Gusunɔ kĩ a n sãa win bɔrɔ. A sɔ̃ɔ teeru bwisikure ma kaa kpĩ a n sãa Goo wi u handunia gira kpuro keren bɔrɔ ro? Aburahamu wi raa wãa yellu, ba raa nùn soka Gusunɔn bɔrɔ. (Yakɔbu 2:23) Bibeli ya tɔn gabun gari gerua be ba raa ka Gusunɔ bɔrɔnu di ma ba domanu dabinu wa. Gisɔ, tɔmbu saa tem kpuron di ba gɔsia Gusunɔn bɔrɔba. Wunɛn tii kaa kpĩ a n sãa Gusunɔn bɔrɔ.

À n sãa Gusunɔn bɔrɔ ya kere à n sãa tɔnu baaweren bɔrɔ. Gusunɔ kun win bɔrɔ naanɛgibu n nuki sankure. (Womu 18:26) À n sãa Gusunɔn bɔrɔ ya kere à n arumani mɔ. Sanam mɛ tɔn arumanigii u gu, win gobi ya gɔsia gabungia. Adama, be ba ka Gusunɔ bɔrɔnu di, ba dukia mɔ ye goo kun kpɛ̃ u be mwari.—Mateu 6:19.

Gabu ba koo kookari ko a ka Gusunɔn giabu deri. Baa wunɛn bɔrɔba ka wunɛn dusibu ba koo kpĩ ba ye ko. (Mateu 10:36, 37) Gabu bà n nun yaakoru mɔ, ǹ kun mɛ bà n nun nɔni sɔ̃ɔmɔ, a wunɛn tii bikio, ‘Wara na kĩ na n ka do —tɔmbu nde Gusunɔ?’ A bwisikuo ye sɔɔ: Tɔnu ù n yina a di, kaa wi mɛm nɔɔwa ro? Aawo pai! A dianun bukata mɔ a n ka wãa. Adama Gusunɔ u koo kpĩ u ko a n wãa sere ka baadommaɔ! Yen sɔ̃ a ku deri goo u nun yinaa a mɛɛri mɛ kaa n ka sãa Gusunɔn bɔrɔ.—Yohanu 17:3.