɔ nu koo doona kpuro.