Asa boi sasahalak “masuk tu Harajaon ni Debata” ikkon adong do “kucci ni Harajaon” lao mambukka dalanna. (Mateus 16:19; Ulaon ni Apostel 14:22) a Dilehon Jesus do “kucci ni Harajaon banua ginjang” i tu si Petrus. Jadi tugas ni si Petrus ma paboahon tu akka halak, boi do nasida masuk tu Harajaon ni Debata molo dilehon tu nasida tondi parbadia.

Tu ise do dilehon kucci i?

 Dipakke si Petrus do kucci i lao mambukka dalan tu tolu kelompok na lao masuk tu Harajaon i:

1.   Halak Jahudi dohot na so Jahudi na mangihutton agama Jahudi. Dang leleng dung mate Jesus, dipapos si Petrus do akka halak na maragama Jahudi asa porsea nasida, Jesus do Raja ni Harajaon ni Debata. Dipaboa si Petrus do muse aha na ikkon diulahon nasida asa boi selamat. Jadi dibukka si Petrus do dalan tu nasida asa boi masuk tu Harajaon i, jala marribu ma halak na olo “manjalo hatana i”.​—Ulaon ni Apostel 2:​38-​41.

2.   Halak Samaria. Disuru do muse si Petrus tu halak Samaria. b Dipakke si Petrus do kucci Harajaon i tikki rap ibana dohot si Johannes ‘manangiakkon halak na disi asa dilehon tondi parbadia tu nasida’. (Ulaon ni Apostel 8:​14-​17) Gabe boi ma halak Samaria masuk tu Harajaon ni Debata.

3.   Na so halak Jahudi. Tolu satonga taon dung mate Jesus, dipaboa Debata do muse tu si Petrus, boi do tong halak na so Jahudi masuk tu Harajaon ni Debata. Jadi marbarita na uli ma si Petrus tu nasida, asa boi nasida mandapot tondi parbadia, gabe halak Kristen, jala gabe dongan ni Jesus mamaretta di Harajaon ni Debata.​—Ulaon ni Apostel 10:30-​35, 44, 45.

Aha do lapatan ni “masuk tu Harajaon ni Debata”?

 Akka halak na “masuk tu Harajaon ni Debata” ma na lao mamaretta dohot Jesus di surgo. Nungnga dipaboa hian di Bibel, nasida ma na “hundul di tahta” jala na ‘mamaretta tu saluhut tano on’.​—Lukas 22:29, 30; Pangungkapon 5:​9, 10.

Pandapot na sala taringot kucci ni Harajaon

 Pandapot na sala: Si Petrus do na mambahen keputusan taringot kucci ni Harajaon i.

 Na sasittongna: Tikki paboahon taringot kucci ni Harajaon ni Debata, didok Jesus ma tu si Petrus, “Manang aha naung diikkat ho di tano on, naung diikkat do i di banua ginjang. Jala manang aha naung dipalua ho di tano on, naung dipalua do i di banua ginjang.” (Mateus 16:19) Alani i ma adong halak na mandok si Petrus do na mambahen keputusan di surgo. Hape maksud ni ayat on di bahasa Junani, si Petrus holan mangihutton pengaturan naung dibahen Debata do, dang na gabe ibana na mangatur keputusan ni Debata.

 Dipaboa do muse di Bibel, dioloi si Petrus do paretta ni Debata tikki mamakke kucci ni Harajaon i. Misalna, tikki disuru Debata ibana mamakke kucci na patoluhon, olo do ibana mangulahon i.​—Ulaon ni Apostel 10:19, 20.