Mabiar do hita mate, jala sai hira “musu” do di hita hamatean i. Alani i, berupaya do hita asa boi ganjang umurta. (1 Korint 15:26) Alai di tikkitta saonari, godang do akka ajaran na so sittong dohot cerita na dibahen-bahen taringot hamatean na mambahen hita gabe mabiar. Bibel mandok, “Nungnga diparhatoban biar ni roha tu hamatean i akka halak saleleng ngolu ni nasida.” (Heber 2:​15) Aha do na didok ni Bibel taringot hamatean? Molo diboto hatorangan na sittong taringot hamatean, boi do i mangurupi hamu asa unang pabiarhu tu hamatean.​—Johannes 8:​32.

Hatorangan na sittong taringot hamatean

•   Dang diboto sasahalak na mate agia aha. (Psalmen 146:4) Disarupahon do halak na mate i songon halak na modom. Jadi dang porlu mabiar hita disiksa molo dung mate.​—Psalmen 13:3; Johannes 11:11-​14.

•   Dang boi halak naung mate mangganggu hita. Bahkan akka halak na jahat naung mate pe “dang margogo nasida mangalo hamatean”. (Jesaya 26:14) Bibel mandok, “Dang boi be nasida patuduhon holong dohot sogo ni roha.”​—Parjamita 9:6.

•   Dang ujung ni sasudena hamatean i. Marjanji do Debata, adong do tikkina dipahehe Ibana akka halak na naung mate.​—Johannes 5:​28, 29; Ulaon ni Apostel 24:15.

•   Marjanji do Debata “dang adong be hamatean” haduan. (Pangungkapon 21:4) Didok Bibel do muse, “Lehononna do tano on gabe parbagianan ni halak na tigor marroha, jala mangolu ma nasida disi saleleng ni lelengna”, dang adong be hamatean.​—Psalmen 37:29.