Istilah laut api na jotjot disurat di Bibel manggombarhon akka naung hancur saleleng ni lelengna. Sarupa do i tu istilah Gehena, alai dang sarupa tu api narokko. Alana hata api narokko manggombarhon keadaan ni halak na mate, na so boi mangulahon manang aha pe.

Sada gambaran do i

 Adong lima ayat ni Bibel na manuratton istilah “laut api”. Sude ayat i patuduhon holan sada gambaran do laut i. (Pangungkapon 19:20; 20:10, 14, 15; 21:8) Alana akka on ma na dipamasuk tu laut api i:

•   Sibolis. (Pangungkapon 20:10) Suru-suruan na so tarida do Sibolis i. Jadi dang boi api manutung ibana.​—2 Musa 3:2; Panguhum 13:20.

•   Hamatean. (Pangungkapon 20:14) Dang jolma manang barang hamatean i. Alai keadaan ni makhluk hidup na so mangolu do i manang na so aktif be. (Parjamita 9:​10) Jadi, dang boi hamatean ditutung.

•   “Binatang buas” dohot “panurirang na makkatahon na so tutu.” (Pangungkapon 19:20) Holan sada gambaran do dua istilah on. Jadi boi tadok laut api inganan ni nasida disappatton pe sada gambaran do.​—Pangungkapon 13:11, 12; 16:13.

Manggombarhon hamatean na saleleng ni lelengna

 Didok di Bibel “manggombarhon hamatean na paduahon” do laut api. (Pangungkapon 20:14; 21:8) Molo hamatean na parjolo, didok Bibel alani dosa ni si Adam do i. Halak na mate alani dosa ni si Adam boi do dipahehe. Jala di ari na naeng ro dang na lao adong be hamatean on.​—1 Korint 15:21, 22, 26.

 Alai asing do hamatean na paduahon tu hamatean na parjolo. Istilah hamatean na paduahon manggombarhon keadaan na so boi be mangulahon manang aha. Jala didok Bibel dang na lao dipahehe be akka halak na makkilala hamatean na paduahon. Misalna, didok Bibel adong do di Jesus “kucci ni hamatean dohot kucci ni Kuburan”. Lapatanna nungnga dilehon Debata huaso tu Jesus lao mambahen hehe akka halak na mate alani dosa ni si Adam. (Pangungkapon 1:​18; 20:13) Alai dang adong na maniop kucci ni laut api i, termasuk ma Jesus. Jadi takkas ma laut api i manggombarhon hamatean na saleleng ni lelengna.​—2 Tessalonik 1:9.

Sarupa tu istilah Gehena manang Rura Hinnom

 Adong 12 hali hata Gehena (Bahasa Junani geenna) disuratton di Bibel. Sarupa do istilah on tu istilah laut api na manggombarhon hamatean na saleleng ni lelengna. Adong do piga-piga terjemahan ni Bibel na manggatti istilah Gehena gabe hata “api narokko”. Alai sebenarna dang sarupa lapatan ni Gehena tu api narokko. (Bahasa Heber sheohl, Bahasa Junani haides).

 Sasittongna lapatan ni hata “Gehena”, i ma “Rura Hinnom”. Rura on adong di luar ni tembok Jerusalem. Di jaman ni halak Israel najolo, di rura on ma nasida mambolokkon sude sampah. Sengaja do dipasombu halak Israel mangolu api di rura on lao manutung akka sampah i. Molo adong sampah na so tartutung, diallang gilok-gilok ma i.

 Dipakke Jesus do istilah Gehena lao manggombarhon hamatean na saleleng ni lelengna. (Mateus 23:33) Didok Jesus, “inganan ni akka gilok-gilok na so ra mate dohot tu inganan ni api na so ra mittop” do Gehena i. (Markus 9:​47, 48) Jadi taringot keadaan di Rura Hinnom do na dihatai Jesus dohot surirang di Jesaya 66:24 na mandok, “Jala kaluar ma nasida, diida nasida ma bakke ni halak na mangalo tu Au. Akka gilok-gilok na mangallangi nasida dang olo mate, jala api na manutung nasida dang olo mittop.” Jadi taringot hamatean na saleleng ni lelengna do na dipaboa Jesus di tudosanna, dang taringot halak na disiksa saleleng ni lelengna. Alana bakke ni halak naung mate do na diallang gilok-gilok dohot na ditutung di Rura Hinnom, dang halak na mangolu.

 Dang adong dipaboa di Bibel adong halak na tetap mangolu dung disappatton tu Gehena. Jadi lao manggombarhon hamatean na saleleng ni lelengna do istilah “Laut api” dohot “Gehena na marsigorgor”.​—Pangungkapon 20:14, 15; 21:8; Mateus 18:9.

Aha do maksudna “dipaporsukporsuk arian dohot borngin ro di salelenglelengna”?

 Molo manggombarhon hamatean na saleleng ni lelengna do laut api i, boasa ma didok Bibel na lao “dipaporsukporsuk arian dohot borngin, ro di salelenglelengna” do disi Sibolis, binatang buas, dohot panurirang na makkatahon na so tutu? (Pangungkapon 20:10, Bibel LAI) Taida ma opat bukti na patuduhon dang tutu nasida dipaporsuk-porsuk manang disiksa:

1.   Asa boi Sibolis disiksa saleleng ni lelengna, ikkon mangolu saleleng ni lelengna do ibana. Hape didok Bibel na lao diripasson manang dipamate do Sibolis saleleng ni lelengna.​—Heber 2:​14.

2.   Silehon-lehon ni Debata do hangoluan na saleleng ni lelengna, dang hukuman.​—Rom 6:​23.

3.   Sada gambaran do binatang buas dohot panurirang na so tutu i. Jadi dang boi disiksa i.

4.   Molo tajaha akka ayat sebelum Pangungkapon 20:10 dohot akka ayat dukkon i, boi ma taattusi taringot hamatean na saleleng ni lelengna do na dipaboa di ayat i, dang taringot na dipaporsuk-porsuk manang disiksa.

 Hata “dipaporsukporsuk” di Bibel boi do tong lapatanna “pembatasan”. Misalna di piga-piga terjemahan Alkitab, dibahen do bahasa Junani ni ‘pamongkik’ (penyiksa) na adong di Mateus 18:34,Bibel LAI gabe “panjaga ni penjara”. On patuduhon adong do hubungan ni hata “disiksa” tu “pembatasan”. Asing ni i dipatudus do hata “hukuman” di Mateus 8:​29 tu hata “lombang na massai bagas” di Lukas8:​30, 31. Sude istilah i manggambarhon keadaan na so aktif manang hamatean. (Rom 10:7; Pangungkapon 20:​1, 3) Jala adong do piga-piga hali disurat istilah ‘dibahen na haccit’ manang ‘disiksa’ di buku Pangungkapon. Godangan ayat i holan paboahon sada gambaran do.​—Pangungkapon 9:5; 11:10; 18:​7, 10.