Perayaan Paskah on dang adong disurat di Bibel. Molo diida hamu sejarahna, diboto hamu ma lapatan ni perayaan i, i ma perayaan na adong hubunganna tu ritual kesuburan. Parrohahon ma hatorangan na mangihut.

1.   Goar: Didok di Encyclopædia Britannica, “Goar ni Paskah di bahasa Inggris, i ma Easter dang jelas asal usulna. Imam Anglo-Saxon Venerable Bede do na mambahen goar i di abad paualuhon. Goar i dibuat sian goar ni dewi musim semi, i ma Anglo-Saxon, Eostre.” Adong muse na mandok molo goar i adong kaitanna tu dewi Astarte, i ma dewi kesuburan Fenisia manang tu dewi Istar na dipaboa di kebudayaan ni Babilonia.

2.   Kelinci: Kelinci on adong do hubunganna tu lambang kesuburan, jala “dibuat do i sian ritual kuno dohot perayaan na dibahen halak kafir di musim semi di Eropa Timur dohot Timur Tengah”.—Encyclopædia Britannica.

3.   Tolor: Menurut Funk & Wagnalls Standard Dictionary of Folklore, Mythology and Legend, parmainan mangalului tolor ni Paskah i “dang holan parmainan ni dakdanak sambing. Alai adong do hubunganna i tu ritual kesuburan”. Jala di piga-piga kebudayaan, porsea do halak tikki dihias nasida tolor ni Paskah i, “boi do i mambahen nasida gabe bahagia, mamora, sehat jala aman”.—Traditional Festivals.

4.   Baju baru: Porsea do halak “molo dang dipakke nasida baju na baru tikki menyambut dewi Musim Semi Skandinavia, manang Eastre, dianggap do dang sopan nasida, jala boi do i parohon bencana”.—The Giant Book of Superstitions.

5.   Kebaktian subuh: Kebaktian on adong do hubunganna tu upacara kuno na dibahen halak na manomba mata ni ari. “Dibahen nasida ma on di tikki ekuinoks musim semi lao menyambut mata ni ari na dianggap boi parohon hangoluan tu sude toppaan.”—Celebrations—The Complete Book of American Holidays.

 Takkas do dipaboa di buku The American Book of Days taringot Paskah. Didok disi, “Sabotulna na diadopsi Gereja na parjolo i do perayaan ni halak kafir, jala dibahen nasida ma i gabe perayaan ni halak Kristen.”

 Dipaboa do di Bibel dang lomo roha ni Debata molo adong na mencampur ibadat tu Ibana dohot tradisi manang kebiasaan ni halak kafir. (Markus 7:6-8) Diparettahon Jahowa do tu hita di 2 Korint 6:17 asa ‘kaluar sian tonga-tonga ni nasida jala dang be manjama na ramun’. Jadi ala perayaan ni halak kafir do Paskah i, tottu halak na naeng mambahen las roha ni Jahowa dang olo mangarayahon i.