À n kĩ a n sãa Gusunɔn bɔrɔ, n weenɛ a gia wi sɔɔ. Wunɛn bɔrɔ ba wunɛn yĩsiru yɛ̃ ro kpa ba te dendi bu ka nun te soku ro? Oo, ba ra ko mɛ. Gusunɔn tii u kĩ a n maa win yĩsiru yɛ̃ kpa a ka nùn te soku. Gusunɔn yĩsira Yehofa. (Womu 83:18, NW; Mateu 6:9,NW) N weenɛ a maa mɛɛri ye u kĩ ka ye u ǹ kĩ. N weenɛ a n yɛ̃ bera ba sãa win bɔrɔba ka be ba sãa win wɛrɔbu. A saa n bukata mɔ à n kĩ a goo gia. Bibeli ya nɛɛ sà n kĩ su ko bwisigibu su saa dendio su ka gia Yehofa sɔɔ.—Efesu 5:15, 16.

Gusunɔn bɔrɔ ba ye n nùn dore kuamɛ. A laakari kowo wunɛn bɔrɔba sɔɔ. À n be daa kɔ̃sa kuamɛ ma a mɔ ye ba tusa, bɛɛn bɔrɔna ko tɛ ro? Aawo pai! Mɛna, à n kĩ a n sãa Gusunɔn bɔrɔ, n weenɛ a ko ye ya koo win gɔ̃ru dorasia.—Yohanu 4:24.

Sãaru kpuro kun nun kparamɔ a ka ko Gusunɔn bɔrɔ. Yesu, wi u sãa Gusunɔn bɔrɔ kĩnasi, u swɛɛ yirun gari gerua. Swaa tia ya yasu ma tɔmba dabi ye sɔɔ. Swaa ye ya dɔɔ kam koo yerɔ. Swaa gaa ya sãawa mɔkɔkɔ ma tɔmbe ba sĩimɔ ye sɔɔ ba ǹ dabi. Swaa ye ya wãaru te ta ku ra kpe kparamɔ. Ya nun sɔ̃ɔsi ma à n kĩ a n ka Gusunɔ bɔrɔnu sâa, n weenɛ a swaa gea mɛɛri a ka nùn sã.—Mateu 7:13, 14.