Songon dia do Tangiang na Dijalo Debata—Holan Tangiang Ale Amanami do?
Alus ni Bibel
Adong do tangiang na diajarhon Jesus tu akka siseanna. Ai tikki i didok akka siseanna do tu Jesus, “Tuan, ajari ma hami martangiang.” (Lukas 11:1) Tangiang na diajarhonna i boi mangurupi hita mamboto songon dia hita ikkon martangiang jala akka aha na ikkon tatangiakkon. Jotjot do tangiang on didok Tangiang Ale Amanami. Alai dang holan tangiang i na dijalo Debata. a Jesus holan mangalehon sada contoh do tu akka siseanna songon dia tangiang na ditangihon Debata.
Na lao dibahas di artikel on
Aha do na dipaboa di tangiang na diajarhon Jesus i?
Tangiang na diajarhon Jesus na disurat di Mateus 6:9-13, marasing-asing do diterjemahon di piga-piga terjemahan ni Bibel. On ma dua contohna.
Terjemahan Bibel Tano na Imbaru: “Ale Amanami na di banua ginjang, sai dipabadia ma goarmu. Sai ro ma Harajaonmu. Sai saut ma lomo ni roham di tano on songon na di banua ginjang. Lehon ma di hami sipanganon sadari on. Sesa ma dosanami songon hami naung manesa dosa ni halak na mardosa tu hami. Urupi ma hami asa unang targoda jala palua ma hami sian Sibolis.”
Bibel King James Version: “Ale Amanami na marhabangsa di banua ginjang, dipabadia ma goarmu. Ro ma harajaonmu. Saut ma lomo ni roham di tano on songon na di banua ginjang. Lehon ma di hami roti sadari on. Sesa ma dosanami, songon hami naung manesa dosa ni halak na asing. Unang ma loas hami diunjuni, alai palua ma hami sian na jahat.” b
Aha do arti ni tangiang na diajarhon Jesus i?
Tangiang na diajarhon Jesus i sesuai do tu akka ayat na disurat di Bibel, jadi boi do pos rohatta akka ayat na asing pe boi do paboahon aha arti ni tangiang na diajarhon Jesus i.
“Ale Amanami na di banua ginjang”
Tutu do Debata i songon ‘Ama’ di hita, alana Ibana do na manoppa hita jala na mangalehon hangoluan tu hita.—Jesaya 64:8.
“Sai dipabadia ma goarmu”
Ikkon tapabadia jala ikkon tapasangap do goar ni Debata, i ma Jahowa. Sada caratta lao pabadiahon goar ni Debata, i ma paboahon akka sifatna tu akka halak jala paboahon aha na lao bahenon ni Debata di ari na naeng ro.—Psalmen 83:18; Jesaya 6:3.
“Sai ro ma Harajaonmu”
Harajaon ni Debata on, i ma harajaon na mamaretta sian surgo, jala Rajana i ma Jesus. Diajarhon Jesus do tu hita asa tatangiakkon harajaonna i asa mamaretta tu sude liat portibi on.—Daniel 2:44; Pangungkapon 11:15.
“Sai saut ma lomo ni roham di tano on songon na di banua ginjang”
Dos songon di surgo na so adong hajahaton dohot hamatean, songon i ma haduan na lao bahenon ni Debata tu tano on. Mangolu salelengna ma jolma, dame ma ngolu ni nasida jala aman.—Psalmen 37:11, 29.
“Lehon ma di hami sipanganon sadari on”
Tikki di tano on Jesus, roti do makanan pokok ni akka jolma. On paingotton hita molo porsea hita tu Sitoppa hita, pasti lehononna do sude akka na tahaporluhon asa boi hita toktong mangolu.—Ulaon ni Apostel 17:24, 25.
“Sesa ma dosanami songon hami naung manesa dosa ni halak na mardosa tu hami”
Konteks di ayat on, hata “utang” berkaitan do tu dosa. (Lukas 11:4) Sude do jolma mardosa jala porlu do diampuni dosa ni nasida. Jadi molo lomo rohatta asa diampuni Debata dosatta, hita pe ikkon olo do mangampuni dosa ni akka halak na mardosa tu hita.—Mateus 6:14, 15.
“Urupi ma hami asa unang targoda jala palua ma hami sian Sibolis”
Dang hea Jahowa manguji hita marhite na jahat. (Jakobus 1:13) Alai “Sijahat” manang Sibolis do na manguji hita, jala didok do muse ibana ‘Panggoda’. (1 Johannes 5:19, surat na di toru; Mateus 4:1-4) Alani i, tapangido ma tu Jahowa asa diurupi hita toktong setia tu Ibana tikki adong na manguji hita lao mangulahon na sala.
Holan tangiang na diajarhon Jesus i do na ditangihon Debata?
