Hasusaan bolon i ma situasi na paling maol na hea diadopi jolma di tano on. Menurut surirang ni Bibel, lao masa ma hasusaan bolon i “di ari parpudi,” manang “panutup ni jaman on.” (2 Timoteus 3:1; Daniel 12:4) Di tikki i, masa ma “hasusaan bolon na so hea dope masa sian mulai adong portibi on sahat tu saonari. Jala dang na lao masa be i muse.”—Markus 13:19; Daniel 12:1; Mateus 24:21, 22.

Akka peristiwa saleleng hasusaan bolon

•   Agama palsu diripasson. Massai hatop do agama palsu tikki diripasson. (Pangungkapon 17:1, 5; 18:9, 10, 21) Kekuatan politik na diwakili Perserikatan Bangsa-Bangsa do na dipakke Debata lao mangulahon i.—Pangungkapon 17:3, 15-18. a

•   Agama na sittong diserang. Di sada parnidaan ni si Hesekiel, diida ibana ma “Gog na sian luat Magog,” lapatanna punguan ni akka bangso. Marsitutu do nasida lao mangaripasson akka halak na mandalatton agama na sittong. Alai, pasti linggoman ni Jahowa do akka naposona.—Hesekiel 38:1, 2, 9-12, 18-23.

•   Sude jolma lao diuhumi. Jesus lao manguhumi sude jolma jala “sirangonna ma akka jolma, dos songon parmahan na manirang biru-biru sian hambing.” (Mateus 25:31-33) Akka halak lao diuhumi Jesus hombar tu sikap manang dukungan ni nasida tu ‘haha anggina’, i ma dongan ni Jesus rap mamaretta di surgo.—Mateus 25:34-46.

•   Dipapungu ma nasida lao mamaretta di surgo. Akka dongan ni Jesus naung dipillit jala setia mamaretta ma nasida rap dohot Jesus. Lapatanna nungnga sae be tugas ni nasida di tano on jala dipahehe ma nasida lao mangolu di surgo.—Mateus 24:31; 1 Korint 15:50-53; 1 Tessalonik 4:15-17.

•   Armagedon. On “porang di ari na balga, i ma ari ni Debata Pargogo na So Hatudosan i” jala digoari do i muse “ari ni Jahowa.” (Pangungkapon 16:14, 16; Jesaya 13:9; 2 Petrus 3:12) Akka halak na naung diuhumi Kristus gabe parjahat diripasson ma nasida. (Sepania 1:18; 2 Tessalonik 1:6-10) Na lao dihancurhon do muse sistem politik ni portibi on, na digombarhon di Bibel gabe binatang buas na pitu uluna.—Pangungkapon 19:19-21.

Akka peristiwa dung masa hasusaan bolon

•   Sibolis dohot akka suru-suruan na jahat lao di hurung. Disappatton sada suru-suruan na massai gogo ma sibolis dohot akka suru-suruan na jahat tu “lombang na massai bagas.” Maksudna songon na mate ma nasida ala dang boi be mangaliluhon jolma. (Pangungkapon 20:1-3) Situasi ni sibolis na di bagasan lombang na massai bagas i sarupa ma i songon na di penjara.—Pangungkapon 20:7.

•   Pamarettaon Saribu Taon dimulai. Lao mamaretta ma Harajaon ni Debata saleleng 1.000 taon jala dilehon ma godang pasu-pasu tu sude jolma. (Pangungkapon 5:9, 10; 20:4, 6) “Punguan bolon” na so taretong godangna lao “malua sian hasusaan bolon,” jala idaon ni nasida ma dimulai pamarettaon Saribu Taon.—Pangungkapon 7:9, 14; Psalmen 37:9-11.