Dua hali ma disurat di Bibel taringot “Jerusalem na imbaru”. (Pangungkapon 3:​12; 21:2) On ma kota na manggombarhon punguan ni akka na mangihutton Jesus, naung dipillit asa tu surgo. Nasida ma na rap mamaretta dohot Jesus di Harajaon ni Debata. Di Bibel, didok do muse punguan on pengantin borua ni Kristus.

1.   Di surgo do Jerusalem na Imbaru i. Didok di Bibel, Jerusalem na Imbaru i turun sian surgo, jala dijaga akka suru-suruan do pintu masuk ni kota i. (Pangungkapon 3:​12; 21:​2, 10, 12) Massai bolak do kota on. Persegi do bentukna, jala keliling ni kota i hira-hira 2.200 kilometer. (Pangungkapon 21:16) Ganup sisi ganjangna hampir 560 kilometer. Molo adong kota di tano on na timbona 560 kilometer, nungnga sahat be timbona i tu luar angkasa. Jadi takkas ma, di surgo do kota on, dang di tano on.

2.   Jerusalem na Imbaru, i ma sada punguan ni akka na mangihutton Jesus, manang pengantin borua ni Kristus. Didok do muse, Jerusalem na Imbaru i do “pengantin borua i na laho gabe tunggane boru ni Anak ni Biru-biru i”. (Pangungkapon 21:​9, 10) Anak ni Biru-biru i manggombarhon Jesus Kristus. (Johannes 1:​29; Pangungkapon 5:​12) “Tunggane boru ni Anak ni Biru-biru i” manggombarhon halak Kristen na tading rap dohot Jesus di surgo. Di Bibel, dipatudos do hubungan ni Jesus dohot nasida songon suami istri. (2 Korint 11:2; Epesus 5:​23-​25) Asing ni i, adong 12 batu na gabe fondasi ni Jerusalem na Imbaru. Jala “tarsurat do sada sian goar ni 12 apostel ni [Kristus] di ganup batu i”. (Pangungkapon 21:14) Pas do on tu hatorangan na disurat di Epesus 2:20. Didok do disi, halak Kristen na dipillit lao mangolu di surgo, ‘dipajongjong di ginjang ni fondasi ni angka apostel dohot angka panurirang”.

3.   Sada pamarettaon do Jerusalem na Imbaru i. Najolo, ibukota ni Israel do Jerusalem. Disi ma Raja Daud, si Salomo, dohot pinompar ni nasida mamaretta sian “habangsa ni Jahowa”. (1 Kronika 29:23) Kota Jerusalem didok do “huta na badia”. On manggombarhon pamarettaon na diuluhon Debata marhite pinompar ni si Daud. (Nehemia 11:1) Jerusalem na Imbaru i pe didok do “kota na badia”. Kota on ma inganan ni akka na rap dohot Jesus lao ‘mamarenta tu saluhut tano on’.​—Pangungkapon 5:​9, 10; 21:2.

4.   Jerusalem na Imbaru parohon pasu-pasu tu akka jolma di tano on. Didok do di Bibel, Jerusalem na Imbaru i “turun sian banua ginjang, sian Debata”. Kota on ma na dipakke Debata lao mangurupi akka ulaon di tano on. (Pangungkapon 21:2) On patuduhon, Jerusalem na Imbaru i tarmasuk do bagian sian Harajaon ni Debata. Harajaon on do na dipakke Debata lao pasautton sakkapna di “tano on songon na di banua ginjang”. (Mateus 6:​10) On ma pasu-pasu na lao lehonon ni Debata tu akka jolma di tano on:

   •   Disesa ma dosa ni jolma. Di Jerusalem na Imbaru i adong “sunge aek hangoluan”. Mardalan ma aekna i sahat tu “angka hau hangoluan”. Akka hau on boi “pamalumhon angka bangso”. (Pangungkapon 22:​1, 2) Dipamalum ma akka jolma, jala gabe denggan ma muse hubungan ni nasida tu Debata. Disesa ma dosa ni nasida jala gabe sempurna, dos songon na dihalomohon Debata.​—Rom 8:​21.

   •   Gabe boi ma jolma marale-ale tu Debata. Ala mardosa, gabe dao ma jolma sian Debata. (Jesaya 59:2) Dung disesa dosa ni akka jolma, saut ma surirang on: “Joro ni Debata adong di tonga-tonga ni jolma. Maringanan ma Ibana rap dohot nasida jala gabe bangsona ma nasida. Jala Debata sandiri rap dohot nasida.”​—Pangungkapon 21:3.

   •   Dang adong be hasusaan dohot hamatean. Marhite Harajaonna, “apusan ni Debata ma nasa ilu-ilu sian mata ni nasida. Ndang adong be hamatean nang arsak ni roha, nang angguk-angguk, nang na hansit, ndang disi be”.​—Pangungkapon 21:4.