Sebenarna tangiang na diajarhon Jesus i holan sada contoh do i, dang tangiang na ikkon tahapal hata-hatana manang tangiang na ikkon mulak-ulak tadokkon. Ai sebelum dipaboa Jesus tangiang i didok ibana do, “Tikki martangiang hamu, unang ma mulak-ulak dokkon hamu hata na sarupa.” (Mateus 6:7) Tikki di kesempatan na asing, dipaboa Jesus do muse contoh ni tangiang jala hata na berbeda do dipakke ibana.—Lukas 11:2-4.
Tikki martangiang hita tapaboa ma sude aha na di bagas roha dohot pikkiratta, alana lomo do roha ni Debata manangihon tangiang sisongon i.—Psalmen 62:8.
Ikkon songon dia do hita martangiang?
Tangiang na diajarhon Jesus, i ma sada contoh tangiang na ditangihon Debata. Parrohahon ma songon dia i sesuai tu akka ayat ni Bibel taringot tangiang.
Martangiang holan tu Debata
Ayat ni Bibel: “Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon.”—Pilippi 4:6.
Artina: Ikkon holan tu Debata do hita martangiang, dang tu Jesus, tu si Maria, manang tu akka santo. Di mula ni tangiang na diajarhon Jesus i didok do, “Ale Amanami”, on patuduhon ikkon holan tu Debata Jahowa do hita martangiang.
Tangiakkon ma akka na sesuai tu lomo ni roha ni Debata
Ayat ni Bibel: “Manang aha na tapangido sesuai tu lomo ni rohana, tangihononna do hita.”—1 Johannes 5:14.
Artina: Manang aha pe boi do tatangiakkon, alai ikkon sesuai do i tu lomo ni roha ni Debata. Tikki didok Jesus di tangiang na diajarhonna i “sai saut ma lomo ni roham”, on patuduhon massai penting do taboto lomo ni roha ni Debata. Molo taparsiajari Bibel, taboto ma aha do lomo ni roha ni Debata tu tano on dohot tu jolma.
Manangiakkon akka masalah pribadi
Ayat ni Bibel: “Pasahat ma holso ni roham tu Jahowa, sai urupanna do ho.”—Psalmen 55:22.
Artina: Parduli do Debata tu akka masalahta. Songon na didok Jesus di Tangiang Ale Amanami, boi do tapangido akka na porlu di hita. Contohna, boi do tatangiakkon akka kebutuhanta sehari-hari, asa diurupi hita mambahen keputusan na denggan, asa diurupi hita tikki adong masalahta, jala mangido asa disesa dosanta. c
a Contohna di kesempatan na asing, tikki martangiang Jesus dohot akka siseanna dang persis songon hata na di Tangiang Ale Amanami i na dipakke nasida.—Lukas 23:34; Pilippi 1:9.
b Di Bibel King James Version, di bagian ujung ni Tangiang Ale Amanami i songon on ma dibahen, “Ai ho do nappuna harajaon, dohot huaso, dohot hamuliaon, saleleng ni lelengna. Amen.” Hata na di ayat on sada ungkapan lao mamuji Debata, jala adong do on di piga-piga terjemahan Bibel na asing, jala jotjot do on didok kidung pujian. Alai The Jerome Biblical Commentary mandok, “Kidung pujian on . . . dang adong on disurat di terjemahan ni Bibel na boi dihaporseai [akka manuskrip].”
c Molo merasa sasahalak mangulahon dosa jala porlu ikkon diampuni dosana, ikkon martangiang do ibana tu Debata. Alana didok Jahowa do tu nasida, “Ro ma hamu, asa tapasae akka parsoalatta.” (Jesaya 1:18) Olo do Jahowa mengampuni halak na mardosa molo marsitutu ibana mangido i.
Mungkin Lomo do Rohamuna Mamboto
JOUJOU PABOAHON
Boasa Pola Martangiang?
Hea dihilala hamu hira na so dibege Debata tangiangmuna? Dang holan hamu na makkilala songon i.
AJARAN NI BIBEL NA PENTING
Ditangihon Debata do Sude Tangiang?
Boha molo adong halak na egois martangiang tu Debata? Boha molo adong bawa na mamukkuli istrina, alai dukkon i martangiang ibana tu Debata?
JOUJOU PABOAHON
Boasa Dang Dialusi Debata Sude Tangiang?
Dipaboa Bibel do akka aha na mambahen Debata dang olo mangalusi tangiang.
JOUJOU PABOAHON
“Sai Ro ma Harajaonmu”—Jotjot do on Ditangiakkon Marjuta Halak
Sukkun-sukkun aha do taringot Harajaon ni Debata na ikkon taalusi, asa taboto lapatan ni tangiang i?
TARINGOT HAMI
Ro tu Parpunguan
Lului ma hatorangan taringot parpunguannami. Lului ma alamat na unjonok tu ingananmuna.