Songon dia do Ari Haroro ni Kristus i?
Na didok Bibel
Didok Bibel tikki ro Jesus lao manguhumi jolma a di ari na naeng ro, godang do na lao masa. Contohna didok do di Mateus 25:31-33,
“Molo ro Anak ni jolma i [Jesus Kristus] di bagasan hasangaponna, hundul ma ibana di tahtana na sangap i. Ro ma ibana rap dohot sude suru-suruan. Papunguonna ma sude bangso tu jolona jala sirangonna ma akka jolma, dos songon parmahan na manirang biru-biru sian hambing. Bahenonna ma biru-biru i di sabola kananna, alai hambing i di sabola kirina.”
Bagian sian “hasusaan bolon” na so hea masa do ari panguhuman i. Ujung ni hasusaan i, i ma porang Armagedon. (Mateus 24:21; Pangungkapon 16:16) Di ari i lao ‘dipamate ma saleleng ni lelengna’ akka musu ni Kristus na digombarhon songon hambing. (2 Tessalonik 1:9; Pangungkapon 19:11, 15) Alai lao ‘mangolu saleleng ni lelengna’ ma akka halak na setia na digombarhon songon biru-biru.—Mateus 25:46.
Andigan do ari haroro ni Kristus?
Didok Jesus do, “Taringot tu ari dohot jamna dang adong na mamboto i.” (Mateus 24:36, 42; 25:13) Alai, dipaboa Jesus do akka “tanda” na boi mangurupi akka halak mamboto naung jonok nama ari harorona. —Mateus 24:3, 7-14; Lukas 21:10, 11.
Boi do taida Jesus di tikki ro ibana?
Dang boi. Alana nungnga dipahehe be Jesus lao mangolu di surgo jala nungnga gabe suru-suruan na massai gogo ibana. Jadi dang boi be taida ibana. (1 Korint 15:45; 1 Petrus 3:18) Alani i ma hea didok Jesus tu akka siseanna, “Satokkin nai, dang idaon ni portibi on be au.”—Johannes 14:19.
Pandapot na sala taringot ari haroro ni Jesus
Pandapot na sala: Didok do di Bibel boi do diida akka halak Jesus “ro di atas ni ombun na di langit”. Berarti boi do taida Jesus tikki ro ibana.—Mateus 24:30.
Na sasittongna: Jotjot do dipakke Bibel istilah ombun lao patuduhon akka na so tarida. (3 Musa 16:2; 4 Musa 11:25; 5 Musa 33:26) Contohna, didok Debata do tu si Musa, “Ro nama Au di bagasan ombun na golap.” (2 Musa 19:9) Dang diida si Musa Debata. Dos songon i ma tikki ro Jesus “di atas ni ombun na di langit”, dang boi idaon ni jolma ibana. Alai, diboto nasida do na ro ibana.
Pandapot na sala: Tikki paboahon taringot haroro ni Jesus, Pangungkapon 1:7 mandok, “sude ma halak mangida ibana”. Berarti diida akka jolma do Jesus tikki ro.
Na sasittongna: Bahasa Junani na dipakke di Bibel tu hata “mata” dohot “mangida”, sipata dipakke do lao patuduhon halak na mamboto manang mangattusi sada informasi. Jadi dang holan tu halak na mangida langsung b dipakke hata i. (Mateus 13:15; Lukas 19:42; Rom 15:21; Epesus 1:18) Jala dung hehe Jesus didok di Bibel, “maringanan do ibana di na tiur na so boi jonohan ni manang ise pe . . . dang boi berengon ni jolma ibana.” (1 Timoteus 6:16) Jadi tikki didok Bibel “sude ma halak mangida ibana”, lapatanna sude do jolma mamboto na disuru Debata do Jesus lao manguhumi jolma.—Mateus 24:30.
Pandapot na sala: Didok di 2 Johannes 7, gabe jolma do Jesus tikki ro tu tano on.
Na sasittongna: Didok do di ayat i, “Nungnga godang akka panipu ro tu portibi on. Dang diakkui nasida Jesus Kristus ro tu tano on gabe jolma.”
Di jaman ni Apostel Johannes, adong do piga-piga halak na so mangakkui naung hea Jesus ro tu tano on gabe jolma. Didok do nasida kaum Gnostik. Jadi disurat ma ayat i lao patuduhon sala do na dihaporseai nasida i.
Mungkin Lomo do Rohamuna Mamboto
ALUS NI BIBEL
Aha do Porang Armagedon i?
Nang pe holan sahali hata Armagedon dipaboa di Bibel, alai aha na masa di porang i dipatorang do di godang ayat.
ALUS NI BIBEL
Aha do Hasusaan Bolon i?
Na didok taringot ‘surirang ari parpudi’ i ma hasusaan na paling maol na so hea dope diadopi jolma. Aha do na boi masa?
AJARAN SIAN BIBEL
Nungnga Mamaretta Harajaon ni Debata Mulai Taon 1914
Lobi sian 2.600 taon naung salpu, dipaboa Debata do aha na lao masa marhite nipi ni sahalak raja na marhuaso. Jala nungnga terjadi be i saonari.
KEGIATAN KHUSUS
Coba ma Marsiajar Bibel Dohot Hami
Dohot ma hamu marsiajar Bibel gratis na langsung diurupi sasahalak.