Dang adong dipaboa di Bibel di tanggal piga jala di bulan piga Jesus Kristus tubu, songon na didok piga-piga referensi on:

•   “Dang taboto nandigan do sebenarna Jesus tubu.”—New Catholic Encyclopedia.

•   “Dang taboto nandigan do pastina tanggal lahir ni Jesus.”—Encyclopedia of Early Christianity.

 Nang pe dang adong disurat di Bibel ‘Nandigan do Jesus tubu?’, alai adong do dua peristiwa na boi mangurupi hita mangattusi dang mungkin di tanggal 25 Desember Jesus tubu.

Dang di musim salju ibana tubu

1.   Pendaftaran penduduk. Piga-piga ari andorang so tubu Jesus, dilehon Kesar Agustus ma paretta asa “didaftarhon sude jolma na di luatna i diri ni nasida”. Alani i, ikkon mulak ma akka halak “tu huta hatubuanna be lao mandaftarhon dirina”. Tikki i, molo naeng lao hita tu luat na asing, olo do sappe saminggu manang lobi hita di pardalanan asa sahat disi. (Lukas 2:1-3) Dibahen Kesar pe paretta i, asa boi do buatonna pajak sian rakyatna, jala asa boi do dipillit ibana akka bawa lao gabe tentara. Sebenarna, dang lomo roha ni rakyat mangulahon paretta i. Alani i, dang mungkin disuru Kesar Agustus be rakyatna mangulahon paretta na borat songon i tikki musim salju.

2.   Akka biru-biru. “Di tikki i, di ladang do akka parmahan na di luat i marborngin lao manjaga biru-biru ni nasida.” (Lukas 2:8) Bukku Daily Life in the Time of Jesus paboahon, mulai sian “saminggu andorang so Paskah [di akhir ni Maret]”, sahat tu parsitongaan ni November ma tikki na pas lao mamboan biru-biru tu ladang. Didok muse di bukku i, “Di bagasan kandang do dibahen biru-biru saleleng musim salju. Jadi boi tadok, sala do hasomalan mangarayahon ari Natal di musim salju. Alana molo tajaha di Bukku Injil, di ladang do akka parmahan manjaga biru-biruna tikki i.”

Tubu di awal Oktober

 Boi do taboto nandigan Jesus tubu molo taetong mundur sian ari hamamatena. Jesus mate di ari Paskah 14 Nisan taon 33 M, hira-hira di tanggal 1 April. (Johannes 19:14-16) Tikki dimulai Jesus pelayananna, hira-hira marumur 30 taon ma ibana. Jala tolu satonga taon ma ibana mangulahon pelayananna i. Jadi molo taetong, sebenarna di awal Oktober taon 2 SM do Jesus tubu.—Lukas 3:23.

 Ala dang adong bukti na patuduhon molo Jesus tubu di tanggal 25 Desember, boasa ma dibahen perayaan Natal di tanggal i? Encyclopædia Britannica paboahon, dipillit akka pamimpin ni gareja pe tanggal i olo do ra ”asa boi do sarupa tanggalna tu perayaan ni halak Romawi na manomba akka dewa, i ma ‘partubu ni mataniari na so taralo’”. Perayaan i dibahen nasida lao mangarayahon titik balik ni mataniari di musim dingin. The Encyclopedia Americana paboahon, godang do pakar na mandok dibahen pe songon i ”asa pos do roha ni halak Romawi naung gabe Kristen di tikki i tu ajaran ni halak Kristen”.