1 Petrus 1:1-25
1 Sian si Petrus apostel ni Jesus Kristus mandapothon angka na tarpillit na manompang jala na marserak di Pontus, Galatia, Kappadosia, Asia, dohot Bitinia.
2 Dipillit Debata Ama i do hamu hombar tu sangkapna hian. Dipabadia do hamu marhite tondi parbadia asa gabe pangoloi jala ias hamu marhite mudar ni Jesus Kristus.
Anggiat ma lam tamba asi ni roha ni Debata na mansai balga i dohot hadameonna di hamu.
3 Tapuji ma Debata, Ama ni Tuanta Jesus Kristus. Ai marhite asi ni rohana na balga i ditubuhon do hita muse, asa marpangkirimon na togu marhite haheheon ni Jesus Kristus sian na mate.
4 Dilehon Ibana do tu hita warisan* na so olo busuk, na so ramun jala na so olo sega. Disimpan do warisan i di banua ginjang laho tu hamu.
5 Ala porsea hamu, dilinggomi huaso ni Debata ma hamu asa dapotmuna haluaon na naeng dipapatar di ujung ni jaman on.
6 Alani i ma hamu marlas ni roha situtu, nang pe ingkon marsitaonon hamu satongkin binahen ni marragam pangunjunan.
7 Parohon pujian, hamuliaon, dohot hasangapon do haporseaonmuna naung taruji i tingki dipapatar Jesus Kristus. Ummarga do i sian mas na olo sega nang pe naung ditutung* mas i dohot api.
8 Nang pe ndang hea diida hamu ibana, dihaholongi hamu do ibana. Nang pe ndang diida hamu ibana saonari, dipatuduhon hamu do haporseaon tu ibana jala marlas ni roha situtu do hamu, i ma las ni roha na balga jala na so tarhatahon.
9 Ai pos do rohamuna dapotmuna haluaon i alani haporseaon.
10 Haluaon i do na manat dilului jala diparsiajari angka panurirang. Disurirangkon nasida do taringot tu asi ni roha ni Debata na mansai balga i na pinatuduna tu hamu.
11 Sai dilului nasida do aha na laho masa tu Kristus jala andigan i masa, ala nunga dipaboa tu nasida marhite panogu-noguon ni tondi parbadia taringot tu sitaonon ni Kristus dohot hasangapon na laho jaloonna.
12 Dipaboa Debata do tu angka panurirang i, na tu hamu do nasida marhobas ndang tu diri nasida. Nunga dibege hamu barita na uli sian halak na paboahon i marhite panogu-noguon ni tondi parbadia na sian banua ginjang. Taringot tusi ma na pinaboa ni Debata tu angka panurirang i. Jala lomo situtu do roha ni angka suru-suruan mamareso i.
13 Parade hamu ma rohamuna asa marsitutu mulaulaon. Jaga hamu ma pingkiranmuna asa tongtong torang. Jala marpangkirimon ma hamu tu asi ni roha ni Debata na mansai balga i. Jaloonmuna ma i tingki dipapatar Jesus Kristus.
14 Songon dakdanak pangoloi ma hamu, unang be olo hamu dirajai sangkap ni rohamuna najolo tingki ndang ditanda hamu dope Debata.
15 Alai songon Debata na Badia na manjou hamu, badia ma hamu di sude parniulaonmuna.
16 Songon na nidok ni na tarsurat i, “Ingkon badia do hamu, ai badia do ahu.”
17 Molo martangiang hamu tu Ama i, marpangalaho ma hamu mardongan biar tu Debata saleleng manompang hamu di portibi on. Ai diuhumi Ibana do sude jolma hombar tu pambahenanna jala ndang marimbar jolma di ibana.
18 Ai diboto hamu do, ndang angka na olo sega songon perak manang mas na paluahon* hamu sian dalan ngolu na so marlapatan naung dijalo hamu sian angka ompumuna.
19 Alai mudar ni Kristus na arga i do na paluahon hamu, na songon mudar ni anak ni biru-biru na so adong cacatna* jala na ias.
20 Tutu, nunga dipillit Debata ibana andorang so adong dope portibi on.* Alai dipapatar do ibana di ujung ni jaman on alani hamu.
21 Marhite ibana do hamu porsea tu Debata, na pahehehon ibana sian na mate jala na mangalehon hamuliaon tu ibana, asa porsea hamu jala mangkirim tu Debata.
22 Ala nunga badia hamu saonari marhite mangoloi hasintongan i, gabe sian ias ni roha ma* hamu mangkaholongi angka dongan. Alani i, masihaholongan ma hamu sian nasa roha.
23 Ai nunga ditubuhon hamu muse, ndang sian boni na olo busuk alai sian boni na so olo busuk do, i ma marhite hata ni Debata na mangolu jala na manongtong.
24 “Ai songon duhut-duhut do saluhut jolma jala songon bunga di ladang do sude hamuliaonna. Malos do angka duhut-duhut jala marurus do angka bunga,
25 alai hot do hata ni Jahowa saleleng ni lelengna.” Jala “hata” na nidokna, i ma barita na uli na dipaboa tu hamu.
Surat na di toru
^ Manang “tean-teanan”.
^ Manang “diuji”.
^ As. “manobus”.
^ Manang “tihasna”.
^ Na nidokna dison i ma dung tubu angka anak ni si Adam dohot si Hawa.
^ Manang “ndang munafik”.
