Gãa kɔ̃si ni nu kooramɔ temɔ gisɔ nu sɔ̃ɔsimɔ ma Alusanna ya turuku kua. Bibeli nɛɛ sa kon saa kɔ̃si waamɔ sere Alusanna ya ka tunuma. Saa yi sɔɔwa sa wãa tɛ̃! Gãa ganu ni Bibeli nɛɛ nu koo n kooramɔ wee :

Tabu bakanu. “Bwesenu koo seesina nu tabu ko, sinamba koo tabu seesina.” (Mateu 24:7) Waliru teni ta koora. Saa wɔ̃ɔ 1914n di, handunian tabu bakanu yiru ka tabu piibinu dabinu yi koora. Tɔmbu yako dabina ba gu yi sɔɔ.

Yam kpuro baranu. ‘Baranu ko n wãa gam ka gam.’ (Luku 21:11) Yi koora mɛ ka gem ro ? Oo. Cancɛɛ, gɔ̃ɔrun baranu , tũuru bakaru, boo wurusu, gbebaku (SIDA) ka bara ganu yi tɔmbu yako dabinu go.

Dĩanun biaru. Tem gira sɔɔ tɔn dabina wãa be ba ku ra di sãa sãa bu ka debu. Wɔ̃ɔ baagere tɔmbu yako dabinu gbimɔ gɔ̃ɔrun sɔ̃. Yĩreru garuwa mi ta maa sun sɔ̃ɔsimɔ mɛ Alusanna ya turuku kua. Bibeli nɛɛ : “Gɔ̃ɔru ko n wãa.”—Maaku 13:8.

Tem yĩiribu. “Tem yĩiribu ko n wãa bera  ka bera.” (Mateu 24:7) Yen tii ya koora bɛsɛn waati sɔɔ. Saa 1914n di tɔmbu yakon sɔnnira ba gu tem yĩiribun sɔ̃.

Tɔn kɔ̃sobu. Tɔmba kon sãa ‘gobin kĩrugibu’ ka ‘ben tiin kĩrugibu’. “Ba ko n handunian dobun kĩru mɔ n kere Gusunɔn kĩru”. “Bibu ba ǹ koo ben mɔwɔbu mɛm nɔɔwa.” (2 Timɔte 3:1-5) Tɔmbe bwesena dabia gisɔn tɔ̃ru, nde ya ǹ mɛ ro? Ba ǹ Gusunɔ bɛɛrɛ wɛ̃ɛmɔ, ma ba be ba kookari mɔ̀ bu ka Gusunɔ gia kɔ̃sa kuamɛ.

Gɔba. “Kɔ̃san kobu koo dabia.” (Mateu 24:12) Wunɛn tii a wa nge mɛ kɔ̃sa kom mu sosimɔwa wɔ̃ɔ ka wɔ̃ɔ. Baama kpuro ba koo kpĩ ba tɔnu gbɛni, ǹ kun mɛ ba nùn taki di, ǹ kun mɛ ba nùn kɔ̃sa kua.

Gãa nini kpuro nu sɔ̃ɔsimɔ ma Gusunɔn Bandu ta turuku kua. Bibeli ya nɛɛ : “Nge mɛya bɛɛ maa, ì n yabu ye wa ya wee, i n yɛ̃ ma n turuku kuawa Gusunɔ u ka bandu swĩi.” (Luku 21:31) Mba Gusunɔn Bandu? Gusunɔn ban diruwa saa wɔllun di te ta koo tem gɔsia Alusanna. Gusunɔn Bandu ta koo tɔmbun ban dinun ayeru mwa.—Daniɛli 2:44.