Bà n nɛɛ “Bandu Yeru” nge mɛ yĩsi te ta sɔ̃ɔsi, mi ba ra Bibelin sɔ̃ɔsinu wɛ̃wa Gusunɔn Bandu sɔɔ. Ban ten gari sɔɔwa Yesu u win waasu swĩi.—Luku 8:1.

Miya ba ra Yehofa sã ka gem. Min diya Gusunɔn Bandun labaari gean kparabu ya ra yari. (Mateu 24:14) Bandu Yenu nu koo kpĩ nu n kun sãa tia nin yasum ǹ kun mɛ nin gunum sɔɔ. Adama, ba ku ra ni bani bu ka tii sɔ̃ɔsi tɔmbun wuswaaɔ. Bandu Yee tee te sɔɔ, yigbɛ teeru ǹ kun mɛ dabinu nu koo kpĩ nu mɛnnɔsu ko. Sanam mɛni sɔɔ, yigbɛ ni nu dabiru sosimɔ nu ka wa mi nu koo mɛnna, sa Bandu Yenu bana nge nɔrɔm nɔrɔm dabinun saka (ya yarawa mi Bandu Yenu nɔɔbu sɔ̃ɔ teeru). Amɔsunwa ya ka kooramɔ?—Mateu 19:26.

Ba ra dii ni baniwa ka kɛ̃ɛ ni tɔmba mɔ̀ Bandu Yenun banan sɔ̃. Kɛ̃ɛ ni, ba ra ni mɔrisiewa bɛsɛn gbankɔkɔɔ, kɛ̃ɛ niya ba ra sue bu ka yigbɛnu nɔɔri nu n bana kpaa ǹ kun mɛ sɔmbun bukata mɔ Bandu Yeru sɔɔ.

Bani yi, yi ra koore ka kĩnasi dabinu be ba tii wɛ̃n baruka, ma ba wee saa baama kpuron di. Tem dabinu sɔɔ, ba ra Bandu Yenun banɔbun wuunu swĩi. Banɔbun wuu baateren tɔmbu ba sɔmburu mɔ̀wa kɔsiaru sari, ba ra dewa yigbɛru ka yigbɛru, baa mam sere ka mi n daabu sɛ̃, bu ka yigbɛru somi tu ka ten Bandu Yeru bani. Tem gamɔ, Seeda Dio be ba yɛ̃ru mɔ bana sɔɔwa, ba ra sue kpa bu be gam wɛ̃ bu ka Bandu Yenun bana ka nin sɔmbu kpara. Baa tɔn ben bwesenu nu n na, ka mɛ be ba tii wɛ̃ɛmɔ n kere sɔmbu te sɔɔ, bera yigbɛ ten Bandu Yeru ba banimɔn tɔmbu. Ka Yehofan hunde dɛɛra saabu, ka hania yi bɛsɛn kĩnasi ba mɔ̀ ka nuku tia, yeni kpuro ya ra koore.—Womu 127:1; Kolose 3:23.

• Mban sɔ̃na sa ra bɛsɛn sãa yenu soku Bandu Yenu?

• Mba ya ra sun somi su ka kpĩ su Bandu Yenu bani handunia gira sɔɔ?