Dongan na burju boi do mangurupi hita asa bahagia jala berhasil ngolutta. Jala dongan na burju i dang holan dirina na dipikkirhon. Alai diurupi do donganna asa mangulahon na denggan.—Poda 27:17.

 Alai didok di Bibel ikkon manat do hita mamillit dongan. Jala dipaboa do tu hita aha akibatna molo sala hita mamillit dongan. (Poda 13:20; 1 Korint 15:33) Alana, dongan na so denggan boi do i mambahen sasahalak gabe mambahen keputusan na sala, manang boi do i mambahen gabe sega sifatna na denggan.

Na diulas di artikel on

•  Songon dia do asa boi gabe dongan na burju?

•  Akka ise do na dipaboa di Bibel na akrab persahabatanna?

•  Boi do hita mardongan tu Debata?

•  Akka ayat ni Bibel na porlu diulahon asa boi gabe dongan na burju

 Didok di Bibel, boi denggan persahabatan ni sasahalak dang holan ala na sarupa kesukaanna manang hobina. Contohna Psalmen 119:63 mandok, “Mardongan do au tu sude halak na makkabiari Ho, a Dohot akka halak na sai mangulahon parettam.” Didok panurat ni Psalmen i, dipillit ibana do akka dongan na mambahen las roha ni Debata jala na mangulahon akka aturanna.

 Jala dipaboa do di Bibel, ikkon dipatudu sasahalak do sifat na denggan asa boi ibana didok dongan na burju. Contohna:

•   “Sai dipatudu ale-ale do holong ni roha Jala songon haha anggi do i tikki masa sitaonon.”—Poda 17:17.

•   “Adong do dongan na sai naeng mambahen na jahat tu donganna, Alai adong do dongan na ussolhot sian haha anggi.”—Poda 18:24.

 Akka ayat on paboahon, dongan na burju i ikkon setia, parholong, burju jala dang holit. Dongan na burju i pe ikkon boi do tong taandalhon lao mangurupi hita tikki adong problemta. Jala dongan na burju ikkon barani do pasingotton hita tikki taulahon na sala manang tikki tabahen keputusan na sala.—Poda 27:6, 9.

 Dipaboa do di Bibel contoh ni akka halak na denggan persahabatanna nang pe beda umurna, latar belakangna, kebudayaanna, dohot wewenangna. Adong tolu contohna.

•   Si Rut dohot si Naomi. Parumaen ni si Naomi do si Rut. Dao do uttua si Naomi sian si Rut jala beda hian do latar belakang dohot kebudayaan ni nasida. Alai nang pe songon i, akrab hian do nasida jala marsihaholongan.—Rut 1:16.

•   Si Daud dohot si Jonatan. Nang pe 30 taon uttua si Jonatan sian si Daud, alai didok di Bibel, “marale-ale” manang “marsipaleanan roha” do si Daud dohot si Jonatan.—1 Samuel 18:1.

•   Jesus dohot akka apostelna. Untimbo do wewenang ni Jesus sian akka apostelna. Alana, guru jala tuan ni akka apostel i do Jesus. (Johannes 13:13) Alai dang hea didok roha ni Jesus dang pantas akka apostelna i gabe donganna. Lomo do roha ni Jesus mardongan tu akka halak na olo mangulahon na diajarhon ibana. Didok Jesus, “Dohonokku ma hamu ale-alekku, ai nungnga hupaboa tu hamu sude naung hubege sian Damang i.”—Johannes 15:14, 15.

 Boi. Boi do jolma mardongan tu Debata. Bibel mandok, “Marale-ale do Ibana tu halak na tigor marroha.” (Poda 3:32) Maksudna, halak na boi gabe sahabat ni Debata i ma halak na burju, na jujur, halak na taat jala halak na mangulahon na sittong sesuai tu lomo ni roha ni Debata. Contohna didok do di Bibel si Abraham sahabat ni Debata ala setia ibana.—2 Kronika 20:7; Jesaya 41:8; Jakobus 2:23.