Memang dang adong dipaboa di Bibel taringot dinosaurus. Alai dipaboa di Bibel, Debata do na “manompa saluhutna”. Jadi boi ma tadok, tompaan ni Debata do tong dinosaurus i. a (Pangungkapon 4:​11) Nang pe dang dipaboa di Bibel taringot dinosaurus, alai adong do akka ayat na paboahon taringot binatang na balga, umpamana:

•   “Angka binatang laut na balga”.​—1 Musa 1:​21, Bibel siganup ari.

•   “Sude ragam ni binatang na mangolu”.​—1 Musa 1:​24, Bibel siganup ari.

•   “Angka binatang [liar] ni tano on”.​—1 Musa 1:​25.

Alani evolusi do umbahen na adong dinosaurus?

 Dang. Alana, dang adong hubungan ni fosil ni dinosaurus tu fosil ni akka binatang na asing. Jala dang adong bukti na patuduhon molo dinosaurus i adong alani evolusi. Pas do on tu hatorangan ni Bibel na paboahon, Debata do na manoppa sude binatang. Didok di Psalmen 146:6, Debata do “Sitompa langit dohot tano on dohot laut ro di isina sudena”.

Nandigan do dinosaurus mangolu?

 Dipaboa di Bibel, di ari palimahon dohot paonomhon do Debata manoppa sude binatang na di laut dohot di darat. b (1 Musa 1:​20-​25, 31) Sian on boi ma taboto, leleng do ra mangolu dinosaurus i.

Boasa dang adong be dinosaurus?

 Dang dipaboa di Bibel boasa dang adong be dinosaurus. Alai didok di Bibel, ‘alani lomo ni roha ni Debata’ do umbahen na ditompa sasude. (Pangungkapon 4:​11) Tottu adong do tujuan ni Debata manoppa dinosaurus. Alai dung saut tujuanna i, diloas Debata do mate angka dinosaurus i.