Aha do na Didok Bibel Taringot Perawan Maria?
Na Didok Bibel
Didok Bibel dilehon Debata do hasangapon tu si Maria, omak ni Jesus, hasangapon na so dilean tu halak na asing. Ditubuhon ibana do Jesus tikki na marbaju dope (perawan) ibana. Disurat do on di bukku Mateus dohot Lukas. Jala andorang so masa on nungnga dipaboa hian i di bukku Jesaya.
Tikki paboahon taringot hatutubu ni Messias, didok Panurirang Jesaya do, “Hamil ma sahalak anak boru. Ditubuhon ibana ma sada anak.” (Jesaya 7:14) Ditogu-togu tondi parbadia do panurat ni bukku Mateus lao patuduhon si Maria do sebenarna na dipaboa di surirang ni si Jesaya. Dung disurat ibana alani tondi parbadia do si Maria hamil, didok ibana ma, “Masa pe na masa on, asa saut do hata ni Jahowa marhite panurirangna na mandok, ‘Ida ma! Na lao hamil ma sahalak na marbaju. a Ditubuhon ibana ma sada anak jala dibahen goarna Immanuel,’ lapatanna ‘Didongani Debata do Hita.’”—Mateus 1:22, 23.
Disurat si Lukas do tong taringot si Maria na hamil marhite tondi parbadia. Didok ibana disuru Debata do suru-suruan Gabriel “mandapotton anak boru na margoar si Maria. Nungnga martunangan ibana dohot sahalak bawa sian pinoppar ni si Daud na margoar si Josep”. (Lukas 1:26, 27) Sian hata ni si Maria sandiri pe patuduhon na marbaju dope ibana, manang perawan. Dung diboto ibana na lao gabe omak ni Messias ibana, disukkun ma, “Songon dia ma i boi masa? Ai so adong dope suamikku.”—Lukas 1:34.
Boasa boi sahalak perawan manubuhon anak?
Marhite tondi parbadia do si Maria hamil, i ma gogo na dipakke Debata lao pasauton lomo ni rohaNa. (Mateus 1:18) Didok do tu si Maria, “Na lao songgop ma tondi parbadia tu ho jala huaso ni Debata ma na mangalinggomi ho. Alani i, badia ma dakdanak i jala na lao didok ma ibana Anak ni Debata.” b (Lukas 1:35) Marhite tondi parbadia, dipapinda Debata ma hangoluan ni Jesus tu bortian ni si Maria, gabe hamil ma ibana.
Boasa ikkon sian sahalak perawan Jesus tubu?
Dung dipapinda Debata hangoluan ni Jesus tu bortian ni si Maria, dilinggomi tondi parbadia do ibana di bortian ni si Maria asa boi tetap sempurna. (Lukas 1:35) Jadi ala tu bortian ni si Maria na perawan do dipapinda Debata hangoluan ni Jesus, sempurna do Jesus tikki gabe jolma. Alani i gabe boi ma Jesus paluahon jolma sian dosa dohot hamatean.—Johannes 3:16; Heber 10:5.
Dung tubu Jesus, sempurna do ibana. Sarupa do ibana songon si Adam sebelum mardosa. Songon on ma didok Bibel taringot Jesus, “Dang mardosa ibana”. (1 Petrus 2:22) Alani i, boi ma ibana gabe tobusan na lao paluahon jolma sian dosa dohot hamatean.—1 Korint 15:21, 22; 1 Timoteus 2:5, 6.
Torus do si Maria perawan?
Dang adong didok di Bibel na torus si Maria perawan saleleng ni ngoluna. Alana didok Bibel adong do gelleng ni si Maria na asing.—Mateus 12:46; Markus 6:3; Lukas 2:7; Johannes 7:5.
Didok di Bibel adong do piga-piga adek ni Jesus
Sarupa do hatutubu ni Jesus tu ajaran “Dikandung Tanpa Noda Dosa”?
