Di akka drama na dibahen di perayaan Natal, dipatudu do adong ro “tiga orang bijak” manang “tiga raja” mangida Jesus na baru tubu. Hape molo tajaha di Bibel, dang hea dipakke istilah i tu akka halak na ro mangida Jesus. (Mateus 2:1) Alai dipakke panurat bukku Mateus do hata Junani magoi, na lapatanna halak na mangida bintang lao manjujur ari (ahli astrologi) manang datu. a Molo di Bibel terjemahan na asing digoari do nasida “ahli bintang” manang “orang majus”. b

•  Piga halak do akka “orang bijak” na ro tikki i?

•  Tutu do raja akka “orang bijak” i?

•  Akka ise do goar ni “orang bijak” i?

•  Nandigan do akka “orang bijak” i ro mangida Jesus?

•  Debata do na manogu-nogu akka “orang bijak” i mamakke “bintang” Betlehem?

 Piga halak do akka “orang bijak” na ro tikki i?

 Dang adong dipaboa di Bibel piga halak nasida. Jala marragam do pandapot ni akka halak taringot godang ni nasida. Encyclopedia Britannica mandok, “Didok akka halak na sian Timur, 12 halak do halak Majus i. Alai didok akka halak na sian Barat, tolu halak do nasida. Didok nasida pe songon i olo do ra ala tolu macam hadiah na diboan nasida tu dakdanak i, i ma ‘mas, haminjon, dohot mir’ (Mateus 2:11).”

 Tutu do raja akka “orang bijak” i?

 Di akka drama Natal, jotjot do dibahen akka “orang bijak” i songon raja. Alai dang hea dipaboa di Bibel na raja do nasida. Didok Encyclopedia Britannica, marratus taon dung tubu Jesus, godang do “ditamba-tambai akka halak cerita taringot partubu ni Jesus”. Jala godang do halak mandok raja do akka “orang bijak” i.

 Akka ise do goar ni “orang bijak” i?

 Dang adong dipaboa di Bibel ise goar ni akka ahli bintang i. The International Standard Bible Encyclopedia mandok, “Mangihutton cerita dongeng do goar na dibahen tu nasida (si Gaspar, si Melkhior, dohot si Balthasar).”

 Nandigan do akka “orang bijak” i ro mangida Jesus?

 Olo do ra dung marumur piga-piga bulan Jesus tikki ro akka ahli bintang i. Tikki i dibahen Raja Herodes do paretta asa dibunu sude dakdanak bawa na marumur dua taon tu toru. Boasa ikkon na marumur dua taon tu toru? Alana songon i do hatorangan dapot ni Raja Herodes sian akka ahli bintang i.—Mateus 2:16.

 Jadi dang di borngin partubu ni Jesus i ro akka ahli bintang i. Bibel pe mandok, “Dung masuk nasida tu inganan i, diida nasida ma dakdanak i rap dohot omakna si Maria.” (Mateus 2:11) Sian on gabe taboto ma, nungnga di sada inganan manang di sada jabu be Jesus rap dohot natua-tuana. Dang poso-poso be Jesus tikki i, na di bagasan palakka manang palungan.—Lukas 2:16.

 Debata do na manogu-nogu akka “orang bijak” i mamakke “bintang” Betlehem?

 Adong halak na mandok, Debata do na mangirim bintang Betlehem lao manogu-nogu akka ahli bintang i tu Jesus. Alai dang toho i. Taida ma piga-piga buktina.

•   Tu Jerusalem do mulana akka ahli bintang i ditogu-togu na songon bintang i. Bibel mandok, “Dung i, ro ma akka datu na sian Timur tu Jerusalem. Disukkun nasida ma, ‘Didia do raja ni halak Jahudi na baru tubu i? Tikki di Timur hami, huida hami do bintang na manogu-nogu hami tu ibana. Alani i ma ro hami naeng marsomba tu ibana.’”—Mateus 2:1, 2.

•   Raja Herodes do na mamarettahon akka ahli bintang i lao tu Betlehem, dang na ditogu-togu na songon bintang i nasida tusi. Tikki dibege si Herodes na lao adong “raja ni halak Jahudi” asing ni ibana, dilului ibana ma informasi taringot didia do Kristus na dijanjihon i tubu. (Mateus 2:2-6) Dung diboto si Herodes na lao tubu di Betlehem do Kristus, disuru ibana ma akka ahli bintang i lao tusi jala disuru do muse nasida mulak tu Jerusalem paboahon i tu ibana.

   Dung dapot ni akka ahli bintang i informasi sian si Herodes, baru ma lao nasida tu Betlehem. Bibel mandok, “Borhat ma nasida dung dibege paretta ni raja i. Diida nasida ma muse bintang na niida ni nasida tikki di Timur. Ditogu-togu bintang i ma nasida, jala torus ma diihutton nasida bintang i sappe so bintang i di atas ni jabu inganan ni dakdanak i.”—Mateus 2:9.

•   Alani na songon bintang i do gabe naeng dipamate Jesus jala gabe dipamate akka dakdanak na so marsala. Tikki naeng mulak akka ahli bintang i sian Betlehem, dipasingot Debata do nasida asa unang mulak muse tu si Herodes.—Mateus 2:12.

 Ala dang mulak muse akka ahli bintang i tu si Herodes, Bibel mandok, “Dung diboto si Herodes naung dipaoto-oto akka datu i ibana, muruk situtu ma ibana. Diparettahon ma asa dibunu sude dakdanak bawa na di Betlehem dohot na di sakalilingna. Ikkon dipamate do sude bawa na marumur dua taon tu toru, sesuai tu perkiraan na dipaboa akka datu i.” (Mateus 2:16) Jadi dang mungkin Debata na mambahen tindakan na kejam i terjadi.—Job 34:10.