Dang adong jolma na boi mambahen dame saluhut tano on. Holan Harajaon ni Debata do na boi mangulahon i. Harajaon ni Debata, i ma sada pamarettaon na mamaretta sian surgo jala Jesus Kristus ma Rajana. Taida ma sian Bibel akka aha do na lao diulahon Debata asa dame saluhut tano on.

1.   Lao ‘dipaujung Debata do akka porang di saluhut tano on’. Dung i saut ma janjina lao mangalehon ‘hadameon tu akka halak na dihalomohon rohana di tano on’.—Psalmen 46:9; Lukas 2:14.

2.   Sian surgo do Harajaon ni Debata lao mamaretta tu saluhut tano on. (Daniel 7:14) Dung mamaretta Harajaon ni Debata tu saluhut tano on, dang na lao adong be nasionalisme na mambahen terjadi parporangan.

3.   Jesus do Raja ni Harajaon ni Debata. Digoari do tong ibana ”Pamimpin ni Hadameon”. Jala ‘dang na lao marujung hadameon’ bahenonna.—Jesaya 9:6, 7.

4.   Dang boi tinggal di Harajaon i akka halak na lomo rohana marbada. Alana “sogo do roha ni [Debata] tu manang ise pe na makkaholongi ulaon ni halak na kejam”.—Psalmen 11:5; Poda 2:22.

5.   Diajari Debata do rakyatna asa toktong mardame. Taringot on dipaboa do di Bibel, “Bahenonna do podang ni nasida gabe mata bajak. Jala tombak ni nasida gabe sasabi. Dang buaton ni akka bangso be podang lao mangalo bangso na asing. Jala dang marsiajar marporang be nasida.”—Jesaya 2:3, 4.

 Nungnga marjuta Saksi Jahowa di liat portibi on naung marsiajar carana gabe sibahen dame. (Mateus 5:9) Nang pe marragam sukunami jala ro sian 240 negara hami, dang olo hami marporang mangalo akka halak.