Daong. Menurut New Catholic Encyclopedia, ajaran Dikandung Tanpa Noda Dosa, manang Imakulata, “i ma haporseaon na mandok dang mardosa Perawan Maria mulai sian di bortian ni omakna ibana. Sude do jolma mardosa . . . Alai ala mandapot HASANGAPON si Maria, dang dohot ibana manean dosa na sian si Adam.” c
Alai, dang hea didok di Bibel na so dohot si Maria manean dosa na sian si Adam. (Psalmen 51:5; Rom 5:12) Gariada dipatudu si Maria do jolma na mardosa ibana. Misalna dilehon ibana do pelean hasesaan ni dosa songon na diparettahon di Patik ni si Musa tu akka borua na baru partus. (3 Musa 12:2-8; Lukas 2:21-24) New Catholic Encyclopedia mandok, ”Dang adong bukti di Bibel na patuduhon Dikandung Tanpa Noda Dosa si Maria . . . holan ajaran na dibahen gareja do i.”
Ikkon tasomba do si Maria?
Togu do haporseaon ni si Maria, unduk do ibana, marserep ni roha, jala holong do rohana tu Debata. Ibana ma sada sian naposo ni Debata na setia jala na porlu tatiru.—Heber 6:12.
Nang pe mandapot hasangapon si Maria gabe omak ni Jesus, dang hea didok di Bibel ikkon tasomba jala martangiang hita tu ibana. Jesus pe dang hea mambahen omakna gabe lobi istimewa sian na asing. Jala dang hea disuru ibana akka siseanna mambahen songon i tu omakna. Buktina, asing ni di Bukku Injil, holan sahali do disurat goar ni si Maria di bukku Ulaon Apostel. Dang hea dipaboa goarna di 22 bukku na asing di bukku Junani Kristen na digoari Perjanjian Baru.—Ulaon ni Apostel 1:14.
Dang hea disurat di Bibel na gabe istimewa si Maria dibahen akka halak Kristen di abad na parjolo, manang gabe disomba nasida ibana. Didok di Bibel holan Debata do na boi tasomba.—Mateus 4:10.
a Di surirang ni si Jesaya hata Heber na dipakke, i ma almah. Hata on boi do lapatanna sahalak borua na perawan, manang na so perawan. Alai di bukku Mateus hata Junani na dipakke, i ma parthenos. Holan tu borua na perawan do dipakke hata on.
b Adong do piga-piga halak na so setuju tu istilah “Anak ni Debata”. Alana menurut nasida istilah i patuduhon hira na mangulahon seks ma Debata dohot sahalak borua. Hape dang hea songon i didok di Bibel. Di Bibel, didok do Jesus i “Anak ni Debata” jala “na parjolo ditoppa sian saluhutna”. Alana holan Jesus do na langsung ditoppa Debata jala ibana do toppaan ni Debata na parjolo. (Kolosse 1:13-15) Di Bibel pe didok do si Adam “anak ni Debata”. (Lukas 3:38) Alana Debata do na manoppa si Adam.
c Edisi Paduahon, Jilid 7, halaman 331.
Mungkin Lomo do Rohamuna Mamboto
ALUS NI BIBEL
Tutu do si Maria i Ina ni Debata?
Sian Bibel dohot sian sejarah ni halak Kristen, boi do takkas taboto taringot on.
TIRU MA HAPORSEAON NI NASIDA
Si Maria—”Naposo ni Tuhan I do Ahu”
Songon dia do si Maria marpos ni roha mangalusi si Gabriel? Aha do parange na asing na pinatudu ni si Maria?
ALUS NI BIBEL
Hea do Jesus Menikah? Adong do Adek ni Jesus?
Ala dang hea dipaboa di Bibel na menikah do Jesus manang na dang, boasa boi tapastihon na so menikah Jesus?
SPECIAL CAMPAIGN
Coba ma Marsiajar Bibel Dohot Hami
Dohot ma hamu marsiajar Bibel gratis na langsung diurupi sasahalak.