Di piga-piga taon na parpudi on, lam martamba do godang ni akka na poso na bunu diri di piga-piga negara. Boasa boi songon i? Adong do tong tarpikkir gellengmuna naeng bunu diri?

Di artikel on lao dibahas ma

•  Boasa dang boi sepele natua-tua tu masalah on?

•  Sian dia do diboto hamu na tarpikkir gellengmuna naeng bunu diri?

•  Aha do na ikkon diulahon hamu molo naeng bunu diri gellengmuna?

 Sian taon 2009 sahat tu taon 2019, hampir dua hali loppit ma godang ni remaja di Amerika Serikat na mengalami gejala depresi. Jala lam martamba do godang ni halak na bunu diri saleleng tikki i. a

 Di Indonesia pe adong do masalah on. Sada survei di taon 2021 paboahon, sada sian tolu remaja di Indonesia hona gangguan mental. Godangna hira-hira 15,5 juta halak. Jala hona gangguan mental do tong lobi sian 80 persen remaja na melaporhon perilaku bunu diri (na tarpikkir, na merencanahon, jala na mancoba bunu diri).

 “Adong do masalah na diadopi akka na poso saonari na so hea dope diadopi akka na poso najolo . . . Jala pengaruh ni masalah i mambahen sega mental ni nasida.”—Vivek H. Murthy, U.S. Surgeon General.

 Prinsip ni Bibel: “Moru do gogo molo marsak roha.”—Poda 17:22.

 Parrohahon ma na tolu on:

•   Peristiwa. Adong do peristiwa na borat na diadopi gellengmuna, misalna songon putus cinta, gagal, manang mate halak na dihaholongi ibana? Molo adong, balga do pengaruhna tu ibana lobi sian na diboto hamu?

•   Tindakanna. Songon na mandao do ibana sian akka donganna dohot sian keluarga? Na so tertarik be ibana mangulahon kegiatan na dihalomohon rohana? Na gabe dipalleani ibana do akka barang kesayanganna tu halak na asing?

•   Hatana. Hea do dihatai gellengmuna taringot hamatean manang hea do didok ibana, “Tumagon do ra molo mate au ate”? Hea do didok ibana gabe beban ibana tu hamu?

   Memang olo do ra ‘asal dipandokkoni’ ibana hatana. (Job 6:3) Alai sian hatana i, bisa jadi naeng minta tolong do ibana. Jadi molo hea didok gellengmuna naeng mate ibana, unang ma hea disepelehon hamu hatana i.

 Molo hea do ro tu pikkiran ni gellengmuna naeng bunu diri, boi do disukkun hamu, “Nandigan ma hea tarpikkir ho naeng bunu diri jala songon dia ma carana?” Sian alusna boi ma diboto hamu aha na ikkon diulahon hamu.

 “Hita natua-tua, olo do ra ragu manukkun taringot on tu gellengta ala mabiar hita mambege alusna. Hape i ma kesempatanta lao mamboto aha na di bagasan rohana.”—Sandra.

 Prinsip ni Bibel: “Dos songon aek na bagas do sakkap ni roha ni jolma,alai boi do halak na marbisuk manimba i.”—Poda 20:5.

•   Sukkun ma perasaanna jala sabar ma manangihon. Na parjolo, puji ma ibana ala nungnga jujur. Dung i dok ma, “Olo do ho cerita aha na dialami ho baru-baru on? Boha do pakkilaanmu tikki adong keinginanmu naeng bunu diri?”

   Denggan ma tangihon alusna. Unang ma disepelehon hamu perasaanna jala unang ma pittor hatop-hatop paboahon “jalan keluarna”.

   Prinsip ni Bibel: “Ikkon hatop manangihon, manat makkatai, lambat tarrimas.”—Jakobus 1:19.

•   Bahen ma rencana. Urupi ma gellengmuna lao mamboto akka na di toru on jala surat hamu ma i.

   Tanda-tandana. Biasana situasi aha do na mambahen ibana gabe naeng bunu diri? Biasana aha do na dipikkiri ibana umbahen na gabe naeng bunu diri ibana?

   Kegiatan na boi mangurupi. Kegiatan aha do na boi mambahen tenang pikkiranna jala dang tarpikkir be naeng bunu diri?

   Halak na boi mangurupi. Akka ise do halak na boi diandalhon ibana lao mangurupi? Ra boi do i hamu, halak na asing na dewasa, psikolog, psikiater, manang organisasi na tarlatik na boi mangurupi halak na naeng bunu diri.

   Prinsip ni Bibel: “Sai na saut do sakkap ni halak na ringgas.”—Poda 21:5.

•   Waspada. Toktong ma parrohahon gellengmuna nang pe nungnga lam denggan keadaanna.

   “Tikki didok anakku dang adong be keinginanna naeng bunu diri, hurippu nga sae be masalahna. Hape sala do au. Molo adong masalah na asing na diadopi halak sisongon i, boi do muncul keinginan i muse.”—Daniel.

   Urupi ma gellengmuna lao mamboto hal na penting on: Dang songon i torus perasaanta. Bukku The Whole-Brain Child mandok, “Perasaanta i sarupa do songon cuaca.” Misalna tikki ro udan, taboto do dang torus ro udan i. Molo nga so udan i, pasti cerah do muse cuacana.

•   Papos ma rohana: Paboa ma tu gellengmuna na holong do rohamuna tu ibana jala pasti urupanmuna do ibana. Jala dok ma muse tu ibana, “Manang aha pe diulahon omak dohot bapa do lao mangurupi ho.”

  Prinsip ni Bibel: “Sai dipatudu ale-ale do holong ni roha jala songon haha anggi do i tikki masa sitaonon.”—Poda 17:17.