À n gɔsia Gusunɔn bɔrɔ ya sãawa gãa baka ye ya kere wunɛn wãaru sɔɔ. Gusunɔ koo nun sɔ̃ɔsi nge mɛ kaa n ka wãa doo nɔɔru sɔɔ ka bɛrum sariru sɔɔ ; U koo nun yakia saa sɔ̃ɔsiru weesuginu dabinun di ka saa kookoo kɔ̃sunun di. U koo wunɛn kananu swaa daki. U koo nun somi a n ka gɔ̃run bɔri yɛndu ka naanɛ mɔ. (Womu 71:5; 73:28) Gusunɔ u koo ko wunɛn tãsi yeru nɔni swãarun saa sɔɔ. (Womu 18:19) Kpa Gusunɔ u win kɛ̃ru nun wɛ̃, tera ta sãa wãaru te ta ku ra kpe.—Romu 6:23.

Ma a Gusunɔ susimɔ, a Gusunɔn bɔrɔba susimɔwa. Ba koo maa ko wunɛn bɔrɔba. Wee, ba ko ba n nun sãawe nge maabu ka wɔnɔbu ka sesubu. Ka gɔ̃ru doba ba koo nun Gusunɔ giasia kpa bu nun somi kpa bu nun dam kɛ̃.

Gusunɔ kun bɛsɛn saara. À n ka Gusunɔ bɔrɔnu kasu, n weenɛ a n gãa teeru yɛ̃. À n ka Gusunɔ bɔrɔnu mɔ ya ǹ sãa nge a ka wunɛn saara bɔrɔnu mɔ. U sun tɔkɔ ka bwisi kere ma u dam mɔ u sun kere. U sãawa wi u gem mɔ u ka sãa bɛsɛn Wirugii. Yen sɔ̃na sà n kĩ sa n sãa win bɔrɔ, n weenɛ su nùn swaa daki kpa su ye u sun sɔ̃ɔmɔ ko. Ya ko ya n sãa baadomma bɛsɛn gean sɔ̃.—Esai 48:18.