•   Tu ise do na unjotjot ho dang sapandapot?

  •  Tu bapak

  •  Tu omak

•   Jotjot do ho marsoal dohot natua-tuam?

  •  Jarang

  •  Sipata

  •  Jotjot

•   Molo nga marsoal hamu, biasana songon dia do ujungna?

  •  Biasana pittor hatop do sae masalahna jala mardame.

  •  Biasana ikkon jolo leleng do marsoal baru pe sae masalahna.

  •  Nga sappe leleng pe marsoal, tong do dang sae masalahna.

 Olo do ra ho marpikkir molo dang kompak ho dohot natua-tuam, ikkon berupaya ma nian nasida padenggatton situasina. Alai di artikel on lao tabahas ma, aha na ikkon diulahon ho asa unang jotjot hamu marsoal jala dang sappe marbadai. Na parjolo pikkirhon ma on . . .

•   Beda cara marpikkir. Dung lam magodang ho, pasti lam bagas do pangattusionmu manang cara marpikkirmu dibandingkon tikki dakdanak ho. Mulai ma ho mangalehon pandapotmu sandiri jala sipata dang sapandapot ho dohot natua-tuam. Nang pe songon i didok do di Bibel, “Pasangap ma omakmu dohot bapakmu.”​—2 Musa 20:12.

   Na sasittongna: Ikkon dewasa do cara marpikkirmu jala ikkon diboto ho do cara na denggan lao paboahon na so sapandapot ho dohot natua-tuam.

•   Kebebasan. Dung lam dewasa ho, biasana dilean natua-tuam do unggodang kebebasan tu ho. Alai masalahna, olo do ra dibatasi dope godang ni kebebasan na dilean manang dang pittor langsung dilean kebebasan i songon na diroham. Boi do on mambahen gabe marsoal. Alai didok Bibel, “Oloi hamu ma natua-tuamuna.”​—Epesus 6:1.

   Na sasittongna: Biasana, lam godang do kebebasan na dilehon natua-tuam tu ho molo denggan caramu mamakke kebebasan naung dilehon nasida sebelumna.

•   Pikkirhon na ikkon diulahon ho. Unang ma pittor salahon natua-tuamu, alai pikkirhon ma aha na boi diulahon ho asa tetap tenang situasina. Sahalak na poso na margoar si Jeffrey mandok, “Sipata na mambahen tamba balga parsoalanna, dang alani hata ni natua-tuamu alai caramu mananggapi hata ni nasida i do. Molo tetap ho tenang makkatai, boi do hatop sae masalahna.”

   Na didok Bibel: “Bahen hamu ma sian nasa tolapmuna lao mardame.”​—Rom 12:18.

•   Denggan ma tangihon. Si Samantha na marumur 17 taon mandok, “Manangihon natua-tuakku ma na ummaol di au. Alai molo denggan tatangihon natua-tuatta, nasida pe olo ma manangihon hita.”

   Na didok Bibel: “Ikkon hatop manangihon, manat makkatai.”​—Jakobus 1:19.

•   Anggap ma dongan satimmu natua-tuam. Attar songon na marbulu tangkis do pasaehon masalah. Dongan satimmu do natua-tuam, dang alomuna nasida. Masalahmuna i do na gabe alomuna. Sahalak na poso na margoar si Adam mandok, “Tikki adong masalah, sarupa do sebenarna tujuan ni natua-tua dohot ianakkonna. Lomo do roha ni natua-tua mangalehon solusi na terbaik tu ianakkonna, jala lomo do tong roha ni ianakkonna i mambahen solusi na terbaik tu dirina.”

   Na didok Bibel: “Marsitutu ma hamu mangulahon akka na mambahen dame.”​—Rom 14:19.

•   Attusi ma keadaan ni natua-tuam. Didok sahalak na poso na margoar si Sarah, “Gabe lebih sabar do au molo huingot adong do tong masalah na ikkon diadopi natua-tuakku, na bisa jadi sarupa borat ni masalahnami.” Asing ni i sahalak anak boru na margoar si Carla mandok, “Hubayakkon do boha molo au gabe natua-tuakku. Pasti dang mura mangurus sahalak dakdanak jala ikkon mangadopi masalah muse. Ikkon dipikkirhon do muse aha na terbaik tu gelleng.”

   Na didok Bibel: “Unang ma holan mamparrohahon na porlu di hamu, alai parrohahon ma na porlu di na asing.”​—Pilippi 2:4.

•   Oloi ma natua-tuam. Dijujui do di Bibel asa diulahon ho on. (Kolosse 3:​20) Gabe undenggan do situasina molo dioloi ho natua-tuam. Sahalak anak boru na margoar si Karen mandok, “Molo huoloi hata ni natua-tuakku dang pola stres au, alana dang pola ikkon marsoal hami. Nungnga godang pengorbanan ni nasida tu au. Jadi mangoloi nasida ma carakku mangargai nasida.” Mangoloi natua-tua ma cara na terbaik asa tetap kompak hamu.

   Na didok Bibel: “Molo so adong soban, mittop do api.”​—Poda 26:20.

 Tips. Molo songon na maol dihilala ho paboahon na di roham tu natua-tuamu, surat ma i di salembar harotas manang kirim lewat chat. Sahalak na poso na margoar si Alyssa mandok, “I ma na huulahon molo lagi dang lomo rohakku makkatai. Hasilna gabe dang husonggaki be natua-tuakku manang hudok hata na gabe husolsoli ujungna.”